Accessibility setting

Agpili iti lengguahe

Mapan iti segundario a pagpilian

Mapan iti listaan dagiti linaonna

Mapan iti linaonna

Dagiti Saksi ni Jehova

Iloko

2015 Tinawen a Libro Dagiti Saksi ni Jehova

 DOMINICAN REPUBLIC

Kasapulan Pay ti Ad-adu a Manangaskasaba

Kasapulan Pay ti Ad-adu a Manangaskasaba

Nakadanon ti Naimbag a Damag Kadagiti Nasulinek a Lugar

Idi agangay, adu pay a misionero ti simmangpet a pakairamanan da Pete Paschal, Amos ken Barbara Parker, Richard ken Belva Stoddard, a nagserbi idi idiay Bolivia, ken da Jesse ken Lynn Cantwell manipud Colombia. Timmulong dagitoy a misionero tapno ad-adda pay a rumang-ay ti trabaho a panangasaba. Idi 1973, nagsaknapen ti trabaho a panangisuro iti Biblia kadagiti ili ken siudad iti Dominican Republic, ngem saan pay a nakadanon ti naimbag a damag kadagiti nasulinek a lugar. Gapuna, naaramid dagiti urnos tapno maipaay ti naespirituan a kasapulan dagidiay agnanaed kadagiti nasulinek a lugar. Sidadaan a nagboluntario ti 19 a regular pioneer idi nayawis ti dua a bulan a panangasaba iti adayo a lugar. Iti nagbaetan ti Disiembre 1973 ken Enero 1977, naibaon dagiti grupo ti papayunir kadagiti lugar a manmano wenno saan pay a nakasabaan.

“Suktanda dagiti intedmi a publikasion kadagiti manok, itlog, ken prutas”

Inyestoria ti maysa a payunir a nakiraman iti daytoy espesial a trabaho: “Kalpasan ti agmalem a panangyam-ammo iti mensahe ti Biblia ken panagited iti literatura kadagiti tattao, sumarungkarkami a dagus iti kabigatanna kadagidiay naginteres. Gapu ta awan unay makukuarta dagiti tattao, suktanda dagiti intedmi a publikasion kadagiti manok, itlog, ken prutas. Agyamyamankami ken Jehova ta dikam pulos nabisinan.” Adu kadakuada ti damoda a mangngeg ti pannakaibasa ti Biblia. No dadduma, ibagbaga dagiti lider ti relihion kadagiti tattao  a ni Jehova ket isu ti Diablo. Nasdaawda idi binasada dagiti teksto iti Biblia kas koma iti Salmo 83:18: “Sika, nga agnagan Jehova, sika laeng ti Kangatuan iti intero a daga”! Iti dadduma a lugar, nakaad-adu ti interesado isu a nayurnos dagiti maaramid a palawag iti publiko.

Kasapulan ti Ad-adu Pay a Misionero ken Baro a Sangay

Idi Septiembre 1979, simmangpet iti Dominican Republic da Abigail ken Georgina Pérez nga agassawa a misionero. Nadutokan ni Abigail kas manangaywan iti sirkito. Idi 1987, simmangpet met dagiti nagraduar iti Gilead a da Tom ken Shirley Dean tapno sumuporta iti trabaho a panangasaba. Rimang-ay pay ti trabaho gapu iti adu nga special full-time servant manipud Puerto Rico. Idi Agosto 1988, simmangpet da Reiner ken Jeanne Thompson iti Dominican Republic, ti maikalima a nakaidestinuanda kas misionero.

Idi 1989, agpromedion iti 11,081 ti bilang dagiti agibumbunannag, ken 20,494 ti naireport a panangyadal iti Biblia a pakakitaan iti masanguanan a panagrang-ay. Ngem adda dagiti karit. Kas pagarigan, nausar a naimbag ti pasdek ti sangay, ngem iti ngudo ti dekada 1980, agkurangen ti pasilidad. “Nakail-ileten,” kuna ni Reiner Thompson, “isu a masapul pay idi ti agbirok kadagiti pagdagusan iti ruar ken agusar kadagiti bodega iti nadumaduma a paset ti siudad.”

“Narigat ti agbirok iti nasayaat a lugar a pangipatakderan iti baro a sangay,” intuloy ni Reiner. “Ngem kinontaknakami ti maysa a negosiante a nakadamag nga agbirbirokkami iti lote. Imbagana nga adda dagiti napintas a  lotena nga ilakona laeng kadagiti Saksi ni Jehova. Dakkel idi ti negosiona a pagdaitan ket Saksi ni Jehova ti sekretariana ken ti dadduma nga empleadona. Iti adu a tawen, nagustuanna unay ti naisangsangayan a kinamapagtalkan ken nadayaw a konduktada. Dakkel ti panagraemna kadagiti Saksi ni Jehova isu a naglaka ti panangilakona iti lote.” Nagatang dayta idi Disiembre 1988, ken ti tallo pay a kaabayna a lote kalpasanna. Siam nga ektaria amin ti nakaipatakderan ti sangay ken ti kaabayna nga Assembly Hall.

Ginasut a boluntario manipud iti uneg ken ruar ti pagilian ti timmulong iti pannakaibangon ti baro a sangay ken Assembly Hall. Naidedikar dagitoy a pasilidad idi Nobiembre 1996. Immay dagiti kameng ti Bagi a Manarawidwid a da Carey Barber, Theodore Jaracz, ken Gerrit Lösch ken nakiramanda kadagiti aktibidad iti aldaw ti dedikasion. Iti sumaganad nga aldaw, adda dagiti naangay nga espesial a programa iti dua kadagiti kadadakkelan nga estadium ti pagilian, ken nasurok a 10,000 ti pimmasiar iti baro a pasilidad ti sangay.

