Mapan iti linaonna

Mapan iti segundario a pagpilian

Mapan iti listaan dagiti linaonna

Dagiti Saksi ni Jehova

Iloko

2015 Tinawen a Libro Dagiti Saksi ni Jehova

 SANGALUBONGAN A PANANGASABA KEN PANANGISURO

Africa

Africa
  • PAGILIAN 58

  • POPULASION 994,839,242

  • AGIBUMBUNANNAG 1,421,375

  • PANANGYADAL ITI BIBLIA 3,516,524

Sinurotda ti Maestroda

Ni José ket maysa nga agkabannuag a payunir nga agnanaed iti away ti Luanda, Angola. Mangisursuro iti eskuelaan nga asideg iti Kingdom Hall. Gapu ta ipakpakitana dagiti Nakristianuan a kualidad ken nalaing a mangisuro, kaykayat ken raraemen ti 86 nga estudiantena. Iti kongregasionda, 4:00 ti malem a mangrugi ti gimongda iti tengnga ti lawas, isu a napalubosan a pumanaw a nasapsapa  iti kasta nga aldaw. Kalpasan ti trabahona, agdiretson iti Kingdom Hall.

Masmasdaaw ti dadduma nga estudiante no apay a nasapa a pumampanaw ni José ken no sadino ti pappapananna. Naminsan, sinurot ti dua nga estudiantena tapno maammuanda ket timmabunoda iti gimong. Iti sabali met a gundaway, tallo a sabali pay nga estudiante ti nakigimong iti aldaw nga adda paset ni José iti Gimong ti Serbisio. Alisto a nagwaras iti klaseda daytoy a damag. Kadagiti simmaruno a lawas, immadu dagiti estudiante a nakigimong, manipud 5 a nagbalin a 21. Iti Kingdom Hall, intukon dagiti kakabsat a mayadalanda amin iti Biblia. Immanamong ti kaaduan kadakuada. Idi nangitugot dagiti estudiante iti sumagmamano a publikasion idiay eskuelaanda, naginteres met ti dadduma ken nakigimongda. Idi agserran ti klase iti dayta a tawen, 54 kadagiti 86 nga estudiantena ti nakapadasen a makigimong. Inreport ni José a 23 nga estudiantena ti rumangrang-ay ken agtultuloy a makigimgimong.

Talaga Kadi a Kurang ti Teritoria?

Nigeria: Us-usaren da Joseph ken Evezi ti DVD player iti ministerio

Idi simmangpet dagiti special pioneer a da Joseph ken Evezi iti Nigeria a baro a pakaidestinuanda, adda dagiti maup-upay nga agibumbunannag a nangibaga kadakuada: “Kurang ti teritoriami. Kanayon a maas-asak.” Kalpasan ti makatawen, nagsurat ni Joseph iti sangay a kunkunana: “Iti kada lawas, inaldaw a mawanas ti teritoriami ken saankami a sumardeng uray no adu ti mangidumduma ken saan nga interesado. Adda itugtugotmi a bassit a DVD player no mapankam mangasaba tapno maipabuyami dagiti video kadagiti ubbing, agtutubo, ken  nataengan. Kas resultana, mangikonkonduktakami ken baketko iti 18 a panangyadal iti Biblia iti kada bulan. No dadduma, dimi payen masarungkaran amin nga iyad-adalanmi. Sangkaibaga pay ketdi dagiti ubbing nga ipabuyami kadakuada dagiti ‘video ni Caleb.’”

Dagiti Agpatpatulong iti Maysa nga Isla

Congo (Kinshasa): Panangasaba iti maysa a mangngalap

Idi Abril 2014, nakaawat ti sanga nga opisina idiay Congo (Kinshasa) iti makatukay-puso a surat manipud  kadagiti mangngalap nga agnanaed iti Ibinja Island iti Lake Kivu. Masansan a mapan aglako dagitoy a mangngalap kadagiti siudad iti aglawlaw ti islada. Iti naminsan nga ipapanda iti siudad ti Bukavu, naam-ammoda dagiti Saksi ni Jehova. Kinasabaan ida dagiti Saksi ken inikkanda ida iti Biblia ken sumagmamano a publikasion.

Nagustuan dagiti mangngalap ti nabasada ket inranudda dagita kadagiti taga-isla. Gapu ta adu ti interesado, maysa kadagitoy a mangngalap ti naibaon nga agsubli iti Bukavu tapno birokenna dagiti Saksi ken awisenna ida iti Ibinja. Idi saanna ida a nasarakan, nagsurat iti sanga nga opisina, a kunkunana: “Pangngaasiyo ta mangibaonkayo kadagiti Saksi a tumulong kadakami tapno maawatanmi ti Biblia a kas kadakuada ken maammuanmi no kasano ti agbiag nga agnanayon. Dakamin ti makaammo iti pagdagusanda. Mabalinko pay ketdi ti mangted iti pagipatakderan iti kapilia. Naammuanmi kadagiti teksto ti Biblia kadagiti libroyo a saan nga umiso dagiti isursuro kadakami dagiti papadi ken papastor. Kombinsidokami a nasarakanmin ti pudno a relihion. Adukami ditoy Ibinja a mayat nga agadal iti Biblia ken agbalin a Saksi ni Jehova.”

