Mapan iti linaonna

Mapan iti segundario a pagpilian

Mapan iti listaan dagiti linaonna

Dagiti Saksi ni Jehova

Iloko

2015 Tinawen a Libro Dagiti Saksi ni Jehova

 DOMINICAN REPUBLIC

Ginggined Idiay Haiti

Ginggined Idiay Haiti

Panagrang-ay iti Teritoria a Chinese

Idi 2005, ni Tin Wa Ng a Bethelite ken Chinese ti pagsasaona ket dinutokan ti sangay kas special pioneer tapno mangasaba kadagiti adu a Chinese iti pagilian. Nayanak ken dimmakkel iti Dominican Republic. Taga-China dagiti nagannakna ngem immakarda iti Santo Domingo.

Idi Enero 1, 2008, nabuangay ti kongregasion a Mandarin Chinese iti Santo Domingo, ket adda met nabuangay a grupo iti Santiago idi 2011. Ti 70 nga agibumbunannag, agraman ti 36 a regular pioneer ken sumagmamano nga auxiliary pioneer ket mangikonkondukta iti panangyadal iti Biblia iti promedio a 76 iti kada bulan.

 Panagbirok Kadagiti Adalan nga Agsasao iti Ingles

Idi 2007, addan 27,466 nga agibumbunannag a makiramraman iti ministerio iti 376 a kongregasion, ken 49,795 a panangyadal iti Biblia. Ngem awan ti kongregasion dagiti adu nga agsasao iti Ingles. Isu nga idi Abril 2008, dinutokan ti sangay dagiti misionero a da Donald ken Jayne Elwell a mangbukel iti grupo ti Ingles iti Santo Domingo. Nagsurbey nga immuna ti bassit a grupo dagiti nagagaget nga agibumbunannag tapno maammuanda no sadino ti ayan dagiti agsasao iti Ingles. Kalpasanna, inorganisarda ti teritoria tapno mawanasda dayta.

Kas resulta dagita a panagregget, nagtultuloy a rimmang-ay ti grupo ti Ingles iti Santo Domingo, ket idi Hulio 2009, addan nabuangay a kongregasion a buklen ti 39 nga agibumbunannag. Kasta met laeng ti naaramid iti dadduma a lugar iti pagilian. Idi Nobiembre 2011, addan pito nga Ingles a kongregasion ken maysa a grupo.

Dimmasig ken Jehova ti Babai a Tuleng ken Bulsek

Special pioneer a makisarsarita ken Lorys babaen ti tactile sign language

Adda Usher Syndrome ni Lorys ken dimmakkel nga ulila. Nayanak a tuleng ken nangrugi a kumapuy ti panagkitana idi agtawen iti 16. Makakita bassit no iti aldaw ngem saanen a makita iti rabii. Ti laeng pamay-anna a makikomunikar no rabiin ket babaen ti tactile sign language wenno panangarikapna iti ima ti agsensenias a kasarsaritana.

Naam-ammo ti agassawa nga special pioneer ni Lorys idi agtawen iti 23. Makikabkabbalay idi iti maysa a tuleng a lalaki ken adda maysa ti tawenna nga anakda a saan a tuleng. Inawisda a makigimong, ket nagustuanna dagiti nasursurona.

 Napartak ti panagrang-ay ni Lorys. Kas pagarigan, naadalna a saan nga umiso ti panagkabbalay ti di pay nagkasar isu nga inlawlawagna iti kabkabbalayna a masapul a mairehistro ti panagdennada. Inlawlawagna pay a dina kayat a sukiren dagiti moral a pagalagadan ti Biblia. Nasdaaw ti lalaki iti kinaprangka ni Lorys ket immanamong nga agkasarda.

Idi nagkasardan, nagbalin nga agibumbunannag ni Lorys, ket di nagbayag, nabautisaran. Nasursurona ti  American Sign Language (ASL) bayat ti pannakipagadalna kadagiti Saksi. Manipud idin, sursuruannan ti balasangna iti ASL ken iti kinapudno.

Napigsa a Ginggined iti Haiti

Dinto pulos malipatan dagiti taga-Haiti ken taga-Dominican Republic ti Martes, Enero 12, 2010. Dayta ti aldaw a panangdayyeg ti nakapigpigsa a ginggined iti Haiti. Dagus a binilin ti Bagi a Manarawidwid ti sangay ti Dominican Republic nga agipatulod iti kuarta iti sangay iti Haiti a pangsaranayna kadagiti biktima. Nagdakkel a kantidad ti kasapulan isu a ti naibaon a mangitulod iti kuarta ket ti doktor iti Bethel a ni Evan Batista, a 6’3” ti katayagna ken 127 a kilo ti kadagsenna.

