Mapan iti linaonna

Mapan iti segundario a pagpilian

Mapan iti listaan dagiti linaonna

Dagiti Saksi ni Jehova

Iloko

2015 Tinawen a Libro Dagiti Saksi ni Jehova

 DOMINICAN REPUBLIC

“Limmabanak a Kasla Leon”

Luis Eduardo Montás

“Limmabanak a Kasla Leon”
  • NAYANAK 1906

  • NABAUTISARAN 1947

  • ABABA A PAKASARITAANNA Dati nga opisial iti partido ti diktador a ni Rafael Trujillo. Naammuanna ti kinapudno, ket simamatalek a nagserbi ken Jehova agingga iti ipapatayna idi 2000.

NI Luis, a kabagian ni Trujillo, ket nagserbi a treasurer iti kangrunaan a partido politika a Partido Dominicano (Dominican Party). Ngem saan a mairusok ni Luis ti panangituray ni Trujillo ken namin-adu a pinadasna ti aglusulos iti puestona ngem di pinalubosan ti diktador.

Idi impapatay ni Trujillo ti dua a manong ni Luis, namindua met a pinadas ni Luis a papatayen ti diktador ngem di pulos napagsuspetsaan kadagita a planona. Nagpatulong pay ketdi ni Luis kadagiti espiritista tapno patayenna daytoy a diktador a tinukoyna a “kasla animal ti kababalinna ken ibilbilangna ti bagina a kangatuan.” Idi adda iti balay ti maysa nga espiritista, nakita ni Luis iti rabaw ti lamisaan ti libro a “The Truth Shall Make You Free.” Binasana ket naginteres unay iti libro nga urayna la inyawid ket nakombinsir a daytoyen ti sapsapulenna a pudno a sursuro ti relihion.

 Idi napan ni Luis iti Ciudad Trujillo, immatender iti gimong dagiti Saksi ni Jehova ken nangala kadagiti libro ken magasin. Nagpatnag a binasana dagiti literatura. Idi agangay, nagpayadal iti Biblia. Bayat a rumangrang-ay, inkeddeng ni Luis a panawan ti turay ni Trujillo. Idi naammuan ti diktador, intukonna ken Luis ti nangato a puesto, agbalin a konsul ti Dominican Republic idiay Puerto Rico. Ngem saan nga inawat ni Luis, uray no ammona a mabalin a maidadanes.

“Napasarak ti amin a kita ti pannakamaltrato,” kinuna ni Luis, “nagadu a pangallukoy ti gobierno kaniak. Ngem determinadoakon a mangtallikud kadagiti ituktukon daytoy a lubong.” Nakaturtured ni Luis a mangiranud iti naimbag a damag, nga uray la inawagan dagiti papadi a Katoliko kas “ti manangaskasaba.” Innem a bulan kalpasan ti damo a pannakigimong ni Luis iti Kingdom Hall, nabautisaran idi Oktubre 5, 1947.

Kalpasan a nabautisaran, natiliw, naibalud, ken naipisok ni Luis iti bartolina. Namin-adu a nagpeggad ti biagna. Ngem kada maaresto ken agparang iti korte, gundawayanna ti mangasaba. “Limmabanak a kasla leon a mangidepensa iti pammatik,” kinuna ni Luis, “ken maragragsakanak no malaglagipko dayta.”

Pagaammo dagiti tattao iti lugarda ti kinamatalek ni Luis nga agdaydayaw iti Dios. Idi 1994, kinuna ti El Siglo a diario iti Dominican Republic maipapan ken Luis: “Pagaammo ni Luis Eduardo Montás iti San Cristobal kas napasnek a tao. Nasayaat, mannakipagrikna, ken naalumamay. Amin nga ammotayo maipapan iti daytoy mabigbigbig a tao iti San Cristobal ket mainaig iti biagna kas Kristiano.”