Dinakamat ti surat nga agarup 40 ti interesado nga adda iti isla. Nasurok a 18,000 ti populasion ti Ibinja ngem awan ti Saksi. Dagus a nangibaon ti sanga nga opisina iti dua nga special pioneer a makapagsao iti lengguahe iti dayta nga isla.

Dumngegen ti Pastor

“Kanayonakton a maki-Memorial.” Kasta ti imbaga ti pastor ti maysa a nalatak a simbaan ti Protestante iti South Africa. Apay a timmabuno iti Memorial idi Abril 2014 daytoy a lider ti relihion? Adda ngamin dua a kakabsat nga agduma ti pulida a mangaskasaba a nagtuktok iti ridawna. Sigun iti kapadasanda, nalabit saan manen a  kayat ti pastor ti makisarita kadakuada. Kastoy ti panangestoria ti maysa kadakuada a ni Adaine: “Nasdaawkami ta linuktanna ti ridaw ken pinastreknakami. Nagpaut ti panagsasaritami. Nasdaaw a nakakita iti maysa a puraw a mangaskasaba iti komunidad dagiti nangisit ken nakisarita kenkuana iti mismo a lengguahena. Regular a mayad-adalanen iti Biblia daytoy a pastor.”

Intuloy ni Adaine: “Nasuroken nga 40 a tawen a misionero ken pastor daytoy a tao, ngem ita laeng ta agtawenen iti 80 a nabirokanna ti sungbat ti amin a saludsodna. Magustuanna ti libro a Tuladenyo ti Pammatida. No agad-adalkami, mangikabesa kadagiti punto sa usarenna kadagiti sermonna iti kapiliada. Impakitana kadagiti pasurotna ti libro nga Ania a Talaga ti Isursuro ti Biblia? Imbagana kadakuada, ‘No umay dagiti Saksi ni Jehova iti balayyo ken ikkandakayo iti kastoy a libro, pastrekenyo ida ken denggenyo ti ibagada ta adu ti masursuroyo iti daytoy a libro maipapan iti Dios.’”

Imbaga ti pastor ken Adaine nga isu ket nainget a binagbagaan dagiti nangatngato ti saadna iti relihionda ken binallaaganda a saanna a dakdakamaten dagiti Saksi ni Jehova kadagiti sermonna. Dina ammo ti aramidenna. Nalagip ni Adaine ti kapadasan ti maysa a katekista idiay Myanmar, a nadakamat iti 2013 Tinawen a Libro Dagiti Saksi ni Jehova. Idi imbasa ni Adaine daytoy a kapadasan, kinuna ti pastor: “Kasla kastaak met! Masapul nga agdesisionak itan.”

Idi Abril 14, 2014, ti damo nga itatabuno ti pastor iti Memorial ket imbagana a kanayonton a maki-Memorial. Kunana a determinadon a mangpugsat iti amin a pakainaiganna iti palso a relihion.

 Panangasaba Kadagiti Plantasion ti Kakaw

Ghana: Da Baffour ken Aaron a lumaslasat iti plantasion ti kakaw

Agserserbi da Baffour ken Aaron kas special pioneer iti Bokabo, maysa a rehion a pagmulmulaan iti kakaw iti makinlaud a Ghana. Ti teritoriada nga addaan kadagiti agaaddayo a babassit a balbalay ket madanon laeng babaen iti adu a makatikaw a desdes iti nagbabaetan dagiti pinuon ti kakaw. Sigurado a mayaw-awanka no agkamalika iti pagnaan! Naminsan, saan a ti dati a ruta da Baffour ken Aaron ti nagnaanda ket adda dagiti nasarakanda a kalapaw a dida pay pulos nadandanon. Naam-ammoda sadiay ni Michael ken Patience a naginteres iti mensaheda ken magaggagaran nga agpayadal iti Biblia. Idi agangay, kinuna ni Michael kadakuada: “Dua a tawenen a dikam makimismisa ta adda dagiti maisursuro kadakami a saan a maitunos iti Biblia. Sipud idin, rinabii nga ad-adalenmi ti Biblia ken Patience tapno masapulanmi dagiti sungbat dagiti saludsodmi. Inkarkararagmi a maammuanmi koma ti kinapudno.” Uray no adayo ti pagnaenda a lumasat iti plantasion, dagus nga inrugida ti makigimong. Iti napalabas a tawen, nabautisaran dagiti agassawa ket nagserbida kas regular pioneer. Ita, karamandan kadagiti magmagna kadagiti makatikaw a desdes kadagiti plantasion ti kakaw tapno agsapul kadagiti dadduma a ‘mangikarkararag a maammuanda koma ti kinapudno.’

Da Michael ken Patience a magmagna iti plantasion