Mapan iti linaonna

Mapan iti segundario a pagpilian

Mapan iti listaan dagiti linaonna

Dagiti Saksi ni Jehova

Iloko

2015 Tinawen a Libro Dagiti Saksi ni Jehova

 DOMINICAN REPUBLIC

Nawayawayaan sa Naparitan Manen

Nawayawayaan sa Naparitan Manen

Di Ninamnama a Pannakawayawaya

Napapatay ni Manuel Hierrezuelo bayat ti panangpalutpot dagiti autoridad

Bayat dagiti narigat a tawtawen ti pannakaiparit, nagtalinaed da Lennart ken Virginia Johnson kasta met da Roy ken Juanita Brandt iti nakaidestinuanda kas misionero. “Duakami ken Roy Brandt a pinaayaban dagiti opisial tapno imbestigarendakami,” malagip ni Lennart. “Sakbay dayta, dagiti opisial ti gobierno ni Trujillo pinaayabanda ni Brother Manuel Hierrezuelo.” Makapaladingit ta napapatay ni Manuel bayat ti pannakapalutpotna ngem nagtalinaed a matalek agingga a nauyos ti biagna. Ania ngata met ti mapasamak kada Lennart ken Roy? Kuna pay ni Lennart: “Idi nakasangpetkami, pinagsinadakami a pinalutpot ket inrekordda dagiti sungbatmi. Dayta laeng ti napasamak, ket dua a bulan kalpasanna, naipadamag kadagiti diario a saanen a paritan ti gobierno ni Trujillo dagiti Saksi ni Jehova isu a mabalinmin nga ituloy dagiti aktibidadmi.”

Sakbay ti pannakaiparit idi 1950, adda 261 nga agibumbunannag a makiramraman iti panangasaba iti Dominican Republic. Idi awanen ti pannakaiparit idi Agosto 1956, addan 522 a mangikaskasaba iti naimbag a damag. Di mailadawan ti ragsak dagiti kakabsat idi naammuanda a nawayadan a mangitungpal iti ministerioda kalpasan ti innem a tawen a pannakaibalbalud, pannakaiparit, ken kanayon a masipsiputan.

Ania ti inaramid ti ili ni Jehova iti dayta a di ninamnama a pannakawayawaya? Dagus nga inorganisarda ti trabaho! Nagsapulda kadagiti mabalinda a paggigimongan kas kongregasion sa nangaramidda kadagiti baro a mapa ti teritoria ken rekord ti kongregasion. Maragragsakan idi dagiti kakabsat ta mabalindan ti agkiddaw ken umawat kadagiti literatura. Ginundawayanda ti pannakawayawayada  babaen ti naregta a panangasaba. Kas resultana, iti laeng tallo a bulan, idi Nobiembre 1956, addan 612 nga agibumbunannag a makiramraman iti panangasaba.

Ti Napnuan Gura a Kampania Dagiti Papadi

Ti memorandum ni Toledano a nakailanadan dagiti plano tapno saan a maiserrek iti pagilian dagiti publikasiontayo

Nupay kasta, dagus a pinadpadakes dagiti papadi a Katoliko dagiti Saksi. Gapu iti katulagan a pinirmaan ni Trujillo ken ti Vatican, timmured dagiti papadi nga ad-adda pay a mangimpluensia iti gobierno tapno mapasardeng dagiti Saksi. Pinatulodan ti Katoliko a padi a ni Oscar Robles Toledano iti memorandum ni Virgilio Álvarez Pina nga State Secretary of the Interior. Kiniddawna ti suporta ti gobierno iti panangikagumaanna a “mangriing iti konsiensia dagiti taga-Dominican Republic kadagiti nakaro a peggad a patpatauden ti sekta a ‘Saksi ni Jehova’.”

Inlawlawag ni Toledano a ti kangrunaan a panggepna ket “tapno saan nga agballigi ti panagkomberte dagiti Saksi ni Jehova.” Inrekomenda pay ti memorandum ni Toledano a  saan a mapalubosan a maiserrek iti pagilian dagiti publikasiontayo, “nangnangruna ti libro a ‘The Truth Shall Make You Free’ ken ti magasin a Pagwanawanan.”

Naparitan Manen

Nagkukumplot dagiti lider ti relihion ken ti dadduma nga opisial ti gobierno ni Trujillo tapno rautenda dagiti Saksi. Idi Hunio 1957, ni Francisco Prats-Ramírez a presidente ti Dominican Party ket nagsurat iti memorandum a para ken Trujillo a mangibagbaga: “Planok ti mangangay kadagiti miting tapno mapasardeng dagiti napeggad ken kontra-gobierno nga ar-aramid dagiti Saksi ni Jehova.”

Adda dagus nga epekto daytoy a pammadakes, kas nailawlawag iti libro a Trujillo—Little Caesar of the Caribbean: “Bayat dagiti bulan ti kalgaw wenno summer idi 1957, naipablaak kadagiti pagiwarnak iti pagilian ti agsasaruno a pammabasol dagiti nangato nga opisial ti Gobierno a ‘rebelioso ken dakes’ dagiti aktibidad dagiti Saksi ni Jehova. Agsasaruno ti reaksion idi impatangatang ti padi a Jesuita a ni Mariano Vásquez Sanz ti nakaro a pananguy-uyawna kadagiti Saksi iti estasion ti radio a La Voz Dominicana [ti Boses Dagiti Dominicano] a kukua ni Trujillo. Imbagana a supsuportaran kano dagiti Saksi ti Komunismo, ken inawaganna ida a ‘nakillo, nasikap, kriminal, ken traidor a kabusor.’ Gapuna, maysa a surat ti pinirmaan da Arsobispo Ricardo Pittini ken Octavio Antonio Beras a mangibilbilin kadagiti papadi a salaknibanda dagiti pasurotda iti daytoy ‘nakaro a panangkontra iti sursuro ti simbaan.’”

Nagballigi ti panggep ti Simbaan ken Estado. Iti Hulio dayta a tawen, nangipasa ti Kongreso ti Dominican Republic iti linteg a mangiparparit iti trabaho dagiti Saksi ni Jehova. Di nagbayag, naipasango manen dagiti kakabsat iti pannakakabkabil ken nakaro a panangranggas dagiti polis. Agdagup iti 150 a kakabsat ti naaresto.