Mapan iti linaonna

Mapan iti segundario a pagpilian

Mapan iti listaan dagiti linaonna

Dagiti Saksi ni Jehova

Iloko

2014 Tinawen a Libro Dagiti Saksi ni Jehova

 SIERRA LEONE KEN GUINEA

1991-2001 Maysa nga “Urno ti Rigat”—Isa.48:10 (Paset 1)

1991-2001 Maysa nga “Urno ti Rigat”—Isa.48:10 (Paset 1)

 Gerra Sibil

Bayat ti dekada 1980, nariribuk ti kasasaad ti intero a West Africa gapu kadagiti problema iti kagimongan, politika, ken ekonomia. Idi dinadael ti gubat ti kaarrubana a Liberia, adu ti nagkamang iti Sierra Leone. Nangyurnos ti sanga nga opisina kadagiti pagtaengan ken Kingdom Hall a pagdagusan dagiti nagbakuit a Saksi, ket impaay dagiti kakabsat ti kasapulanda.

Nupay narigat ti kasasaad dagiti nagbakuit, adda dagiti nakaay-ayat a kapadasanda. Insalaysay ti maysa a nabayagen a misionero a ni Isolde Lorenz: “Maysa nga ubing ti imbaon ni tatangna a mapan agidadang iti makan iti dalikan nga adda iti likud ti Kingdom Hall. Adda daytoy iti lote ti sanga nga opisina. Idi nagsubli ti ubing, imbagana ken tatangna nga awan ti kanenda iti daydi nga aldaw. Dinamag ti ama no apay. ‘Gapu ta ita nga aldaw,’ kuna ti ubing, ‘insalakannak ni Jehova manipud iti ngiwat ti leon!’ Ania ti napasamak? Idi agawiden ti ubing, nasabatna ni Lobo, ti dakkel ngem naamo nga aso a kukua ti sanga nga opisina. Kasta unay ti buteng ti ubing isu nga inyunnatna a permi ti imana a nakaiggem iti sangapinggan a makan tapno bugawenna ni Lobo. Impagarup met ni Lobo nga it-ited ti ubing ti makan isu a kinnan dayta ti aso!”

Idi Marso 23, 1991, ti gubat iti Liberia ket dimmanon iti Sierra Leone a nangrugian ti 11 a tawen a gerra sibil. Adda grupo dagiti rebelde a maaw-awagan iti Revolutionary United Front (RUF) nga alisto a nakadanon iti Kailahun ken Koindu isu a kaaduan nga umili ti nagkamang iti  Guinea, a pakairamanan ti agarup 120 a kakabsat. Kabayatanna, dadduma a nagbakuit a Saksi a taga-Liberia ti immun-una a nakadanon iti Sierra Leone ngem kadagiti rebelde.

“Iti sumagmamano a bulan, nagsangpet iti Freetown Bethel dagiti nabambannog, nakukuttong, ken mabisbisin a kakabsat,” kuna ni Billie Cowan a koordineytor ti Branch Committee idi a tiempo. “Adu ti nakakita kadagiti nakaro a kinaranggas ken nangnanganda kadagiti mula iti bakir tapno saanda a mabisinan. Dagus nga inikkanmi ida iti makan ken kawes agraman kasapulan dagiti kakabagian ken interesado a kakaduada. Dagiti lumugar a kakabsat naimpusuan a pinadagusda ida kadagiti pagtaenganda. Dagiti met nagbakuit a kakabsat dagus a nakiramanda iti panangasaba ken timmulongda kadagiti kongregasion ditoy. Kaaduan kadakuada ti immakar idi agangay, ngem pinabpabilegdakami bayat ti kaaddada!”

