Accessibility setting

Agpili iti lengguahe

Mapan iti segundario a pagpilian

Mapan iti listaan dagiti linaonna

Mapan iti linaonna

Dagiti Saksi ni Jehova

Iloko

2015 Tinawen a Libro Dagiti Saksi ni Jehova

 DAGITI TAMPOK ITI NAPALABAS A TAWEN

Damdamag iti Intero a Lubong

Damdamag iti Intero a Lubong

Inranudda Dagiti In-download-da

Nupay saan pay a nasaknap ti panagusar iti Internet iti Cuba, adda dagiti shop a kukua ti maysa a kompania ti telepono a mabalin a pangusaran iti Internet, ngem nakanginngina. Gapuna, imparegta ti sangay a mangyurnos dagiti kongregasion iti maysa a kabsat a mangi-download kadagiti publikasion, rekording, ken video iti jw.org sa iranudda kadagiti kakabsat tapno magunggonaanda. Nagsayaat daytoy nga urnos.

 Napatpateg ti Kingdom Hall Ngem iti Selpon

Taga-Republic of Georgia da Teona nga agtawen iti 10 ken ti adingna a ni Tamuna nga agtawen iti walo. Kayatda ti maaddaan iti selpon isu nga inkari ti lolada nga inton maawatna ti pensionna, ikkannanto ida iti igatangda. Ngem di ninamnama a natay ti lolada. Nupay kasta, naited latta kadagiti ubbing ti maudi a pension ni lolada tapno magatangda ti selpon a kayatda. Nakapagpampanunot dagiti ubbing ket nagsuratda iti kongregasion: “Dua a lawas laengen ket agibangontayon iti Kingdom Hall ditoy T’erjola. Kayat ni lolami ti tumulong isu nga itedmi laengen iti kongregasion ti pensionna imbes nga igatangmi iti selpon. Pangngaasiyo ta mangibangonkayo iti napintas a Kingdom Hall!”

Griego a Kasuratan iti Lengguahe a Tetum

Idi Enero 17, 2014, iti Dili, Timor-Leste, inruar ni Geoffrey Jackson a miembro ti Bagi a Manarawidwid ti New World Translation of the Christian Greek Scriptures iti lengguahe a Tetum, ti kangrunaan a lengguahe iti pagilian. Iti naglabas, ti laeng relihion a Katoliko ti mangyim-imprenta ken mangiwarwaras iti Griego a Kasuratan iti Tetum, ket saanda a kayat a lakuan dagiti Saksi ni Jehova wenno dagiti pagarupda a makipagad-adal kadagiti Saksi. Nupay kasta, adu ti di umiso ti pannakaipatarusna, naikkat ken saanen a maus-usar a sasao, ken kamali iti pannakayimprentana. Ngem kastoy ti komento ni Darren a misionero iti Timor-Leste maipapan iti New World Translation: “Maap-apresiar ti adu a Timorese ti kinaumiso ti pannakaipatarus ti New  World Translation, ket nagorderda a dagus iti kopiada. Nalaka a basaen, ken magustuanda ta dadakkel ti letrana, nangruna ta nasipnget iti uneg ti kaaduan a balay. Adu kadagiti nangala iti kopiada ti makipagad-adalen iti Biblia.”

‘Ipatpategnak ni Jehova’

Macedonia: Panangasaba babaen kadagiti publikasion iti Romany

Idi Enero 2014, rimmang-ay ti trabaho a panagipatarus iti Romany, ti lengguahe a maus-usar iti Macedonia. Nabukel ti permanente a grupo dagiti agipatpatarus ken naaprobaran a maipablaak dagiti publikasion iti daytoy a lengguahe iti Roman script ken Cyrillic. Adu ti maitulong daytoy kadagiti agsasao iti Romany nga ad-adda nga agus-usar iti Cyrillic, ti kangrunaan a wagas ti panagsurat iti Macedonia.

Naragsakan ti adu kadagiti agsasao iti Romany gapu ta mangipapaay ti organisasion ni Jehova kadagiti literatura iti bukodda a lengguahe. Kinuna ti maysa a  sister: “Kas maysa kadagiti agsasao iti Romany, masansan nga uy-uyawendak dagiti sabali a puli isu nga agyamyamanak ken Jehova ta nangipaay iti literatura iti bukodko a lengguahe. Ipatpategnak ni Jehova. Ad-adda manen a simmingedak kenkuana.”

“Agyamyamanak ken Jehova ta nangipaay iti literatura iti bukodko a lengguahe. Ipatpategnak ni Jehova”

Sabalin ti Mangiwanwan

Idi Pebrero 1, 2014, iwanwanwanen ti sanga nga opisina iti United States dagiti teritoria ken kongregasion iti Jamaica ken iti Cayman Islands. Nagsayaat la ketdin ti panagkaykaysa ti nasurok a 1.2 a milion nga agibumbunannag iti teritoria ti sanga nga opisina ti United States! Karaman dita ti 50 nga estado ti U.S., Bahamas, Bermuda, British ken U.S. Virgin Islands, Puerto Rico, ken ti Turks and Caicos Islands.

Dagiti Payunir iti Japan

Nakaregregta latta dagiti kakabsat iti Japan, ket ti bilang dagiti payunir iti dayta a pagilian ti maikapat a kaaduan iti intero a lubong. Idi rugrugi ti 2014 a tawen serbisio, 2,646 ti nagpayunir isu nga addan 65,668 a payunir iti Japan. Idi Marso 2014, nasurok a kagudua kadagiti agibumbunannag ti nakiraman iti panagpayunir.