Accessibility setting

Agpili iti lengguahe

Mapan iti segundario a pagpilian

Mapan iti listaan dagiti linaonna

Mapan iti linaonna

Dagiti Saksi ni Jehova

Iloko

2015 Tinawen a Libro Dagiti Saksi ni Jehova

 DAGITI TAMPOK ITI NAPALABAS A TAWEN

Legal Report

Legal Report

ARMENIA Nangipaay iti Alternatibo a Serbisio a Saan a Nainaig iti Militar Kas Panangbigbig iti Neutral a Takder Dagiti Kristiano

Armenia: Imbilin ti gobierno nga agtrabaho dagiti dadduma a kakabsat iti alternatibo a serbisio kadagiti nasulinek a lugar iti pagilian. Bayat nga addada sadiay, nakaregregtada latta a mangasaba

Idi 2013, nangipaay ti gobierno ti Armenia iti alternatibo a serbisio a saan a nainaig iti militar. Gapuna, mabalinen a pilien dagiti Saksi ni Jehova ti alternatibo a serbisio imbes a maibaludda gapu ta saan nga ipalubos ti konsiensiada ti panagsoldado. Inreport ti sangay nga idi Enero 2014, inrugi ti 71 a kakabsat ti nagtrabaho babaen iti daytoy baro nga urnos. Kas pagarigan,  dadduma a kakabsat ti nagtrabaho iti kosina, wenno katulongan dagiti nurse iti hospital. Nagsayaat ti komento dagiti superbisor maipapan iti kababalin dagiti kakabsat iti panangaramidda iti trabahoda uray no narigat. Agyamyaman dagiti kakabsat ta adda alternatibo a serbisio a naipaay kadakuada tapno mataginayonda ti nadalus a konsiensiada kas Kristiano. * Naibaga ti maysa a kabsat, “Agyamyamankami ken Jehova ta adda alternatibo a serbisio a makatulong kadakami nga agtalinaed a neutral ken nawayakami nga agdaydayaw kenkuana.”

DOMINICAN REPUBLIC Nabigbig ti Kaunaan a Kinasar Dagiti Saksi

Idi 1954, pinirmaan ti Dominican Republic ken ti Vatican ti katulagan a ti laeng relihion a Katoliko ti mapalubosan a mangkasar. No saan a kasaren ti Katoliko, maysa nga opisial ti Civil Registry ti mangkasar. Ngem idi 2010, nangaramid ti gobierno iti baro a konstitusion a maikkan iti kalintegan a mangkasar dagiti kualipikado a miembro ti sabali a relihion. Nangorganisar ti gobierno iti panangsanay kadagiti mayat a mangala iti lisensia. Nangpili ti sanga nga opisina iti Dominican Republic iti 30 a panglakayen nga agsanay. Iti nasurok a 2,000 a mayat a mangala iti lisensia, 32 laeng ti naikkan. Ngem naikkan ti 30 a kakabsattayo iti lisensia a mangkasar kadagiti Saksi.

 INDIA Determinado a Mangasaba

Ni Sundeep ken ni Deepalakshmi Muniswamy

Idi Enero 27, 2014, inkeddeng ti State Human Rights Commission iti Karnataka a sinalungasing ti Police Sub-Inspector (PSI) iti Old Hubli Police Station ti kalintegan ni Brother Sundeep Muniswamy gapu ta saan a sinalakniban ti PSI ti kabsat idi rinaut dagiti tattao idi Hunio 28, 2011. Imbaga ti Komision a manungsungbat ti PSI iti pannakasalungasing ti kalintegan ti  kabsat. Imbilin pay ti Komision ti gobierno ti Karnataka a disiplinaenda ti PSI ken bayadanna ni Brother Muniswamy iti 20,000 rupees ($326 U.S.). Imbilin ti Komision nga ikissay ti gobierno dayta iti sueldo ti PSI.

Agyamyaman ken Jehova da Brother Muniswamy ken ti pamiliana iti daytoy nagpateg a desision. Determinadoda met nga agtultuloy a mangikasaba iti naimbag a damag. Gapu iti dayta a desision, bimmileg ti pammati ken panagtalek dagiti kakabsat a kabaelan ni Jehova a salakniban ti ilina. Ipakita met dayta a desision a masapul a salakniban ti gobierno ti kalintegan dagiti Saksi ni Jehova iti Karnataka. Adda pay laeng iti korte ti kaso ni Brother Muniswamy ken ti maysa pay a kabsat mainaig iti isu met laeng a pasamak.