Nagpasar ti Sierra Leone iti 11 a tawen a gerra sibil

Panangipaay iti Liwliwa ken Namnama

Nangipatulod ti sanga nga opisina kadagiti taraon, agas, materiales a pagibangon, alikamen, ken masapsapul dagiti Saksi a nagbakuit iti makin-abagatan a Guinea. Nagadu a kawes ti indonar ti France. “Agsasala ken agkakanta dagiti annakko ken idaydayawda ni Jehova,” insurat ti maysa nga ama. “Addaandan kadagiti baro a kawes a pakigimong!” Kuna ti dadduma a kakabsat nga idi laeng a makabadoda iti kasdiay kapipintas!

Ngem saan laeng a material a banag ti kasapulan dagiti nagbakuit. Kuna ni Jesus: “Ti tao agbiag, saan nga iti tinapay laeng, no di ket iti tunggal sao a rumrummuar iti ngiwat ni Jehova.” (Mat. 4:4) Isu a nangipatulod ti sanga nga opisina kadagiti literatura iti Biblia ken nangorganisar  kadagiti regular nga asamblea ken kombension. Nangibaon pay kadagiti payunir ken agdaldaliasat a manangaywan.

Idi bimmisita ti manangaywan iti sirkito a ni André Baart iti Koundou, Guinea, naam-ammona ti maysa nga opisial ti kampo a nangawis kenkuana a mangipaay iti naibatay-Biblia a palawag kadagiti nagbakuit. Agarup 50 a tattao ti dimngeg iti palawag ni André a natemaan iti “Agkamangkayo ken Jehova,” a naibatay iti Salmo 18. Idi nalpas ti palawagna, timmakder ti maysa a baket ket kinunana: “Pinaragsaknakami unay. Saan nga innapuy ti makasolbar kadagiti problemami, ngem ipakita ti Biblia no kasano a manginanamakami iti Dios. Naimpusuan nga agyamankami iti impaaymo a liwliwa ken namnama.”

Idi naibaon iti Guékédou, Guinea dagiti misionero a da William ken Claudia Slaughter, nasged iti espiritu ti kongregasion a buklen ti nasurok a 100 a nagbakuit. (Roma 12:11) “Adu nga agtutubo a lallaki ti rumagragpat kadagiti pribilehio,” kuna ni William. “No adda saan a makaiparang iti pasetna iti Teokratiko nga Eskuelaan ti Panagministro, 10 agingga iti 15 nga agtutubo a lallaki ti agboluntario a mangisandi. Dadakkel a grupo dagiti nareregta a mangaskasaba. Dadduma kadagidi a nareregta nga agtutubo a lallaki ti nagbalin nga special pioneer ken agdaldaliasat a manangaywan.”

Panagibangon Bayat ti Riribuk

Di nagbayag kalpasan a nangrugi ti gerra sibil, gimmatang dagiti kakabsat iti Freetown iti nasurok a kagudua ektaria a lote iti 133 Wilkinson Road, sumagmamano a gasut a metro ti kaadayona iti sanga nga opisina. “Kayatmi ti mangibangon ditoy iti baro a Bethel ngem madama met ti  gubat,” kuna ni Alfred Gunn. “Yantangay binisitanakami idi ni Lloyd Barry a kameng ti Bagi a Manarawidwid, imbagami kenkuana ti pakaseknanmi. Kinunana, ‘No ipalubostayo a lapdannatayo ti gubat, awanto a pulos ti maileppastayo!’ Dagita a makagutugot a sasao ti nangpatured kadakami a mangituloy iti planomi.”

Ginasut a kakabsat ti nagtrabaho iti dayta a proyekto a pakairamanan ti nasurok a 50 a boluntario manipud iti 12 a pagilian ken adu ti sidadaan a timmulong manipud kadagiti lokal a kongregasion. Nairugi ti trabaho idi Mayo 1991. “Nasdaaw dagiti agpalpaliiw kadagiti de kalidad a bloke a naaramid iti mismo a pagibangonan. No idilig kadagiti pasdek ditoy, naidumduma daytoy gapu ta metal dagiti nausar a balabalana,” kuna ti manangaywan iti panagibangon a ni Tom Ball. “Ngem ad-adda pay a nasdaawda iti sangsangkamaysa ken naragsak a panagtrabaho dagiti puraw a ganggannaet ken dagiti nangisit a lumugar.”

