NI German Gomera ti maikadua iti inaudi kadagiti 11 nga agkakabsat. Idi natay ni tatangna ken ti dua a kakabsatna a babbai, immakarda kada nanangna a Luisa iti sentro ti ili. Nakimiembroda iti Mennonite Church, a relihion dagiti manong ni Luisa ken ti pamiliada.

Malagip ni German: “Idi 1962, simmangpet iti ilimi ti agassawa nga special pioneer. Adda dagiti agkunkuna nga al-allilawenda kano dagiti umili babaen kadagiti ‘sinasairo a sursuro.’ Ngem idi napan ti agassawa iti balay ti pamilia Piña, pinastrekda ida. Dakkel daytoy a pamilia ket nagustuanda ti kinasayaat ken kinamannakigayyem dagiti payunir isu a dimngegda a naimbag kadakuada. Kas resultana, nakipagadal iti Biblia ti pamilia Piña ken dagiti tallo a manangko.

Intuloy ni German, “Iti naminsan a panagsarungkar dagiti payunir iti pamilia Piña, inayabanda ni nanangko. Binasada dagiti teksto ti Biblia a mangipakita iti namnama a biag nga agnanayon ditoy daga. Dinamag ni Nanang, ‘Apay ngarud nga ibagbagada iti simbaanmi a mapankam idiay langit?’ Inlawlawag ti kabsat no ania ti kuna ti Kasuratan maipapan iti panagungar a mapasamak ditoy daga. Nagustuan dayta  ni Nanang isu nga imbagbagana met iti sabsabali dagiti nasursurona.

“Idi naammuan dagiti papastor ti Mennonite Church a dagiti miembroda ket makipagad-adal kadagiti Saksi ni Jehova, pinadasda ida a pasardengen. Ngem nakauy-uyong ken nakabutbuteng ti wagas dagiti papastor a mangpasardeng kadakuada. Kinuna kadakuada ni Maximina, nga ina ti pamilia Piña, ‘Baketakon! Ammokon ti ar-aramidek.’

“Idi agangay,” kinuna ni German, “22 ti pimmanaw iti Mennonite Church ket rinugiandan ti makigimong iti kongregasion iti maysa a naabangan a balay. Nabautisaran ni Nanang idi 1965, ket nabautisaranak met idi 1969, idi agtawenak iti 13.”

Ni German ken dagiti kakabsatna itan. Agserserbida amin a matalek ken Jehova