KYRGYZSTAN Binigbig ti Constitutional Chamber iti Supreme Court ti Kalintegan Dagiti Kakabsat nga Agkedked Gapu iti Konsiensia

Nakapatpateg nga aldaw ti Nobiembre 19, 2013 para kadagiti agkedked nga agsoldado gapu ta saan nga ipalubos ti konsiensiada. Nangipaulog ti Constitutional Chamber iti Supreme Court iti desision mainaig iti kaso dagiti 11 a Saksi ni Jehova ken inkeddengna a saan a maitunos iti konstitusion ti programa nga alternatibo a serbisio iti Kyrgyzstan. Sigun iti linteg, masapul nga agbayad iti militar dagiti agtrabaho iti alternatibo a serbisio tapno masuportaran ti aktibidad dagiti soldado. Kasta met, masapul nga agpalistada kas reserba a soldado no nalpasen ti makalikaguman a panagserbida iti alternatibo a serbisio. Inkeddeng ti Constitutional Chamber a dagita ket pananglabsing iti kalintegan dagiti kakabsat a mangalagad iti relihionda. Iti umuna a bulbulan ti 2014, impatungpal ti Supreme Court ti Kyrgyzstan ti desision ti Constitutional Chamber ket naabsuelto ti kaso dagiti 14 a Saksi ni Jehova mainaig iti programa nga alternatibo a serbisio. Gapuna, nalpas met laengen ti pito a tawen a panangilaban dagiti agkedked  nga agsoldado iti kalinteganda a mangalagad iti relihionda. Naidaydayaw ti nagan ni Jehova ken nabigbig ti kalintegantayo nga agdaydayaw iti Kyrgyz Republic gapu iti determinasion dagiti mannakikappia nga agtutubo.

Kyrgyzstan: Dagiti Saksi a nayuli ti kasoda iti kangatuan a korte ti Kyrgystan

NIGERIA “Ginunggonaannak ni Jehova”

Iti Abia State iti Nigeria, masansan nga idumduma ken butbutngenda dagiti Saksi ni Jehova gapu ta saanda a kayat ti makiraman iti asosasion dagiti agkakaedad * a masansan a naranggas ken nalaokan iti espiritismo dagiti aktibidadda. Iti maysa nga agsapa idi Nobiembre 2005, dagiti miembro ti asosasion iti Asaga Ohafia sinerrekda ti balay da Brother Emmanuel Ogwo ken ti asawana ket innalada amin a sanikuada kas bayad ti inkapilitan a pannakimiembroda. Dagiti laeng nakasuot  a badoda ti nabati a sanikuada. Idi 2006, pinapanawda ni Brother Ogwo iti balayna ken iti purokda. Nagkamang dagiti agassawa iti balay ti maysa a kabsat iti sabali a purok ken naipaay dagiti kasapulanda. Nupay nakasubli met laeng ni Brother Ogwo iti balayna iti simmaganad a tawen, nagtultuloy latta ti panangpilitda kenkuana a makimiembro iti asosasion, ken saanda latta nga insubli dagiti sanikuana.

Idi Abril 15, 2014, nangipaulog met laengen ti Abia State High Court iti desision a pabor ken ni Brother Ogwo. Nabigbig ti kalinteganna a mangalagad iti relihionna ken makikadua kadagiti tattao sigun iti konstitusion. Naisubli met ti innalada a sanikuana, saan unayen a maidumduma dagiti Saksi, ken nawayan a mangasaba dagiti kakabsat iti Asaga Ohafia.

Idi naipakaammon ti desision ti korte, kinuna ni Brother Ogwo: “Urayak la napalagto iti ragsakko. Ammok a ni Jehova ti nangpangabak iti daytoy a kaso ken tinulongannak dagiti anghel. Ginunggonaannak ni Jehova.”

RUSSIA Desision a Pabor iti jw.org

Ad-adda a nagsaknap ti naimbag a damag iti Russia gapu iti adu a kaso iti korte a pakaipaspasanguan dagiti kakabsattayo sadiay. (Fil. 1:12) Nupay nakaro ti panangbusor ti dadduma nga opisial ti gobierno ken lider ti relihion iti panagdaydayawtayo, nagtalinaed a matalek dagiti kakabsattayo iti Russia ket bembendisionan ni Jehova ti panagreggetda.

Ti maysa a pakakitaan iti dayta ket ti panangabaktayo iti korte iti siudad ti Tver’. Idi 2013, ti abogado ti gobierno ti Tver’ imbagana iti korte nga iparitda ti panagusar iti jw.org iti intero a Russia. Uray no saan a napakaammuan ti asinoman a mangitakder kadagiti Saksi ni Jehova iti pannakabista ti kaso, nangipaulog ti korte iti desision a pabor iti abogado ti gobierno. Nagapelar dagiti kakabsat idi naammuanda ti desision ti korte. Idi Enero 22, 2014, winaswas ti Regional Court ti Tver’ ti  desision ti nababbaba a korte ken pinaboranna dagiti Saksi. Pagyamanan ken Jehova ken kadagiti kararag dagiti kakabsat iti intero a lubong. Us-usaren manen ti kaaduan a kakabsattayo iti Russia ti jw.org ket adu a naespirituan a pagsayaatan ti maipapaayna kadakuada.