Imbag laengen ta ni Brother Batista ti naibaon ta idi makadanon iti beddeng, naipakaammo kenkuana a kasapulan  unay ti itutulong dagiti propesional iti medisina. Adu a biktima a nakaro ti pannakadangranda iti ginggined ti naipan iti Assembly Hall a kaabay ti sangay iti Haiti tapno maagasanda. Idi naammuan dagiti kakabsat a Haitian a ti doktor ti sangay ti naibaon, tinawaganda ti sangay ti Dominican Republic ket kiniddawda no mabalin nga agtalinaed iti Haiti ni Brother Batista. Siempre, napatgan ti kiddaw ket narugian ti nasaknap a panangsaranay kadagiti kapammatiantayo iti Haiti—sumagmamano la nga oras kalpasan ti ginggined.

Nagsangpet ti adu a kakabsat tapno tumulong kalpasan ti ginggined iti Haiti idi 2010

Dagus a kinontak ti Purchasing Department ti sangay iti Dominican Republic dagiti regular a mangsupsuplay iti taraon kadakuada. Nasurok nga 6,800 a kilo ti bagas ken bukbukel ken dadduma pay a kangrunaan a taraon ti nagatang ken naipatulod iti Haiti iti 2:30 ti parbangon ti Huebes, Enero 14. Dayta ti kaunaan a simmangpet a saranay iti pagbeddengan a naggapu iti ruar ti pagilian. Iti dayta met la nga aldaw, tallo pay a doktor ti nagbiahe iti pito nga oras manipud Dominican Republic agingga iti sangay ti Haiti. Rabiin idi makasangpetda ngem imbes a mapanda kadagiti dagusda, nagderetsoda kadagiti nasugatan ket nagtrabahoda agingga iti tengnga ti rabii. Kabigatanna, uppat manen a doktor ken uppat a nurse iti Dominican Republic ti simmangpet. Naaramid dagiti operasion iti narigat a kasasaad ta iti laeng temporario a pagoperaan a naiplastar iti Assembly Hall ti nakaaramidanna. Iti uneg ti maysa a lawas, 300 ti naasikason dagitoy a 12 a boluntario.

Iti kada aldaw, maipan iti Dominican Republic dagiti serioso ti kondisionna tapno maagasan. No dadduma, ti lugan a nangitulod kadagiti suplay a pangsaranay ti mangitaray kadagiti nasugatan iti nadumaduma nga ospital iti Dominican Republic. Nangorganisar  ti sangay kadagiti Patient Visitation Group tapno masigurado a maipaay ti pammaregta, agas, ken bambanag a kasapulanda. Nangipaay dagiti lokal a kongregasion iti taraon ken pagdagusan dagiti agbambantay a kapamilia dagiti nayospital.

Imbunong dagiti Saksi ni Jehova ti nasurok a 450,000 a kilo a naidonar a relief goods, a pakairamanan ti 400,000 a nakasaganan a makan

Ti kinagaget ken kinamanagsakripisio ti ili ni Jehova kalpasan ti didigra ipakitana nga agpayso dagiti sasao a masarakan iti Proverbio 17:17, a kunana: “Ti pudno a kadua agayat iti isuamin a tiempo, ken ti kabsat a mayanak no adda rigat.” Ipakita ti adu a kapadasan a babaen ti espiritu ni Jehova ken ti Nakristianuan a panagkakabsat, tultulonganna dagiti nasungdo kenkuana, uray pay iti sango ni patay. Nagtultuloy ti napinget a panagsaranay iti adu a bulan. Imbunong dagiti Saksi ni Jehova ti nasurok a 450,000 a kilo a naidonar a relief goods, a pakairamanan ti 400,000 a nakasaganan a makan. Nakaad-adu dagiti nagboluntario a pakairamanan ti 78 a kakabsat a propesional iti tay-ak ti medisina manipud iti nadumaduma a paset ti lubong a sidadaan a nangipaay iti tiempo ken abilidadda nga awan bayadna. *

^ par. 1 Para iti kompleto a report, kitaem ti panid 14-19 iti Disiembre 2010 nga Agriingkayo!