Accessibility setting

Agpili iti lengguahe

Mapan iti segundario a pagpilian

Mapan iti listaan dagiti linaonna

Mapan iti linaonna

Dagiti Saksi ni Jehova

Iloko

2015 Tinawen a Libro Dagiti Saksi ni Jehova

 SANGALUBONGAN A PANANGASABA KEN PANANGISURO

Europa

Europa
  • PAGILIAN 47

  • POPULASION 741,311,996

  • AGIBUMBUNANNAG 1,611,036

  • PANANGYADAL ITI BIBLIA 847,343

Nagpasiar ti Klaseda iti Kingdom Hall

Finland: Panagpasiar dagiti Grade IV iti Kingdom Hall

Ni Ines ket maysa nga ubing a Grade IV iti Finland. Naammuanna a pagsasaritaanto ti klaseda ti maipapan kadagiti Saksi ni Jehova iti leksionda mainaig iti relihion. Isu nga inawisna ti klaseda nga agpasiar iti Kingdom Hall. Immanamong dagiti kaklasena ken ti maestrada.

Iti sumaganad a lawas, agarup lima a kilometro ti binisikleta ti  38 nga ubbing a napan iti Kingdom Hall. Napan met ti dua a maestra ken ti prinsipal. Dua a brother ken tallo a sister ti nangsabat kadakuada iti Kingdom Hall. Bayat nga agmermerienda dagiti ubbing, nagsalsaludsodda maipapan iti Kingdom Hall ken kadagiti Saksi: “Ania ti ar-aramidenyo no aggigimongkayo?” “Ania dayta kuarto dita?” Itudtudoda ti libraria. “Apay nga adda ‘six divided by ten’ dita diding?” Tuktukoyenda ti Mateo 6:10 a teksto iti tawen. *

Gapu ta makiramraman ti eskuelaan iti proyekto a pananglapped iti panang-bully iti eskuelaan, impabuya dagiti kakabsat ti whiteboard animation video a Maparmekmo ti Bully Uray Dika Lumaban (Beat a Bully Without Using Your Fists), iti jw.org. Impakitada pay ti dadduma a seksion ti Web site-tayo ken impatokarda ti maysa a kanta ti Pagarian. Agarup maysa nga oras ti panagpasiarda iti Kingdom Hall.

Naragsakan ti prinsipal, dagiti dua a maestra, ken dagiti ubbing iti dayta a panagpasiarda. Nagustuan ti prinsipal dagiti linaon ti Web site-tayo gapu ta ammona a mausarto dagita kadagiti leksionda maipapan iti relihion. Naayatan met ta mabalin latta a mapan agpasiar iti Kingdom Hall ti dadduma pay a klase. Kas resultana, maysa a maestra iti sabali a klase ti nangkontak kadagiti Saksi iti kabigatanna ket kiniddawna nga agpasiarda met iti Kingdom Hall.

Nakabirok iti Gameng iti Basuraan

Ni Cristina, a taga-Romania, ket pulos a saan a nakadap-aw iti eskuelaan ken saanna nga ammo ti agbasa ken agsurat. Nakapangpanglaw ken panagbirok iti lata ken plastik kadagiti pagbasuraan iti siudad ti pagbiaganna.  Maysa nga aldaw, adda naidumduma a nakitana—maysa a naibatay-Biblia a pagbasaan nga addaan kadagiti ladawan ti nararagsak a tattao. Kinunana iti bagina, ‘Adda la ketdi kakasta a tattao ditoy lubong.’ Kayat ni Cristina a maammuan ti linaon ti publikasion isu a nagsapul iti mangibasa kenkuana. Idi nangngegna a maipapan dayta iti relihion, naladingitan ta ibelbelleng dagiti tattao ti  impormasion maipapan iti Sao ti Dios. Intultuloy ni Cristina ti agbirok iti broshur, tract, ken magasin kadagiti basuraan. Kompleto pay la ti dadduma ngem adda met dagiti napigpigisen. Nagsursuro nga agbasa ni Cristina tapno ad-adu pay ti maammuanna kadagiti publikasiontayo.

Idi agangay, nasarakan dagiti Saksi ni Cristina ket rinugianda nga iyadalan iti Biblia. Naragsakan a makaammo nga isu ket inyasideg ni Jehova kenkuana babaen kadagiti publikasion a saan nga inapresiar ti dadduma a tattao. Makigimgimongen ken maay-ayatan kadagiti masursurona. Ti maysa kadagiti pakaragsakanna unay ket baro itan dagiti magasin, libro, ken broshurna. Saanen nga iti basuraan ti pagbirokanna. Talaga a nakabirok ni Cristina iti gameng iti basuraan!

