Accessibility setting

Agpili iti lengguahe

Mapan iti segundario a pagpilian

Mapan iti listaan dagiti linaonna

Mapan iti linaonna

Dagiti Saksi ni Jehova

Iloko

2015 Tinawen a Libro Dagiti Saksi ni Jehova

 DOMINICAN REPUBLIC

Ay-ayatenda Dagiti Kakabsatda

Ay-ayatenda Dagiti Kakabsatda

Baro nga Eskuelaan Para iti Dumakdakkel a Panagkasapulan

Binendisionan ni Jehova ti panagregget dagiti adipenna iti Dominican Republic. Idi 1994, addan promedio a 16,354 nga agibumbunannag kadagiti 259 a kongregasion. Gapu iti daytoy a nakaskasdaaw nga irarang-ay, adda panagkasapulan kadagiti kualipikado a panglakayen ken ministerial nga adipen. Iti dayta met la a tawen, inaprobaran ti Bagi a Manarawidwid a maangay iti Dominican Republic ti Ministerial Training School, a nasuktanen iti School for Kingdom Evangelizers.

 Idi Oktubre 2011, agarup 600 nga estudiante ti naggraduaren iti 25 a klase a naangay iti pagilian. Nasurok a kagudua kadagiti nagraduar ti agserserbi ita iti nagduduma a kita ti amin-tiempo a serbisio, 71 ti special pioneer, ken 5 ti manangaywan iti sirkito. Iti sanga nga opisina ti nakaangayan ti immuna a 10 a klase, ngem manipud iti maika-11 a klase, naangayen dayta iti nairanta a pasilidad a pageskuelaan idiay Villa González.

“Agtitinnulong Dagiti Saksi ni Jehova”

Idi Septiembre 22, 1998, dinalapus ti Bagyo Georges ti Dominican Republic. Agpegges ti anginna iti nasurok a 190 a kilometro kada oras isu a nakaro ti pannakadidigra ti lugar. Rinibu ti naawanan iti balay ken nasurok a 300 ti natay. Nangipatakder ti Disaster Relief Committee iti relief center iti lote a nakaipatakderan ti Kingdom Hall idiay La Romana iti tulong ti Regional Building Committee. Agarup 300 a boluntario ti timmulong iti  panangsaranay, agraman dagiti boluntario manipud iti 16 a pagilian.

Agdagup iti 23 a Kingdom Hall ken nasurok a 800 a balay dagiti kakabsat ti natarimaan wenno naibangon manen. Maysa kadagiti biktima ket ni Carmen, a nataenganen ken regular pioneer. Kasta unay ti ladingitna idi namimpinsan a nadadael ti balayna a 38 a tawen a naggiananna. Ngem di mailadawan ti ragsakna idi simmangpet ti grupo dagiti 15 a kakabsat a mangbangon iti pundasion ti baro a balayna. “Kanayon a sipapanunot ni Jehova kadatayo,” kuna ni Carmen, “ken tultulongannatayo, kas koma iti daytoy nagpintas a balay nga ibangbangon dagiti kakabsat para kaniak. Kinuna dagiti kaarrubak: ‘Agtitinnulong dagiti Saksi ni Jehova ta talaga nga agiinnayatda.’” Kasta met laeng ti naibaga dagiti tattao iti intero a pagilian idi makitkitada dagiti boluntario a Saksi a mangsarsaranay kadagiti apektado a kapammatianda.

Nupay nakaro a didigra ti inyeg ti Bagyo Georges, naliwliwa dagiti apektado a kakabsat gapu iti panagregget dagiti kapammatianda a mangipaay iti pisikal ken naespirituan a tulong. Kangrunaanna, ti panagsakripisio dagiti nagboluntario a kakabsat ti nangidaydayaw ken Jehova, ti gubuayan ti pudno a liwliwa.

Napartak a Panagibangon iti Kingdom Hall

Gapu ta napartak nga umadu dagiti adalan, kasapulan dagiti kanayonan a Kingdom Hall. Isu nga idi Nobiembre 2000, rinugian dagiti kakabsat iti Dominican Republic ti agipatakder kadagiti Kingdom Hall babaen iti tulong ti programa para kadagiti pagilian a kurang ti pondoda. Kas resultana, iti agarup walo a lawas, makaipatakderen dagiti kongregasion iti napintas ken komportable a Kingdom Hall. Idi Septiembre 2011, dua a grupo dagiti agibangbangon iti Kingdom Hall ti nakatarimaan wenno nakaipatakderen  iti agarup 145 a Kingdom Hall.

Nagdakkel a panangsaksi ti naipaay dagitoy a Kingdom Hall ken dagiti nagboluntario iti panagibangon. Kas pagarigan, iti bassit nga ili iti makin-amianan a laud ti pagilian, nakakita dagiti kakabsat iti lote a mabalin a pakaipatakderan ti baro a Kingdom Hall. Dinamag ti maysa nga special pioneer iti makinkukua iti daga no kayatna nga ilako dayta. “Diyon sayangen ti tiempoyo,” insungbat ti lalaki, “diak ilako kadakayo nangruna no patakderanyo iti simbaan.”

Di nagbayag kalpasan dayta a panagsaritada, napan idiay Puerto Plata ti makinkukua iti daga tapno bisitaenna ti manongna a maysa a Saksi ni Jehova. Idi nakadanonen, naammuanna a maysa a pamilia a Saksi ti nangala iti masakit a manongna tapno maaywananda iti balayda. Ipadpadoktor ken kuykuyogenda pay a makigimong ken mangasaba. Dinamag ti lalaki iti manongna no mano ti ibaybayadna iti panangaywanda kenkuana. Kinunana, “Libre, ta kakabsatko ida.”

“Dagitoy pay laeng a tattao ti nakitak a kasisingpetan ken talaga nga agtutunos nga agtrabaho”

Naapresiar unay ti makinkukua iti daga ti kinasayaat dagiti Saksi isu a tinawaganna ti special pioneer a nakatungtongna idi tapno ibagana a kayatnan nga ilako ti lotena. Ginatang dagiti kakabsat ti daga ket pinatakderanda iti Kingdom Hall. Ti asawa ti makinkukua iti daga ket saan idi a nasayaat ti panangmatmatna kadagiti Saksi ni Jehova. Ngem gapu iti nakitana a panagtitinnulong dagiti Saksi nga agibangon, kinunana, “Dagitoy pay laeng a tattao ti nakitak a kasisingpetan ken talaga nga agtutunos nga agtrabaho.”