Accessibility setting

Agpili iti lengguahe

Mapan iti segundario a pagpilian

Mapan iti listaan dagiti linaonna

Mapan iti linaonna

Dagiti Saksi ni Jehova

Iloko

2015 Tinawen a Libro Dagiti Saksi ni Jehova

 SANGALUBONGAN A PANANGASABA KEN PANANGISURO

Asia ken ti Middle East

Asia ken ti Middle East
  • PAGILIAN 48

  • POPULASION 4,315,759,010

  • AGIBUMBUNANNAG 703,271

  • PANANGYADAL ITI BIBLIA 732,106

Dinamagna no Mabalin nga Umay ti Dadduma

Dua nga aldaw sakbay ti Memorial, adda kabsat a nangted iti imbitasion iti maysa a parking attendant idiay Indonesia. Dinamag ti attendant, a maysa a Muslim, no mabalinna nga awisen ti dadduma pay gapu ta maymaysa ti imbitasionna. Imbaga ti kabsat a mabalin. Nagkiddaw pay ti lalaki iti kanayonan nga imbitasion  gapu ta dakkel ti pamiliana. Inikkan ti kabsat iti 20 nga imbitasion ken inlawlawagna a ti okasion ket maipapan iti Panglaglagip iti ipapatay ni Jesus ken maawis ti amin, Kristiano man wenno Muslim. Imbaga ti lalaki nga addanto 60 agingga iti 70 a kaduana.

Nangrugin ti palawag ti Memorial, ken addan 248 iti uneg, idi sumangpet ti parking attendant a kaduana ti agarup 100—lallaki, babbai, ubbing, babbaket ken lallakay, ken maysa a masikog. Nangarkilada iti sumagmamano a lugan a mapan iti hotel a pakaangayan ti Memorial. Gapu ta nakaad-aduda, saan a dagus a pinastrek ida dagiti guardia ti hotel. Nasdaawda no apay a nagadu a Muslim ti tumabuno iti programa dagiti Kristiano. Idi impakitada dagiti imbitasionda iti Memorial, kinuyog ida dagiti guardia a mapan iti auditorium. Agarup 60 ti napalubosan a sumrek iti napumpunno nga auditorium.

Kalpasan ti sumagmamano nga aldaw, sinarungkaran ti kabsat ti parking attendant ken sinaludsodna no nagustuanda ti programa. Imbaga ti lalaki a medio mababainda ngem nagustuanda ti okasion ta nasisingpet ti amin, kumabkablaawda, ken makial-alamanoda. Inawis manen ti kabsat a tabunuanda ti espesial a palawag iti sumaruno a Domingo. Immay ti lalaki a kaduana ti 40 a kabagian ken kaarrubana. Gapu ta dandanin malpas ti gimong idi makasangpetda, inkeddeng dagiti panglakayen nga uliten ti palawag. Impakaammo manen ti tserman ti tema ti palawag, dinakamatna ti pakabuklan ti programa, sa naisaruno ti kanta ken kararag.  Tapno matulongan dagitoy a Muslim, nagusar ti ispiker iti sasao a pamiliar kadakuada, kas iti “Nasantuan a Libro” imbes a ti “Biblia” ken ni “propeta Isa” imbes a “Jesus.”

Idi agangay, simmarungkar met ti maysa a panglakayen iti pagtaengan ti parking attendant ket nagsaritaanda ti Biblia babaen ti broshur a Listen to God. Nakikadua kadakuada ti 12 a sabsabali pay, a pakairamanan ti sumagmamano a Muslim a babbai ken ubbing.

Pagbasaan Kadagiti Bus

Mongolia: Napalubosan dagiti kakabsat nga agikabil kadagiti literatura para kadagiti pasahero

Agbibiahe iti nadumaduma a paset ti pagilian dagiti bus nga aggapu iti Ulaanbaatar, Mongolia. Agpaut dagiti biahe iti 48 nga oras, ket tuman-aw laeng iti tawa wenno maturog ti aramiden dagiti pasahero bayat ti biahe. Awan dagiti pagbasaan a naikabil kadagiti bus uray no magusgustuan dagiti Mongolian ti agbasa. Sipapanunot iti dayta dagiti kakabsat iti kongregasion ti Songinokhairkhan, isu a kinasaritada dagiti drayber dagiti bus: “Kayatdakayo a regaluan iti napintas a libro. Kadagiti eroplano, kanayon nga adda pagbasaan a naisuksok kadagiti likud ti tugaw. No iti panagkunayo ket kayat dagiti pasaheroyo nga adda basbasaenda, mabalinmi nga ikkan dagiti tugaw kadagiti literatura.” Walo a drayber ti immanamong. Kas resultana, nakaipaima dagiti kakabsat iti 299 a magasin ken 144 a broshur. Nakitulagda pay a suktanda dagita tunggal sumangpet dagiti baro a magasin.