Panagadal iti Biblia iti “Kakaykaywan”

Germany: Ni Margret a mangyad-adal iti Biblia iti kakaykaywan

Binigat a mapan agpagnapagna ni Margret tapno ipasiarna ti asona iti maysa a kakaykaywan iti Germany. “Ikagkagumaak a kasarita dagiti masabatmi,” kunana. “No saanda nga agap-apura, iturongko ti saritaan iti Biblia.”

Naminsan, nasabatna ti maysa a baket a nasuroken a 70 ti tawenna ken ipaspasiarna met ti asona. Inrugi ni Margret ti saritaan. Nagustuan ti baket ti panagsaritada ket imbagana ken Margret nga agkarkararag iti Dios ken inaldaw a basbasaenna ti Biblia. Manipud idin, inaldaw nga agkitada ken pagsaritaanda dagiti naespirituan a bambanag. Naminsan, insaludsod ti baket: “Apay a nagadu ti ammom iti Biblia?” Inlawlawag ni Margret nga isu ket maysa a Saksi ni Jehova.

 Namin-adu nga imbaga ni Margret nga agadalda iti Biblia iti balay ti baket ngem dina kinayat. Nupay kasta, nagtultuloy latta ti panagsarsaritada. Kalpasan ti sumagmamano a bulan, imbaga manen ni Margret ti maipapan iti panagadal iti Biblia iti pagtaengan. Iti daytoy a gundaway, impudno ti baket a maamak a makipagadal gapu ta ti kabkabbalayna a lalaki dina kayat dagiti Saksi ni Jehova.

Iti simmaganad a panagpagnapagna ni Margret iti kakaykaywan, intugotna ti Biblia ken ti libro nga Isursuro ti Biblia. Idi nakitana ti babai, situtured nga imbaga ni Margret: “No saan a mabalin nga agadalta iti Biblia idiay balayyo, ditoy ta latta ngaruden ‘kakaykaywan’ nga agadal.” Nakalua ti baket ket inakseptarna dayta. Innem nga aldaw iti kada lawas nga agadalda iti Biblia iti “kakaykaywan.” Mangyadal ni Margret a nakapayong wenno naka-flashlight, depende iti kasasaad ti paniempo.

Makatikaw a Wingiwing

Ni Irina ket iyad-adalan ni Delphine idiay Bulgaria. Maap-apresiar ni Irina dagiti maad-adalna iti Biblia ken regularen a makigimgimong. Ngem saan a kayat ti asawana a makasarita ni Irina dagiti Saksi ni Jehova, isu nga inyakarna ti pamiliana iti bassit a purok iti Sweden. Napugsat ti komunikasion da Irina ken Delphine. Nupay kasta, naam-ammo ni Irina ti dua a pioneer a da Alexandra ken Rebecca. Ngem saan a makapagsao ni Irina iti Swedish isu nga inusar dagiti sister ti bokleta a Good News for People of All Nations ket impabasada kenkuana ti mensahe iti Bulgarian. Kalpasanna, iti tulong ti bokleta, sinaludsodda no kayatna ti maaddaan iti literatura iti bukodna a pagsasao. Kasta unay ti wingiwing ni Irina. Pimmanaw dagiti sister ta ti ammoda ket saan nga interesado.

 Idi kuan, nalagip ni Alexandra nga umay bumisita iti sumagmamano a lawas ni Linda, maysa a sister a taga-Sweden nga agserserbi idiay Bulgaria. Napanunotna a baka makatulong ken Irina no mangngegna ti kinapudno iti bukodna a pagsasao. Idi nakasangpet ni Linda, nagkaduada ken Alexandra a simmarungkar ken Irina. Imbaga ni Irina ken ni Linda a rinabii nga inkarkararagna ken Jehova a tulonganna koma tapno maitultuloyna ti panagadalna iti Biblia. Masansan nga itugtugotna ti libro nga Isursuro ti Biblia iti Bulgarian, tapno ipakitana dayta kadagiti Saksi no masabatna ida iti dalan. Ngem awan a pulos nakitana a Saksi. Maragragsakan ni Irina ta ad-adun a literatura iti Bulgarian ti maaw-awatna!

Dinamag ni Linda ken ni Alexandra no apay nga impagarupna a saan nga interesado ni Irina idi damoda a makasarita. Imbaga ni Alexandra a nagwingiwing ngamin ni Irina. Immisem ni Linda ket inlawlawagna a dagiti Bulgarian agtung-edda no dida umanamong ken agwingiwingda no umanamongda. Gapuna, intultuloy ni Irina ti agadal iti Biblia iti Bulgarian bayat a dina pay ammo ti agsao iti Swedish. Kasano? Adda manen komunikasionda ken Delphine ket agad-adalda babaen ti videoconference.

Mapagwadan nga Ama

Agnanaed ni Jemima idiay Spain. Idi ubing pay, naisuro kenkuana ti kinapudno, ngem bigla a nagbaliw ti kasasaad ti biagna idi agtawen iti pito ta saanen a kayat ni nanangna ti agbalin a Saksi sa indiborsiona ni tatangna. Idi agtawen iti 13, saanen a makikadkadua ni Jemima kadagiti Saksi ken saannan nga ipangpangag dagiti naespirituan a panangiwanwan ni tatangna.

