Accessibility setting

Agpili iti lengguahe

Mapan iti segundario a pagpilian

Mapan iti listaan dagiti linaonna

Mapan iti linaonna

Dagiti Saksi ni Jehova

Iloko

2015 Tinawen a Libro Dagiti Saksi ni Jehova

 DOMINICAN REPUBLIC

Panagbirok

Panagbirok

 Nangrugi ti Panagbirok

Iti Domingo, Abril 1, 1945, simmangpet iti Ciudad Trujillo (Santo Domingo itan) a kabesera ti Dominican Republic dagiti nagturpos iti Gilead a da Lennart ken Virginia Johnson. Kas kaunaan a Saksi iti pagilian, sumsumrekda iti lugar a ti pakasaritaanna ket napno iti panagdadangadang ken panagrigrigat. * “Daytoy ti agpaypayso a teritoria ti payunir,” kuna ti 1946 a Yearbook, “ta masapul a mangrugi dagitoy a Gileadite iti awan.” Panunotem laengen: Awan ti sanga nga opisina, awan ti Kingdom Hall, ken awan ti kongregasion. Awan ti am-ammo dagiti misionero iti pagilian, bassit la ti ammoda iti Espaniol, ken awan pagtaengan wenno aniaman nga alikamenda. Ania ngaruden ti aramidenda?

“Nagdaguskami iti Victoria Hotel. Lima a doliar ti pagbayadmi kada aldaw, agraman makan,” kinuna ni Lennart. “Nairugimi ti umuna a panangyadal iti Biblia iti dayta met la a malem. Kastoy ti napasamak: Dua a babbai a taga-Dominican Republic a nayadalanmi idi iti Biblia idiay Brooklyn ti nangted kadagiti nagan dagiti kabagian ken am-ammoda. Maysa kadakuada ni Dr. Green. Binisitami ket naam-ammomi pay ti kaarrubana a ni Moses Rollins. Idi naammuanda no kasano a naalami ti nagan ken adresda, dimngegda a naimbag iti mensahe ti Pagarian ket nakipagadalda iti Biblia. Idi agangay, nagbalin ni Moses a kaunaan nga agibumbunannag iti Pagarian iti pagilian.”

Simmangpet ti uppat pay a misionero idi rugrugi ti Hunio 1945. Di nagbayag, nakaipaimada iti adu a literatura  ken nakairugida iti adu a panangyadal iti Biblia. Iti Oktubre iti dayta a tawen, nakita dagiti misionero a kasapulanen ti lugar a paggigimongan. Gapuna, pinagbalinda a temporario a Kingdom Hall ti salas ken kosina ti pagtaengan dagiti misionero. Agingga iti 40 ti makigimgimong idi.

Maysa kadagiti immuna a nangipangag iti kinapudno ket ni Pablo Bruzaud, a pagaammo ti amin kas Palé. Adda bukodna a bus nga agbibiahe manipud Santiago agingga iti Ciudad Trujillo, isu a masansan a makapan iti kabesera. Naminsan, adda nakasarita ni Palé a Saksi iti Ciudad Trujillo. Inawatna ti libro a “The Truth Shall Make You Free” ket inaldaw a nakipagadal iti Biblia kadakuada. Di nagbayag, mangaskasaban ni Palé a kadua dagiti misionero ken ilugluganna ida. Idi agangay, naam-ammona ni Lennart Johnson ket nagbiaheda manipud Ciudad Trujillo agingga iti Santiago, a limmasatda iti kabambantayan agingga iti ili ti Puerto Plata nga adda iti igid ti baybay. Binisitada sadiay ti maysa a grupo dagiti interesado a nagsurat iti sangalubongan a hedkuarter iti Brooklyn, New York, tapno agkiddaw iti impormasion.

Bimmisita da Brother Knorr ken Brother Franz

Idi Marso 1946, bimmisita iti Dominican Republic da Nathan Knorr ken Frederick Franz manipud iti sangalubongan a hedkuarter. Makapagagar idi dayta nga ibibisita. Malaksid kadagiti kakabsat, adda 75 nga interesado a dimngeg iti palawag ni Brother Knorr. Iti ibibisitada, inyurnos ni Brother Knorr ti pannakabuangay ti sanga nga opisina iti Dominican Republic.

Da Brother Knorr ken Brother Franz iti umuna a Kingdom Hall iti pagilian, Ciudad Trujillo

Adu pay a misionero ti simmangpet, ket iti ngudo ti 1946 a tawen serbisio, addan 28 nga agibumbunannag iti pagilian. Gapu ta mangrugrugi pay laeng a maikasaba ti naimbag a damag iti daytoy a pagilian, adu a rabii nga insagsagana  dagiti misionero ti detalyado a mapa ti teritoria tapno masigurado a naurnos ken naan-anay ti panangasaba.

Nagsaknap ti Trabaho

Idi 1947, nasuroken a 59 nga agibumbunannag ti makiramraman iti trabaho a panangasaba. Iti dayta met la a tawen, nayakar iti Dominican Republic dagiti sumagmamano a misionero nga agserserbi idi iti Cuba. Da Roy ken Juanita Brandt ti dua kadakuada. Nadutokan ni Brother Brandt kas adipen ti sangay ken nagtultuloy iti dayta a pribilehio iti sangapulo a tawen.

Iti ngudo ti 1948 a tawen serbisio, agarup 110 nga agibumbunannag ti mangaskasaban iti naimbag a damag a kadua dagiti nagagaget a misionero. Ngem di ipagpagarup dagidiay a nareregta a manangaskasaba a mapaspasungadanen dagiti nakaro a pakarigatan.

^ par. 1 Maiwarwarasen iti Dominican Republic dagiti literatura ti Watch Tower sipud pay idi 1932. Ngem idi laeng 1945 a nangrugi ti personal a pannakaisuro dagiti interesado idi simmangpet dagiti agassawa a Johnson.