Accessibility setting

Agpili iti lengguahe

Mapan iti segundario a pagpilian

Mapan iti listaan dagiti linaonna

Mapan iti linaonna

Dagiti Saksi ni Jehova

Iloko

2015 Tinawen a Libro Dagiti Saksi ni Jehova

 DOMINICAN REPUBLIC

Ti Kinapinget Mangyeg iti Bang-ar

Ti Kinapinget Mangyeg iti Bang-ar

Naannad a Panangasaba

Ni Rafael Pared, nga agserserbi iti Bethel a kadua ti asawana a ni Francia, ket nagbalin nga agibumbunannag idi 1957 iti edad a 18. Malagipna ti panangsursurot kenkuana  dagiti ages-espia a polis no mapan mangasaba tapno mangkitada iti gundaway a pangarestuanda kenkuana ken kadagiti kakaduana. “No dadduma,” kuna ni Rafael, “alistuanmi ti lumsot kadagiti babassit a kalye ken iskinita sami lagtuen dagiti alad tapno saandakami a matiliw.” Inlawlawag ni Andrea Almánzar ti ar-aramidenda tapno dida maaresto: “Nagan-annadkami tapno didakam madmadlaw. No mangasabakami, irugimi iti maysa a balay, kalpasanna labsanmi ti sangapulo sami ituloy ti mangasaba.”

Addan Pannakabang-ar!

Idi 1959, agarup 30 a tawenen ti panagturay ni Trujillo, ngem agbalbaliw idin ti kasasaad ti politika. Idi Hunio 14, 1959 nagsubli iti Dominican Republic dagiti napagtalaw nga umili tapno padasenda manen a padissaagen ni Trujillo iti puestona. Nupay nalapdan dayta a gakat sa naibalud ken napapatay dagiti nakiraman, patien dagiti umad-adu a kabusor ni Trujillo a din agbayag ti gobiernona isu nga impaspasnekda pay a kontraen ti turayna.

Idi Enero 25, 1960, kalpasan ti adu a tawen a panangsuporta ti Simbaan a Katoliko iti turay ni Trujillo, nagaramid dagiti papadi iti surat tapno iprotestada ti pannakaab-abuso ti kalintegan dagiti umili. Kuna ni Bernardo Vega a maysa a historiador iti Dominican Republic: “Napilitan ti Simbaan a kumontra ken Trujillo iti damo a gundaway gapu kadagiti iraraut idi Hunio 1959, agraman ti puersado a pananglapped kadagiti nakiraman iti dayta a gakat ken uray kadagiti nalimed a grupo a kontra iti turay.”

Makaparagsak ta idi Mayo 1960, saanen a pinaritan ti gobierno dagiti Saksi ni Jehova. Kalpasan ti adu a tawen a pannakaiparit, naadda ti pannakabang-ar maigapu met laeng ken Trujillo—ta pinugsatnan ti relasionna iti Simbaan.