Mapan iti linaonna

Mapan iti segundario a pagpilian

Mapan iti listaan dagiti linaonna

Dagiti Saksi ni Jehova

Iloko

2015 Tinawen a Libro Dagiti Saksi ni Jehova

 DOMINICAN REPUBLIC

Makapagagar a Masanguanan

Makapagagar a Masanguanan

Nasayaat a Pakasarsaritaan

Agarup 70 a tawenen nga adda dagiti Saksi ni Jehova iti Dominican Republic. Iti las-ud dayta a tiempo, nakaaramidda iti naimbag a pakasarsaritaan. Iti ministerio, masansan nga umasideg dagiti tattao kadagiti Saksi tapno dumawatda iti literatura, ken gagangayen a mangngeg dagiti komento a kas iti: “Nagmayat ti relihionyo” wenno “Talaga nga ar-aramidenyo ti ibagbaga ti Biblia.”

Kas pagarigan, kitaentayo ti napasamak idi maipatpatakder ti Kingdom Hall iti lote nga indonar ti maysa a kabsat. Idi mapan iparehistro dayta ti kabsat, natakuatanna nga adda mangag-agaw iti lotena ken imparehistrona payen, sa ak-akusaranna ti kabsat nga isu kano ti mangag-agaw iti lote. Naiyuli ti kaso iti korte. Narikut daydi a kaso ta adda papeles dayta a tao a mangipakita a nainagan kenkuana ti lote.

Naminsan, dinamag ti hues iti abogado ti kabsat no asino a talaga ti irepresentarna. Idi inlawlawag ti abogado nga ireprepresentarna ti asosasion nga us-usaren dagiti Saksi ni Jehova, kinuna ti hues: “No kasta, saanen a pagduaduaan no asino ti agsasao iti pudno. Am-ammok dagiti Saksi ni Jehova, ket siguradoak a napudnoda. Saanda a pulos padasen a lukuen ti asinoman ken dida alaen ti saanda a kukua.”

Idi naipakitan dagiti ebidensia iti korte, nalawag a peke dagiti dokumento ti mangak-akusar. Gapuna, nangyetnag ti hues iti desision a pabor kadagiti Saksi. “Adu pay dagiti kastoy a kaso,” kinuna ti abogado ti Saksi. “Kanayon a mararaem dagiti Saksi ni Jehova no madakamatda kadagiti korte iti intero a pagilian.”

Panangsegga iti Masanguanan

Panawen laeng ti makaibaga no kasano pay kaadu dagiti nalinteg ti panagpuspusona a tattao a mayat a mangammo  iti kinapudno iti Biblia ken agdayaw iti pudno a Dios. Kabayatanna, adu a panagregget ti maar-aramiden tapno madanon ti puso dagiti kasta a tattao. Kas pagarigan, idi 2013, nasurok a 11 a milion nga oras ti binusbos dagiti Saksi ni Jehova iti panangasaba iti Dominican Republic, ken 71,922 dagiti naikonduktada a panangyadal iti Biblia. Makaparagsak met ta adda 9,776 a nakiraman iti panagpayunir. Iti Agosto iti dayta met la a tawen, 35,331 nga agibumbunannag ti aktibo iti ministerio. Kanayonanna, nalawag nga addanto pay ti irarang-ay iti masanguanan gapu ta 127,716 ti nagatender iti Memorial.

Adun ti rimmang-ayan ti panangasaba ken panagaramid iti adalan iti Dominican Republic manipud iti daydi aldaw ti Domingo, Abril 1945, nga isasangpet ken panangrugi da Lennart ken Virginia Johnson a mangikasaba iti naimbag a damag ti Pagarian. Ipatpateg dagiti Saksi ni Jehova iti Dominican Republic ti nakaad-adu a naespirituan a tawidda. Ap-apresiarenda ti tured ken sakripisio dagiti immuna a henerasion dagiti pudno nga agdaydayaw. Ngem ad-adda nga ipatpategda ita ti pribilehioda a ‘naan-anay a mangsaksi maipapan iti pagarian ti Dios.’ (Ara. 28:23) Segseggaanda ti aldaw inton ti amin nga agnanaed iti isla ken dagiti padada nga agdaydayaw manipud iti intero a lubong ket sangsangkamaysa a mangikanta: “Ni met laeng Jehova nagbalinen nga ari! Agrag-o koma ti daga. Agragsak koma dagiti adu nga isla.”—Salmo 97:1.