Accessibility setting

Agpili iti lengguahe

Mapan iti segundario a pagpilian

Mapan iti listaan dagiti linaonna

Mapan iti linaonna

Dagiti Saksi ni Jehova

Iloko

2015 Tinawen a Libro Dagiti Saksi ni Jehova

 DOMINICAN REPUBLIC

Panangbirok iti Panggep ti Biag

José Estévez

Panangbirok iti Panggep ti Biag
  • NAYANAK 1968

  • NABAUTISARAN 1989

  • ABABA A PAKASARITAANNA Idi ubing pay, kayatna ti nasaysayaat a biag isu a pinanawanna ti lugarda ket napan iti siudad. Ditoy a naammuanna ti kinapudno ket sipud idin, sireregta nga inyun-unana ti Pagarian ti Dios.

AGTAWEN ni José iti 11 idi napan iti siudad ti Santo Domingo. Tapno adda kuartana, ag-shine iti sapatos, aglako iti kahel ken nakaskas a yelo. Idi agtutubon, pagaammon a nakagaggaget nga agtrabaho. Kalpasan ti sumagmamano a tawen, inawis ti manongna tapno suelduanna nga agbantay iti balayna. Saksi ni Jehova ni manongna. Iti lamisaan a panganan, nakita ni José ti libro a Mabalinyo ti Agbiag nga Agnanayon iti Paraiso a Daga ket nagpatnag a binasana dayta. Nabigbigna a nakasarak iti banag a mangyeg iti kaipapanan ti biagna.

Iti sumaganad a ngudo ti lawas, napan iti kaasitgan a Kingdom Hall ket inyam-ammona ti bagina kas Saksi ni Jehova. Imbagana kadagiti kakabsat a naadalna a masapul a makigimong ken ikasabana ti naimbag a damag. Imbagana pay nga idi nabasana ti libro nga Agbiag nga  Agnanayon, naammuanna dagiti bambanag a di rumbeng nga aramiden dagiti Kristiano, ken impasiguradona a saanna nga ar-aramiden dagita. Naaprobaran kas agibumbunannag kalpasan ti 15 nga aldaw. Nabautisaran kalpasan ti innem a bulan, idi agtawen iti 21.

Saan a makagimong ni José gapu iti eskediul ti trabahona isu a nagbirok iti sabali a trabaho uray no ti sueldona ket kakapat laeng iti dati. Mayaten ti eskediulna ta saanen a malapdan a makigimong ken nagbalin payen a regular pioneer. Ngem idi nagasawa ken naaddaan iti dua nga annak a lallaki, nagsardeng pay laeng a payunir.

Determinado ni José a mangisuro iti kinapudno kadagiti annakna manipud kinamaladagada. Gapuna, idi tallo a bulan pay laeng ti sikog ni baketna a Josefina iti inauna nga anakda a ni Noé, ibasbasa idin ni José Ti Librok Dagiti Estoria ti Biblia, ta namnamaenna a mangngeg dayta ti mayin-inaw nga anakda. Idi nayanaken ni Noé, naibasa metten ni José ti intero a libro. Kasta met laeng ti inaramidna idi mayin-inaw ni Neftalí a maikadua nga anakda.

Dimteng ti tiempo a nagbalin ni José kas general manager ti maysa a negosio a mamin-sangapulo nga ad-adu ti sueldona ngem iti dati a trabahona. Ngem idi 2008, idi agtawenen iti 10 ken 13 dagiti annakda, nagikkat iti nangato a posisionna ket nag-regular pioneer manen. Nagpayunir met ti asawa ken dua nga annakna. Gapu ta bimmassiten ti mapastrekna, agtitinnulong ti pamilia nga agekonomia wenno agin-inut. Tunggal bulan, agarup 30 ti dagup ti iyad-adalanda iti Biblia. Impatalged ni Jesus a no iyun-unatayo ti Pagarian, bendisionannatayo ni Jehova. (Mat. 6:33) Nagtalek ti pamilia ni José iti dayta a kari ket napaneknekanda a tungtungpalen ni Jehova ti saona.