Idi dakkelen ni Jemima, nakiraman kadagiti sosial ken politikal nga aktibidad a mangilablaban iti “hustisia”  para kadagiti gagangay a tattao. Idi naawanan iti trabaho, innala ni tatangna a ni Domingo a kaduana a parapinta.

Naminsan, bayat nga agtrabtrabahoda a dua, imbaga ni Domingo ken Jemima nga agadalda iti Biblia. Nagkedked ni Jemima ket kinunana nga ibagananto latta no kayatnan ti agpayadal. Dumdumngeg ni Domingo kadagiti recording ti Biblia ken magasin bayat nga agpimpinta, ngem kaykayat ti balasangna ti agdengngeg iti pop music a naka-earphone.

Idi Nobiembre 2012, nakaawat ni Domingo ken ti maikadua nga asawana iti imbitasion para iti Bible School for Christian Couples. Nasdaaw ni Jemima gapu ta ageskuela ni tatangna iti Bible school iti dua a bulan, panawanna ti amin, ken sidadaan a mapan iti sadinoman a pakaibaonanna. Iti umuna a gundaway, naamiris ni Jemima no kasano kauneg ti pannakairamut ti kinapudno iti puso ni tatangna, ket kayatna a maammuan no apay.

Insardeng ni Jemima ti agdengngeg iti musika a magusgustuanna ket dinengngegna dagiti recording a dengdenggen ni tatangna. Nangrugi payen nga agsaludsod. Maysa nga aldaw, bayat nga agpimpinta ni Domingo a nakabatay iti agdan, kinuna ni Jemima: “Malagipyo pay ti kinunak nga ibagakto latta no kayatkon ti agadal iti Biblia? Kayatko itan.”

Naragsakan ni Domingo a nakangngeg iti dayta. Idi Enero 2013, rinugiandan ti agadal iti Biblia a mamindua iti makalawas. Nangrugi ti panageskuela iti Abril, ngem intultuloyna latta nga inyadalan ni Jemima babaen ti videoconference. Nagatendar ni Jemima iti panagturposna, ket nagustuanna la unay ti programa. Idi Disiembre 14, 2013, nabautisaran ni Jemima.

“Kasta unay ti panangan-anus kaniak ni Jehova, ken ammok a saan a pulos a simmuksuko,” kuna ni Jemima.  “Inikkannak iti saanko a pulos nasarakan iti lubong—dagiti pudno a gagayyem. Tultulongannak daytoy a sangalubongan a panagkakabsat nga ad-adda pay a mangapresiar iti naindaklan nga ayat ni Jehova.”

Ti Maaramidan ti Panagraem

Nabayagen a miembro ti pamilia ti Bethel iti Russia ni Vasilii. Idi Marso 30, 2014, bayat nga agus-usar iti cart iti panangasabana iti asideg ti sanga nga opisina, adda immasideg a lugan ti polis. Dimsaag ti polis ket sidadayaw nga imbagana nga isardeng ni Vasilii ti ar-aramidenna gapu ta nagreklamo dagiti adda iti aglawlawna. In-video ti maysa pay a polis ti napasamak. Inkeddeng ni Vasilii a nasaysayaat no agtulnog iti polis ken saanna nga ipilit ti kalinteganna. Bayat dayta, nagsardeng dagiti dadduma a lumablabas tapno kitaenda ti mapaspasamak. Pimmanaw ni Vasilii, ngem dua nga aldaw kalpasanna, kiniddawna a makisarita iti hepe ti polis. Napatgan ti kiddawna. Bayat ti panagsasaritada, nagyaman ni Vasilii iti napateg a serbisio nga ipapaay dagiti polis para kadagiti tattao ken iti nadayaw a pannakisaritada kenkuana, dua nga aldawen ti napalabas. Kinuna ti hepe iti assistant-na, “Tallopulo ket dua a tawenkon a polis ngem ita pay laeng nga adda nagyaman iti trabahotayo!” Bayat ti panagsasaritada, naawatan ti hepe a saan a maisalungasing iti linteg ti panangasabatayo iti publiko. Dinamag ti hepe ken Vasilii no apay a timmulok idi pinaritan ti polis uray no adda kalinteganna. Insungbat ni Vasilii, “Raraemek dagiti polis. Panunotenyo laengen no ania ti makuna dagiti makakitkita no imbagak a saan nga ammo dagiti polis ti linteg.” Apresiaren unay ti hepe ken ti assistant-na ti imbaga ni Vasilii, ket impasiguradoda kenkuana a mabalinda latta nga itultuloy ti agusar iti cart iti panangasabada.

^ par. 2 Idiay Finland, “colon (:)” ti simbolo ti division.