Mapan iti linaonna

Mapan iti segundario a pagpilian

Mapan iti listaan dagiti linaonna

Dagiti Saksi ni Jehova

Iloko

2015 Tinawen a Libro Dagiti Saksi ni Jehova

 DOMINICAN REPUBLIC

Nagtultuloy ti Panangasaba

Nagtultuloy ti Panangasaba

Sililimed nga Intultuloy Dagiti Misionero ti Trabaho

Nangrugi dagiti nakarigrigat a kasasaad dagiti kakabsat idi naiparit ti trabaho. ‘Naserraan dagiti Kingdom Hall, ken naiparit ti trabahomi,’ kinuna ti misionera a ni Alma Parson. ‘Nakaad-adu idi ti pakasuotan ken pakarigatan dagiti ipatpategtayo a kakabsat sadiay.’ Adda pay  dagiti naawanan iti trabaho ken naibalud. Ngem maragragsakan a manglagip: ‘Namin-adu a nakitami ti nabatad a panangiwanwan ken proteksion ni Jehova.’ Nagtultuloy ti nalimed a panagtrabaho dagiti kakabsat agsipud ta agtalekda iti ‘panangiwanwan ni Jehova.’

Saankami a mapalubosan nga aggigimong kas kongregasion, malagip ni Lennart Johnson: ‘Naggigimong dagiti kakabsat iti babassit a grupo kadagiti pagtaengan tapno awan ti makadlaw. Ad-adalenmi idi dagiti artikulo ti Pagwanawanan a nakopia babaen ti mimeograph. Impatpateg unay dagiti matalek a kakabsat ti naespirituan a pammabileg nga agtultuloy nga ipapaay ni Jehova kadakami babaen kadagitoy a babassit a grupo.’

Karaman da Roy ken Juanita Brandt kadagiti nagtalinaed iti nakaidestinuanda bayat ti pannakaiparit ti trabaho

Kabayatanna, kimmaro ti panangsipsiput ken panangriribuk ti gobierno. Ngem saan a napabutngan dagiti kakabsat. Idi Septiembre 15, 1950, nagsurat ni Secretary Hungría iti Presidente ti pagilian a kunkunana: “Ni Mr. Lee Roy Brandt ken ti dadduma pay a direktor ti grupo dagiti Saksi ni Jehova ket namin-adun a napaayaban iti daytoy nga opisina tapno isardengdan ti amin a propaganda ti relihionda nga iparparit ti gobierno, ngem nalawag a saanda a tungtungpalen ti bilin. Inaldaw a makaaw-awatkami kadagiti report manipud iti nadumaduma a paset ti pagilian a sililimed nga itultuloyda latta dagiti aktibidadda, a mangipakita a saanda a raraemen ti desision ti gobierno.” Iti ngudo ti suratna, inrekomendana ti pannakapapanaw dagiti “ganggannaet a kangrunaan a direktor” dagiti Saksi ni Jehova.

“Gubuayan ti Bileg”

Idi dandanin agngudo ti 1950, binisita da Brother Knorr ken Brother Henschel ti pagilian. Kalpasan dayta, nayakar  ti dadduma a misionero idiay Argentina, Guatemala, ken Puerto Rico. Dadduma kadakuada ti nagbirok iti trabaho tapno makapagtalinaedda iti pagilian. Kas pagarigan, nagtrabaho ni Brother Brandt iti kompania ti elektrisidad, ken dadduma ti nagisuro iti Ingles. Kinuna ti 1951 a Yearbook maipapan kadagitoy a misionero: “Ti panagtalinaedda iti pagilian ti nangpabileg kadagiti matalek a pasurot ti Apo a sinuruanda iti kinapudno. Maragsakan ti amin gapu iti kinaturedda a nangitultuloy iti trabahoda.”

‘Ti panagtalinaedda iti pagilian ti nangpabileg kadagiti matalek’

Ni Dorothy Lawrence ti maysa kadagiti misionero a nagisuro iti Ingles. Malaksid iti panagisurona iti Ingles, mangyadal pay iti Biblia kadagiti interesado. Kas resultana, adda dagiti natulonganna a nangawat iti kinapudno.

Impamuspusan dagiti matalek nga adipen ni Jehova ti agtultuloy a mangasaba uray no kanayonda a masipsiputan. No dadduma, pagsisinaenda dagiti panid ti libro sada kulpien tapno maibulsada wenno ikabilda iti supot dagiti ginatangda tapno makakasabada a di madmadlaw. Dagiti reportda iti serbisio ket isuratda a kasla listaan dagiti magatang. Iti pagreportan, isuratda ti papaya, bukbukel, itlog, repolio, ken kalunay imbes a libro, bokleta, magasin, panagsarungkar, ken oras. Ti awagda kadagiti Pagwanawanan a nakopia babaen ti mimeograph ket yuca, a pangawagda  iti kamoteng kahoy a gagangay a mula iti dayta a lugar.

Agtultuloy ti Panagaramid iti Ad-adalan

Idi Hunio 16, 1954, nagpirma ni Rafael Trujillo iti maysa a katulagan iti Vatican a nangted iti espesial a pribilehio kadagiti lider ti Romano Katoliko iti Dominican Republic. Iti daydi a tiempo, agarup uppat a tawenen a maiparparit ti trabaho dagiti Saksi. Ngem idi 1955, addan 478 nga agibumbunannag iti Dominican Republic. Kasano a nagbalin a posible dayta iti laksid dagiti narigat a kasasaad? “Ti espiritu ni Jehova ti mangpabpabileg kadakami,” kuna ti report iti 1956 a Yearbook. “Nagkaykaysa dagiti kakabsat, nabileg ti pammatida, ken nagtultuloyda a natured.”

Idi Hulio 1955, nangipatulod ti sangalubongan a hedkuarter iti pormal ken nanotarioan a surat ken ni Trujillo. Detalyado a nailawlawag iti dayta a surat ti neutral a takder dagiti Saksi ni Jehova ken nakiddaw ken Trujillo a ‘saanna koman a paritan ti trabaho dagiti Saksi ni Jehova  ken ti Watch Tower Bible and Tract Society.’ Ania ti resultana?