‘Iyaallatiw iti Macedonia’

Saan a kompleto ti pakasaritaan dagiti adipen ni Jehova iti Dominican Republic no saan a maisalaysay ti maipapan iti adu a Saksi nga immakar iti daytoy a pagilian nga addaan iti dakdakkel a panagkasapulan. Naparegta dagiti kakabsat idi nadamagda a nabunga daytoy a teritoria ta adu ti iyad-adalan ti maysa nga agibumbunannag. Gapuna, adu ti arigna ‘immallatiw iti Macedonia’ iti ngudo ti dekada 1980. (Ara. 16:9) Inyes-estoria dagitoy a boluntario a nakaragragsak ti makiraman iti trabaho a panagani iti Dominican Republic. Kas resultana, nakaad-adu ti immakar idi dekada 1990.

Kas pagarigan, da Stevan ken Miriam Norager manipud Denmark ket agserserbin iti Dominican Republic sipud idi  2001. Sakbay dayta, maysa ket kagudua a tawenen a nagserbi ditoy ni Miriam a kadua ni manangna. Ania ti nangtignay iti agassawa nga umakar iti adayo a pagilian a sabali ti kultura ken lengguahena? “Nabileg ti espiritualidad ti dimmakkelanmi a pamilia. Special pioneer dagiti nagannakmi,” kuna ni Miriam, “ket idi adda annakdan, nagserbida kas regular pioneer. Kanayon nga imparparegta dagiti dadakkelmi nga aramidenmi ti amin a kabaelanmi iti amin-tiempo a panagserbi para ken Jehova.”

Manipud idi 2006, agserserbin da Stevan ken Miriam kas special pioneer ken adun ti natulonganda a mangammo iti kinapudno. “Nakaad-adu dagiti bendision,” kuna ni Stevan. “Aniaman ti pakarigatanmi wenno parikut iti salun-atmi, kasla awan dagita no idilig iti nagsasayaat a kapadasanmi ken iti marikriknami a rag-o iti panangtulong kadagiti napasnek a tattao a mangammo ken  mangayat ken Jehova. Naaddaankami pay iti adu a naayat a gagayyem a kas iti maysa a dakkel a pamilia. Gapu iti panagserbimi iti Dominican Republic, nasursuromi ti agpakumbaba ken aganus. Ken gapu ta simple laengen ti panagbiagmi, bimmileg ti pammati ken panagtalekmi ken Jehova.”

Nasuroken a 20 a tawen a sumupsuporta ni Jennifer Joy iti teritoria ti sign language

Maysa ni Jennifer Joy iti adu a babbalasang manipud iti sabali a pagilian a nagboluntario iti Dominican Republic. Idi 1992, binisita ni Jennifer ti antina a ni Edith White a nabayagen a misionera. Nakitana a nabunga ti trabaho a panangasaba ken naam-amona ti dadduma a babbalasang a naggapu iti sabali a pagilian nga immakar ditoy tapno agserbi iti lugar nga addaan dakdakkel a panagkasapulan.  “Managbabainak ken kurang ti kompiansak iti bagik,” kuna ni Jennifer. “Ngem pinanunotko, ‘No kayada, baka kayak met.’”

Maysa la idi a tawen ti implano ni Jennifer a panagyan iti Dominican Republic, ngem nasurok itan a 20 a tawen nga agserserbi ditoy. Natulonganna ti adu kadagiti iyad-adalanna iti Biblia nga agbalin nga adipen ni Jehova. Maragragsakan ni Jennifer a mangsupsuporta iti teritoria ti sign language ken timmulong pay iti pannakaisagana ti kurikulum kadagiti klase iti panagadal iti dayta a lengguahe.

“Inay-aywanannak ni Jehova agingga ita, isu nga apay koma a pagduaduaak nga aywanannakto iti sumaganad a tawen?”

Kasano a supsuportaran ni Jennifer ti bagina? “Agaw-awidak idiay Canada tapno agtrabaho iti sumagmamano a bulan iti kada tawen” inlawlawagna. “Nadumaduma ti nastrekak a trabaho kas iti panagretrato, panag-develop iti retrato, panagpinta iti balay, panagdalus iti opisina, panagaramid iti headlight, ken panagaramid iti karpet. Nagtrabahoak pay kas tour guide, travel agent, maestra iti Ingles, ken interpreter.” Inyarig ni Jennifer ti kasasaadna kadagiti nagkauna nga Israelita. “Nagbiagda iti tunggal sao a rumrummuar iti ngiwat ni Jehova,” kunana. “Imbaga ni Jehova nga aywananna ida, ket inaramidna dayta. Inaldaw nga adda pagtaraonda, ken saan a narunot dagiti kawes ken pallokada. (Deut. 8:3-4) Inkari met ni Jehova nga aywanannatayo. (Mat. 6:33) Inay-aywanannak ni Jehova agingga ita, isu nga apay koma a pagduaduaak nga aywanannakto iti sumaganad a tawen?”

Immabuten iti 1,000 a managsakripisio nga ebanghelisador ti immay ditoy manipud iti nadumaduma a lugar kas iti Austria, Japan, Poland, Puerto Rico, Russia, Spain, Sweden, Taiwan, ken United States. Dagitoy a kakabsat a  naggapu iti 30 a nagduduma a nasion ket naikameng kadagiti kongregasion iti American Sign Language (ASL), Chinese, English, Haitian Creole, Italian, Russian, ken Spanish. Kaslada ken apostol Pedro a nagkuna: “Adtoy! Pinanawanmi ti amin a bambanag ket simmursurotkami kenka.”—Mar. 10:28.