Accessibility setting

Agpili iti lengguahe

Mapan iti segundario a pagpilian

Mapan iti listaan dagiti linaonna

Mapan iti linaonna

Dagiti Saksi ni Jehova

Iloko

2015 Tinawen a Libro Dagiti Saksi ni Jehova

100 a Tawenen ti Napalabas—1915

100 a Tawenen ti Napalabas—1915

 “ITA ti tiempo ti pannakasubok,” kuna ti The Watch Tower a Marso 1, 1915. “Aktibotayo kadi iti napalabas gapu laeng iti ninamnamatayo a nadayag a panagbalbaliw iti A.D. 1914, wenno aktibotayo gapu iti ayat ken kinasungdotayo iti APO ken iti Mensahena ken kadagiti kakabsat!” Bayat ti 1915, lablabanan ti sumagmamano nga Estudiante ti Biblia ti pannakaupay. Ngem adda sabali a pakilablabanan ti kaaduan a tattao iti lubong.

Agsaksaknap idin iti Europa ti Dakkel a Gubat a naawagan iti Gubat Sangalubongan I. Agbalbaliw idin ti wagas ti pannakigubat gapu kadagiti moderno nga alikamen a pakigubat, ket maap-apektaran unay ti adu a sibilian. Kas pagarigan, idi 1915, dagiti submarino wenno U-boat ti Germany ket mangrugin nga agsursor kadagiti baybay iti aglikmut ti Great Britain. Idi Mayo 7, 1915, pinalned ti maysa kadagitoy a U-boat ti pangpasahero a barko ti Britain a Lusitania. Nasurok a 1,100 ti natay.

Ti Isyu ti Neutralidad

Saan a kayat dagiti Estudiante ti Biblia ti makiraman iti daytoy a gubat. Ngem saanda pay a naan-anay a matarusan ti neutral a takder dagiti Kristiano. Nupay saanda a nagboluntario nga agpalista kas soldado, dadduma ti napilitan nga agsoldado ngem inkagumaanda ti maaddaan iti trabaho a saan a direkta a pannakigubat. No mapilitda a makigubat, inkeddeng ti dadduma a “paputoken lattan iti ngato dagiti armasda.”

Impablaak ti The Watch Tower a Hulio 15, 1915 ti kapadasan ti maysa a soldado a taga-Hungary. Nabautisaran daytoy bayat nga agpapaungar iti pannakadangranna sa nagsubli met laeng iti paggugubatan kalpasanna. Kastoy ti tuloy ti salaysay: “Idi 800 laengen a pie ti kaasideg dagiti soldado ti Hungary iti armada ti Russia, naibilin kadakuada, ‘Darupentayo ida iti bayoneta!’ Adda ti kabsat a taga-Hungary iti  makinkannigid nga ungto ti linia dagiti soldado. Kayatna la a salakniban ti bagina kadagiti kabusor isu nga inkagumaanna a tamaan ti bayoneta nga iggem ti soldado ti Russia a nakasangona tapno maibbatanna koma dayta. Ngem nadlawna a kasta met ti ar-aramiden ti soldado ti Russia . . . Inibbatan ti soldado ti Russia ti bayonetana; nagsangsangit. Inasitgan ti kabsat ti ‘kalabanna’—ket nalasinna ti pin a ‘Krus ken Korona’ iti unipormena! Ti soldado ti Russia ket maysa met gayam a kabsat iti Apo!” *

Ti artikulo a “Christian Duty and the War” (“Ti Pagrebbengan ti Kristiano ken ti Gubat”) nga impablaak ti The Watch Tower idi Septiembre 1, 1915, inlawlawagna ti neutral a takder dagiti Kristiano. Kunana: “Ti panagbalin a miembro ti militar ken ti panangisuot iti uniporme ipasimudaagna a bigbigem ken akseptarem dagiti pagrebbengan ken obligasion ti maysa a soldado. . . . Maipakita ngata ti maysa a Kristiano a neutral ti takderna no aramidenna dagita?” Idi agangay, nalawagen kadagiti Kristiano a masapul a dida makiraman iti gubat.

Dagiti Panagbalbaliw iti Hedkuarter

Idi 1915, gapu ta kurang ti pondo, 70 a miembro ti pamilia ti Bethel idiay New York ti napakaammuan a masapul a rummuarda iti Bethel ket itultuloyda ti agserbi iti tay-ak. Naibaga kadakuada: “Ditay ipalubos a makautangtayo wenno maisagmak ti trabahotayo; gapuna, naikeddeng a kissayantayo dagiti paggastuan agingga a mabalin.”

Ni Clayton J. Woodworth ken dua pay a kakabsat pinirmaanda ti surat a naggapu kadakuada a “Pitopulo a Rummuar.” Naipablaak daytoy a surat iti The Watch Tower a Mayo 1, 1915. Kinunada a nupay rummuarda, “maragragsakan  ken agyamyamanda gapu iti adu a bendision ken pribilehio” a tinagiragsakda “kas miembro ti ‘Pamilia ti Bethel.’”

Nupay narigat dayta a panagbalbaliw, gundaway dagiti kakabsat nga ipakita ti pudpudno a kinasungdoda. Agtalinaedda ngata a matalek iti Dios wenno agsakit ti nakemda? Intultuloy ni Brother Woodworth ti nangasaba, sa naayaban manen iti Bethel, ket idi 1919 isu ti nagbalin a kaunaan nga editor ti The Golden Age, ti magasin a maaw-awagan itan iti Agriingkayo! Nagserbi kas editor agingga idi 1946.

Dagiti Gundaway ti Panagserbi

Iti dayta a narigat a tawen, imparegta ti The Watch Tower nga itultuloy dagiti kakabsat ti mangasaba. Naipaayan iti naisangsangayan nga atension dagiti nangipakita idi iti interes. “Adda listaanmi kadagiti tattao manipud iti intero a pagilian a nangipatulod kadagiti kard ti kiddawda a literatura,” kuna ti The Watch Tower a Disiembre 15, 1915. “Isingasingmi a masarungkaran dagitoy . . . tapno maammuan di la ket ta nayaw-awandan.” Ti panggep ket rubroban ti interes dagitoy a tattao tapno “sumged a kas apuy ti regtada para iti Dios ken iti Kinapudno.”

Kas met la ita, napateg idi nga ipamaysa dagiti Kristiano dagiti interes ti Pagarian. “Datayo a siririingen rumbeng a nakaregregta ken nakagangganaygaytayo iti panagserbi iti Dios,” kinuna ti The Watch Tower a Pebrero 15, 1915. Masapul nga agtalinaed nga alerto dagiti adipen ti Dios. Intuloy ti magasin: “Masapul nga agsiputtayo. Ania ti masapul a siputantayo? Kangrunaan iti amin, siputantayo ti bagbagitayo tapno maliklikantayo dagiti silo iti agdama a tiempo.”

Indagadag ti teksto iti tawen 1916 nga agtalinaed a ‘nabileg iti pammati’ dagiti kakabsat kas nadakamat iti Roma 4:20 iti King James Version. Daytoy a teksto ti nangparegta kadagiti matalek a kakabsat para iti mapasungad a tawen, a nangyeg kadagiti sabali pay a pakasuotan.

^ par. 4 Iti adu a tawen, inus-usar dagiti Estudiante ti Biblia ti pin a krus ken korona kas pakabigbigan kadakuada. Adu met a tawen a makita daytoy a simbolo iti makinsango nga akkub ti The Watch Tower. Iti rugrugi ti dekada 1930, insardengen dagiti Saksi ni Jehova nga usaren ti simbolo a krus ken korona.