Accessibility setting

Agpili iti lengguahe

Mapan iti segundario a pagpilian

Mapan iti listaan dagiti linaonna

Mapan iti linaonna

Dagiti Saksi ni Jehova

Iloko

2015 Tinawen a Libro Dagiti Saksi ni Jehova

 DOMINICAN REPUBLIC

Nakaro a Panangranggas

Nakaro a Panangranggas

“Maikisapdanto”

Nabautisaran ni Borbonio Aybar idi Enero 19, 1955, idi a maiparparit pay laeng ti trabaho a panangasaba. Kalpasan ti panagbautisarna, adun ti iyad-adalanna iti Biblia idiay Monte Adentro ken Santiago. Idi saanen a maiparit ti trabaho idi 1956, nabautisaran ti dadduma nga iyad-adalanna a pakairamanan ti asawana.

Iti katengngaan ti Hulio 1957, nagtataripnong dagiti opisial ti gobierno idiay Salcedo tapno pagsasaritaanda ti aramidenda kontra kadagiti Saksi. “Ni Francisco Prats-Ramírez ti kangrunaan nga ispiker,” kuna ni Brother Aybar. “Imbagana: ‘Sumagmamano laengen nga aldaw, maikisapdanto.’” Kalpasan ti sumagmamano nga aldaw, inaresto dagiti polis ti amin a Saksi ni Jehova idiay Blanco Arriba, El Jobo, Los Cacaos, ken Monte Adentro idi Hulio 19, 1957.

“Maysaak kadagiti naaresto,” malagip ni Brother Aybar. “Impandakami iti hedkuarter ti militar iti Salcedo. Apagsangpetmi, kinabilnak ti maysa a koronel nga agnagan iti Saladín. Kasla kumilaw dagiti matana bayat a butbutngennakami. Idi kuan, pinagliniadakami a lallaki ken pinagliniada met dagiti babbai. Kinugkugtaran ken kinabkabil dagiti guardia dagiti lallaki ken binabautda met dagiti babbai a kunkunada, ‘Katolikoak ket pumatayak.’”

“Nabasakon ti Biblia ket ammok a ni Jehova ti Dios”

Namulta ni Brother Aybar ken nasentensiaan a maibalud iti tallo a bulan. Intuloyna: “Iti pagbaludan, binisitanakami ni Santos Mélido Marte a maysa a heneral. Kinunana kadakami: ‘Nabasakon ti Biblia ket ammok a ni Jehova ti Dios. Awan ti dakes nga inaramidyo  a pakaibaludanyo, ngem awan ti maaramidak ta dagiti obispo a Katoliko ti makagapu a naibaludkayo. Dagiti laeng obispo wenno ti jefe (“ti boss” a ni Trujillo) ti mangpaababa iti sentensiayo.’”

“No Kasta, Sika ti Boss?”

Karaman kadagiti naaresto ket ti balasang ken kakaanakan ni Fidelia Jiménez. Isu ti nangyadal kadakuada. Nupay saan a naaresto ni Fidelia idi damo, simmuko lattan kadagiti autoridad tapno maibalud met ket maparegtana dagiti naibalud. Kabayatan dayta, bimmisita iti pagbaludan ni Ludovino Fernández a nangato ti ranggona a komander ti militar ken agdindinamag gapu iti kinaarogante ken kinaranggasna. Pinaayabanna ni Fidelia ket nagdamag, “No kasta, sika ti boss?”

“Saan,” insungbat ni Fidelia. “Dakayo amin ti boss.”

“Sika ngarud ti pastor,” indamag manen ni Fernández.

“Saan,” insungbat ni Fidelia. “Ni Apo Jesus ti pastor.”

“Saan kadi a sika ti makagapu a naibalud amin dagitoy?” insaludsod ni Fernández. “Saan kadi a sika ti nangisuro kadakuada?”

“Saan,” kinuna ni Fidelia. “Naibaludda gapu iti Biblia. Iyap-aplikarda ngamin dagiti naadalda.”

Idi kuan, limmabas iti koridor ti dua a kakabsat nga immun-unan a naaresto a da Pedro Germán ken Negro Jiménez a kasinsin ni Fidelia. Adda nangkuyog kadakuada iti pannakayakarda manipud iti bartolina a mapan iti gagangay a selda. Daradara ti bado ni Negro, ken lumlumteg ti mata ni Pedro. Gapu ta nakita ni Fidelia a nakaro ti pannakakabkabilda, insaludsodna iti komander, “Kastoy kadi ti panangtratoyo kadagiti nasasayaat, nasisingpet, ken managbuteng-Dios a tattao?” Gapu ta ammo ni Fernández a dina mabutbuteng, imbilinna a maisubli ni Fidelia iti seldana.

 Masapul idi a natured dagiti matalek nga adipen ni Jehova kadagiti kasta a naranggas nga ibubusor—ket talaga a naturedda! Nadlaw met dayta dagiti opisial ti gobierno. Kas pagarigan, idi Hulio 31, 1957, nagsurat iti secretary of state ti maysa nga inspektor ti presidente a ni Luis Arzeno Colón a kunana: “Ti linteg a nabiit pay nga impaulog ti National Congress iparitna ti narelihiosuan nga aktibidad ti sekta a pagaammo kas Saksi ni Jehova, ngem agtultuloy latta a natibker ti kaaduan a miembrona.”