Mapan iti linaonna

Mapan iti segundario a pagpilian

Mapan iti listaan dagiti linaonna

Dagiti Saksi ni Jehova

Iloko

2015 Tinawen a Libro Dagiti Saksi ni Jehova

 DOMINICAN REPUBLIC

Agtultuloyakto Latta a Saksi ni Jehova

Ana María (Mary) Glass

Agtultuloyakto Latta a Saksi ni Jehova
  • NAYANAK 1935

  • NABAUTISARAN 1956

  • ABABA A PAKASARITAANNA Napeklan a Katoliko idi agtutubo. Naammuanna ti kinapudno iti Biblia ken situtured nga inibturanna ti ibubusor ti pamilia, Simbaan, ken Gobierno.

NAPEKLANAK a Katoliko. Maysaak a kantora wenno kumakanta iti simbaan. Kuykuyogek dagiti papadi no mapanda mangmisa iti nadumaduma a paset ti pagilian. Ngem idi 1955, inyestoria ni manangko ti asidegen a Paraiso. Inikkannak iti Biblia, bokleta a “Daytoy Naimbag a Damag ti Pagarian,” ken libro a “Mapapati Coma ti Dios.” Nagustuak dagitoy isu a dinamagko iti padi no mabalinko a basaen ti Biblia. Imbagana a mabagtitak kano ngem binasak latta dayta.

Idi nakipagyanak kada lolo ken lolak idiay Boca Chica, dinamag ti maysa a padi kaniak no apay a saanakon a makimismisa. Inlawlawagko a naammuak nga adu a sursuro ti simbaan ti saan a masarakan iti Biblia. Nakaunget ti padi. “Dumngegka sika a babai,” imbugkawna, “simminaka iti arbanko.”

 “Saan,” insungbatko, “sika ti simmina iti arban ni Jehova, gapu ta kukua ni Jehova dagiti karnero, saan a kukua ti asinoman a tao.”

Saanakon a nagsubli pay iti simbaan. Nakipagyanak ken manangko, ket nabautisaranak innem a bulan laeng sipud idi nangngegko ti kinapudno. Dagus a nagpayunirak. Kalpasan ti makatawen, nagkasarkami ken ni Enrique Glass, nga agserserbi idi kas manangaywan iti sirkito. Naminsan, bayat a mangaskasabakami iti maysa a parke iti La Romana, tiniliw dagiti polis ni Enrique. Idi ipanawdan, kinamatko ida ket kinunak: “Saksi-ak met, ken mangaskasabaak met itay. Apay a didak tiliwen?” Ngem didak kayat a tiliwen.

Agdagupen iti pito ket kagudua a tawen ti pannakaibalbalud ni Enrique. Ita, nasentensiaan manen iti 20 a bulan. Bisitaek ni Enrique iti kada Dominggo. Iti naminsan nga isasarungkarko, dinamag ti maysa a warden iti pagbaludan, “Apay nga addaka ditoy?”

“Naibalud ngamin ni lakayko gapu ta Saksi ni Jehova,” insungbatko.

“Ubingka pay ken naraniag ti masakbayam,” kinunana. “Saysayangem la ti orasmo kadagiti Saksi ni Jehova!”

“Maysaak met a Saksi ni Jehova,” kinunak. “Uray mamimpito a patayendak ken mamimpito a pagungarendak, agtultuloyakto latta a Saksi ni Jehova.” Awan maibaganan isu a pinapanawnakon.

Idi saanen a maiparit ti trabaho, adu a tawen a kinaduak ni Enrique a nagserbi iti sirkito ken distrito. Idi Marso 8, 2008, natay ni Enrique ket nagtultuloyak a nagserbi kas regular pioneer.