Accessibility setting

Agpili iti lengguahe

Mapan iti segundario a pagpilian

Mapan iti listaan dagiti linaonna

Mapan iti linaonna

Dagiti Saksi ni Jehova

Iloko

2015 Tinawen a Libro Dagiti Saksi ni Jehova

 DOMINICAN REPUBLIC

‘Masarakantayto Ida’

‘Masarakantayto Ida’

“Addanto Aldaw a Masarakantayo Ida”

Idi agarup 1935, rinugian ni Pablo González iti rehion ti Cibao Valley a basaen ti Biblia. Apagbiit a nakitimpuyog ni Pablo iti Protestante a grupo, ngem pinanawanna dayta idi nakitana a dagiti kababalinda ket saan a maitunos kadagiti nabasana iti Kasuratan. Nupay kasta, intultuloyna nga inadal ti Sao ti Dios a bukbukodna sana inranud dagiti maad-adalna—immuna iti pamilia ken kaarrubana sa kadagiti dadduma nga adda iti asideg ti lugarda. Inlakona ti talon ken bakana tapno adda gastuenna iti kasta a panangasabana.

Idi 1942, addan 200 a pamilia a bisbisitaen ni Pablo kadagiti lugar iti asidegda ken regularen a manggimgimong uray no saanna pay a naam-ammo dagiti Saksi ni Jehova. Imparparegtana kadagiti tattao nga adalenda ti Biblia ken iyaplikarda dagiti maadalda. Adu ti nangipapuso iti imbagana ket insardengdan ti agtabako, ken saanen nga adu ti assawada.

Ti maysa kadagiti dimngeg iti inkasaba ni Pablo ket ni Celeste Rosario. Kinunana, “Idi agtawenak iti 17, ni Negro Jiménez a kasinsin ni nanangko binisitana ti pamiliami  ket imbasaannakami iti sumagmamano a teksto iti Biblia. Isu ket miembro ti maysa kadagiti grupo nga idadauluan ni Pablo González. Gapu kadagiti imbasana a teksto, inkeddengko nga agikkatakon a Katoliko. Latin ti ibasbasada kadakami iti simbaan isu a dimi maaw-awatan. Di nagbayag kalpasanna, binisita ken pinaregtanakami ni Pablo González. Kinunana: ‘Saantayo a miembro ti aniaman a relihion, ngem adda la ketdi kakabsattayo iti intero a lubong. Ditay pay ammo no asinoda ken no ania ti awag kadakuada, ngem addanto aldaw a masarakantayo ida.’”

Nangbuangay ni Pablo kadagiti grupo dagiti agad-adal iti Biblia iti Los Cacaos Salcedo, Monte Adentro, Salcedo, ken Villa Tenares. Idi 1948, iti panagdissaag ni Pablo iti Santiago tapno aglugan iti sabali a bus, nakitana dagiti Saksi a mangaskasaba iti kalsada ket inikkanda iti Pagwanawanan. Iti sabali pay a panagbiahena, maysa a kabsat a babai ti nangipaima ken Pablo iti dua a libro ken inawisna a tumabuno iti Pananglaglagip iti ipapatay ni Kristo idiay Santiago. Nagustuanna unay ti nangngeganna iti Memorial. Kombinsido a nasarakannan ti kinapudno ket  dagidiay timmabuno isuda dagiti nabayagen a sapsapulenna.

Binisita dagiti misionero dagidiay iyad-adalan ni Pablo. Iti maysa kadagiti panggimgimongan ni Pablo, nasangpetanda ti 27 a natataengan a naragsak nga agur-uray kadakuada. Dadduma kadagitoy ti nagnagna iti 25 a kilometro; dadduma met ti nagkabalio iti 50 a kilometro! Iti sumaganad a lugar, 78 ti adda sadiay, ket 69 met ti nakigimong iti sabali pay a lugar.

Inted ni Pablo kadagiti misionero ti listaan ti agarup 150 nga interesado. Dagidiay a napakumbaba ken naespirituan ti panagpampanunotda a tattao ket ad-adalendan ti Biblia ken iyap-aplikardan dagiti prinsipiona. Ngem kasapulanda ti pannakaorganisar ken panangiwanwan. “Binisitadakami dagiti misionero ket naggimongkami,” malagip ni Celeste. “Nangyurnosda iti bautismo ket siak ti immuna a nabautisaran iti pamiliami. Iti sabali pay a gimong, nabautisaran met ni Fidelia Jiménez a nanangko ken ni Carmen nga adingko.”

Ti immuna nga asamblea sirkito iti Dominican Republic a naangay iti Santiago idi Septiembre 23-25, 1949, ti ad-adda pay a nangpapardas iti trabaho a panangasaba. Adu a managusioso ti immay isu nga adda 260 a dimngeg iti palawag publiko iti Domingo, ken 28 ti nabautisaran. Gapu iti daytoy tallo-aldaw nga asamblea, adu a kabbaro ti nakombinsir a daytoy ti organisasion nga us-usaren ti Dios tapno maibanag ti pagayatanna.