Accessibility setting

Agpili iti lengguahe

Mapan iti segundario a pagpilian

Mapan iti listaan dagiti linaonna

Mapan iti linaonna

Dagiti Saksi ni Jehova

Iloko

2015 Tinawen a Libro Dagiti Saksi ni Jehova

 DOMINICAN REPUBLIC

Wayawaya a Mangasaba

Wayawaya a Mangasaba

 Napapatay ni Trujillo

Idi 1960, kimmaro ti panangkritikar dagiti nadumaduma a pagilian iti kinadiktador ni Trujillo. Umad-adu metten dagiti bumusbusor kenkuana iti pagilian. Ngem uray nariribuk ti politika, ni Milton Henschel, a naggapu iti sangalubongan a hedkuarter, binisitana ti pagilian ken inatenderanna ti tallo-aldaw nga asamblea idi Enero 1961. Adda 957 a timmabuno iti palawag publiko ken 27 ti nabautisaran. Bayat ti ibibisitana, tinulongan ni Brother Henschel dagiti kakabsat a mangorganisar manen iti trabaho ken mangaramid iti mapa ti teritoria.

Dagiti manangaywan iti sirkito a da Enrique Glass ken Julián López ti nadutokan a mangbisita kadagiti kongregasion. “Ti sirkitok,” kinuna ni Julián, “ket buklen ti dua a kongregasion iti makindaya a paset ti pagilian ken ti amin a kongregasion iti makin-amianan. Sakup ti sirkito ni Enrique ti nabatbati a paset iti daya ken ti intero a makin-abagatan a paset ti pagilian.” Gapu kadagitoy a panagbisita, makapagkokomunikar manen dagiti kongregasion ken mabalinda manen ti makikomunikar iti organisasion. Nakatulong pay dagitoy tapno bumileg ti espiritualidad dagiti kakabsat.

Da Salvino ken Helen Ferrari idi mapanda iti Dominican Republic, 1961

Simmangpet idi 1961 dagiti nagturpos iti maikadua a klase ti Gilead a da Salvino ken Helen Ferrari. Nagdakkel ti naitulong ti kapadasanda kas misionero idiay Cuba para iti dakkel a naespirituan a panagani iti Dominican Republic. Idi agangay, nagserbi ni Salvino iti Komite ti Sangay agingga iti ipapatayna idi 1997. Agserserbi ni Helen iti amin a tiempo iti 79 a tawenen, a kaaduan iti dayta ket binusbosna kas misionera.

 Iti rabii ti Mayo 30, 1961, napapatay ni Trujillo idi napaltopaltogan ti naglugananna, ket ditan a nagpatingga ti nakaam-amak a turayna. Nabiit pay idi ditoy dagiti agassawa a Ferrari. Nupay napapatay ni Trujillo, saan latta a natalged ti kasasaad ti politika, isu a nariribuk latta dagiti tattao ken ti politika iti sumagmamano a tawen.

Rumangrang-ay ti Trabaho a Panangasaba

Kabayatanna, adu pay a misionero ti simmangpet. Karaman kadagita dagiti agassawa a da William ken Estelle Dingman, a nagturpos iti umuna a klase ti Gilead, ken da Thelma Critz ken Flossie Coroneos. Nayakarda ditoy Dominican Republic manipud iti sangay ti Puerto Rico, dua la nga aldaw kalpasan ti pannakapapatay ni Trujillo. “Nariribuk ti pagilian idi sumangpetkami,” kinuna ni William, “aktibo dagiti soldado ta adda pagbutbutnganda idi a rebolusion, ket inspeksionen dagiti soldado ti amin a lumabas iti kalsada. Pinasardengdakami iti nadumaduma a checkpoint, ket sinukainanda dagiti bagahemi iti kada checkpoint. Inruarda amin a linaon dagiti maletami, uray dagiti kababassitan a banag.” Narigat idi ti mangasaba ta nakapegpeggad ti kasasaad ti politika.

Ni Thelma Critz, ken da Estelle ken William Dingman. Addada pay la iti pagilian kalpasan ti 67 a tawen a naregta a panagmisioneroda

“Bayat ti turay ti diktador a ni Trujillo,” kinuna ni William, “agdindinamag a Komunista kano dagiti Saksi ni Jehova ken isuda ti kadadaksan a tattao. . . . Ngem in-inut a nabalbaliwanmi dagita a pagarupda.” Gapu ta napasayaat dagiti aktibidad, adu a napasnek a tattao ti nangipangag iti mensahe ti Pagarian. Iti ngudo ti 1961 a tawen serbisio, addan 33 nga special pioneer iti pagilian.