TURKEY Saan Latta a Mabigbig ti Kalintegan iti Panagkedked nga Agsoldado Gapu iti Konsiensia

Naibalud iti nasurok nga uppat a tawen ni Bariş Görmez a maysa kadagiti Saksi ni Jehova iti Turkey gapu ta saanna a kayat ti agsoldado. Bayat ti pannakaibaludna, kinugkugtaran ken pinangpang-or dagiti polis ti militar. Marigrigatan pay iti seldana. Agtayag ngamin ni Brother Görmez iti nasurok a dua a metro, isu a kapilitan nga agkukot a maturog iti dua a kama. Ngem idi agangay, impalubos ti opisial iti pagbaludan nga usarenna ti dakdakkel a kutson nga inted ti kongregasion iti lugarda.

Idi 2008, nagdarum ni Brother Görmez ken ti tallo pay a Saksi iti European Court of Human Rights. Imbagada a sinalungasing ti Turkey ti kalinteganda a mangalagad iti relihionda ta saan a nabigbig ti kalinteganda nga agkedked nga agsoldado. Idi Hunio 3, 2014, nangipaulog ti Korte iti desision a pabor kadagiti uppat a Saksi. * Imbilin ti Korte nga agbayad ti gobierno ti Turkey iti danios ken isublida ti nagastos dagiti kakabsat. Daytoyen ti maikatlo a desision ti European Court a pabor kadagiti Saksi ni Jehova ken maikontra iti Turkey maipapan iti panagkedked nga agsoldado. Nupay awanen ti nakabalud a Saksi ni Jehova iti Turkey saan latta a maisardeng daytoy nga isyu agingga a bigbigenen ti Turkey ti kalintegan dagiti agkedked nga agsoldado gapu ta saan nga ipalubos ti konsiensiada.

 Kabaruan a Damag Kadagiti Napalabas a Report

Azerbaijan: Mapaspasaran latta dagiti kakabsat ti panangraut dagiti polis kadagiti gimong, pannakaiparit dagiti literaturatayo, pannakaaresto bayat a mangaskasabada, ken dadduma pay a pananglabsing iti kalinteganda. Agingga ita, saan pay nga impalubos ti gobierno a mairehistro ti relihion a Saksi ni Jehova. Addan 19 a kaso a nayuli iti European Court of Human Rights kontra iti Azerbaijan mainaig kadagita. Iti laksid dagita a problema, nalawag a bembendisionan ni Jehova dagiti kakabsat gapu iti umad-adu a bilangda. Ad-adda manen a naragsakanda idi nairuar ti kompleto a New World Translation of the Holy Scriptures iti Azerbaijani.

Eritrea: Matalek latta nga agserserbi ken Jehova dagiti kakabsat iti dayta a pagilian uray ib-ibturanda ti nakaro a pannakaidadanes. Dagiti kakabsat a da Paulos Eyassu, Isaac Mogos, ken Negede Teklemariam ket nasuroken a 20 a tawen a nakabalud manipud pay idi Septiembre 24, 1994. Inaresto ti agtuturay iti Eritrea ti 150 a Saksi ken interesado idi Abril 14, 2014 bayat ti Pananglaglagip iti ipapatay ni Kristo. Agtawen iti 16 a bulan agingga iti nasurok a 85 dagiti naaresto. Agarup 30 pay a Saksi ken interesado ti inarestoda bayat ti espesial a palawag idi Abril 27, 2014, ngem adu kadakuadan ti nawayawayaan.

Kazakhstan: Saan nga impalubos ti Agency for Religious Affairs a maiserrek wenno maiwaras ti 14 a publikasiontayo iti sakup ti Republic of Kazakhstan. Saan met a nawaya dagiti kakabsat a mangasaba iti ruar ti nairehistro a lugar a pagdaydayawanda, ken agarup 50 a kakabsat ti naidarum ta illegal kano ti aktibidadda kas misionero. Tapno mailabanda ti wayawayada a mangyebkas iti kapanunotanda, nayuli ti 26 a darum iti United Nations Human Rights Committee.

^ par. 1 Ti panangaramid wenno saan iti alternatibo a serbisio ket depende iti konsiensia.

^ par. 1 Ti asosasion dagiti agkakaedad ket kaadduanna a lallaki dagiti miembrona ken agkakaedadda nga agnanaed iti maymaysa a purok.

^ par. 2 Buldu and Others v. Turkey, No. 14017/08, June 3, 2014.

Ammuem ti Ad-adu Pay

Apay a Saan a Makiramraman iti Politika Dagiti Saksi ni Jehova?

Pangta kadi ida iti seguridad ti pagilian?