Idi Abril 19, 1997, siraragsak a nagtataripnong dagiti tattao a nagduduma ti pulida para iti pannakaidedikar ti baro a pasilidad ti sanga nga opisina. Iti simmaganad a bulan, kalpasan ti lima a tawen a gerra sibil, rinaut ti RUF ti Freetown.

Ti maibangbangon a sanga nga opisina iti Freetown; ti sanga nga opisina ita

Gubat iti Freetown

Rinibu nga RUF ti simrek iti siudad tapno agtakaw, agrames, ken agpapatayda. Nalampongda ken adda nalabaga a bedbed iti uloda. “Talaga a makapadanag ti kasasaad,” kuna ni Alfred Gunn. “Kaaduan a ganggannaet a misionero ti insigida a naibakuit. Ti naudi a pimmanaw ket da Billie ken Sandra Cowan, Jimmie ken Joyce Holland, sa dakami ken Catherine.

“Nagkararagkami a kadua dagiti lumugar a Bethelite a nagboluntario nga agbati, sa nagdardaraskamin a napan iti pagbakuitan. Iti dalan, pinasardengdakami dagiti agarup 20 a nakabutbuteng ken nabartek a rebelde a soldado. Pinalubosandakami  idi inikkanmi ida kadagiti magasin ken kuarta. Nasurok a 1,000 a nagbakuit ti nadanonmi iti naaladan a checkpoint a bambantayan dagiti armado a soldado ti U.S. Naglugankami iti helikopter ti militar ket impannakami a dagus iti nakasanglad a barko ti U.S. Navy. Imbaga kadakami ti maysa nga opisial ti barko idi agangay a ti grupomi a sibilian ti kaaduan pay laeng a naibakuit ti U.S. Navy kalpasan ti Vietnam War. Kabigatanna, naghelikopterkami a napan iti Conakry, Guinea. Sadiay a nangaramidkami iti temporario a sanga nga opisina.”

Karaman da Alfred ken Catherine Gunn kadagiti naibakuit

Magaggagaran dagiti misionero a nagur-uray iti damag manipud iti Freetown. Kamaudiananna, simmangpet ti maysa a surat a naglaon iti: “Uray nariribuk ditoy, agiwarwaraskami latta iti Kingdom News Num. 35, ‘Addanto Ngata Tiempo nga Agiinnayat Amin a Tattao?’ Talaga nga ipangpangag dagiti tattao ti mensahe, ken adda pay dagiti rebelde a makipagad-adalen kadakami. Isu a determinadokami nga agbalin a naregregta pay a mangasaba.”

Malagip ni Jonathan Mbomah a manangaywan idi iti sirkito: “Nangangaykami pay iti espesial nga asamblea iti Freetown. Talaga a makaparegta ti programa isu nga inangaymi met dayta iti Bo ken Kenema. Agyamyaman ken Jehova dagiti kakabsat kadagiti ili a dinadael ti gubat gapu iti nagsayaat a naespirituan a taraon.

“Iti maudi a paset ti 1997, nangangaykami iti kombension distrito iti National Stadium ti Freetown. Iti maudi nga aldaw ti programa, simrek dagiti rebelde a soldado iti istadium ket imbagada a pumanawkami. Impakaasimi a palpasenmi pay ti programa. Kalpasan ti napaut a panagsasarita, pinalubosandakami met laeng ket pimmanawdan. Nasurok a 1,000 ti timmabuno, ken 27 ti nabautisaran. Inulit ti sumagmamano a kakabsat ti nakikombension idiay Bo uray napeggad ti panagbiahe. Anian a nagsayaat ken makapagagar dagidi a kombension!”