 Sabali ti Nasarungkaran

Iti maysa a pagilian iti Asia, dua a panglakayen ti natudingan a mangsarungkar iti maysa a sister a saanen nga aktibo iti walo a tawen. Gapu ta saanda pay a nakitkita ti sister, tinawagan ken nakitulagda a danonenda iti puestona iti maysa a dakkel a pagtagilakuan. Kalpasan ti pannagnada kadagiti makatikaw nga eskinita, nasarakanda met laeng ti puesto nga umarngi iti adres ti sister. Idi sumrekda, kinablaawan ida ti maysa a babai nga adda bassit a Biblia iti lamisaanna. Idi naammuanda ti apeliedo, ili, ken ti tawen ti dua nga annakna, impagarup dagiti kakabsat nga isu daytoy ti di aktibo a sister. “Dakami dagiti kakabsatmo a Saksi ni Jehova,” kinunada.

“Kristianoak,” insungbatna a masmasdaaw. Nakigtot dagiti kakabsat iti reaksionna, ngem inikkanda latta kadagiti naibatay-Biblia a literatura, ket agyamyaman unay. Ngem idi pumanawdan, naamirisda a nagkamalida iti napanan a puesto! Iti koma puesto a 2202 ti sumrekanda ngem iti met 2200 ti napananda. Kinuna ti maysa kadakuada: “Urayak la simgar, ta kasla inturongdakami dagiti anghel a mapan iti dayta a puesto. Agpada ti apeliedo ti babai ken ti sister, agpadada iti ili, ken dandani pay agkatawenan dagiti dua nga annakda! No koma sabali ti apeliedo wenno ili ti babai, maibagami koma a saan nga isu ti sapsapulenmi.” Nanglabasda pay  iti maysa a puesto ket nasarakanda met laeng ti di aktibo a sister nga agur-uray iti isasarungkarda.

“Napalalo ti bainko ta uray no nakabaybayagen a saanak nga aktibo, dinak pulos linipatan ni Jehova”

Kas resulta daytoy a panagkamali, rinugian ti babai ti makipagadal iti Biblia ken makigimong. Nangrugi metten a makigimong ken regularen a makiramraman iti ministerio ti di aktibo a sister. Kinunana, “Napalalo ti bainko ta uray no nakabaybayagen a saanak nga aktibo, dinak pulos linipatan ni Jehova.”

Panagteks no Saan a Nasayaat ti Paniempo

Pilipinas: Agteteks ni Greg

Immakar da Greg ken Alma iti isla ti Catanduanes iti Pilipinas tapno agserbida iti lugar nga agkasapulan iti ad-adu a manangiwaragawag iti Pagarian. Dadduma kadagiti lugar sadiay ket kabambantayan, isu a masapul a magmagna da Greg ken Alma iti 19 a kilometro tapno madanonda dagiti teritoriada. No dadduma, dua nga oras nga aggaudda iti bangka a mapan mangasaba iti dadduma nga isla. No panagtutudo, saan a kaskarina dagiti kasta a panagdaliasat. Imbes nga addada lattan iti balay a di mangaskasaba, gundawayanda dagiti promo dagiti mobile network nga unlimited text a nalaka laeng ti bayadna.

Irugi ni Greg ti teksna babaen ti panangibagana iti naganna. Sa inayonna, “Adda laeng kayatko nga ibaga kenka a mensahe iti Biblia.” Ti maysa kadagiti epektibo a teksto nga us-usarenna ket ti Juan 17:3. Kalpasan a makotarna dayta, mangpataud iti dua a saludsod: Asino ti pudno a Dios? ken asino ni Jesu-Kristo? Sa awisenna nga ag-reply ti tineksanna. No sumungbat, mangiranud manen ni Greg iti kanayonan a teksto a kas iti Salmo 83:18. No ag-reply manen, damagenna no mabalin nga ituloyda ti agsarita iti telepono. Kinuna da Greg ken Alma nga adu ti mangipangpangag.

 Adu ti saludsod ti maysa a babai a tineksan da Greg ken Alma ket nagtultuloy ti panagtitinneksda. Nayadalanda iti Biblia daytoy a babai. Inranudna pay iti kaanakan ken katrabahuanna dagiti naadalna. Idi agangay, nabautisaranda a tallo.