Mapan iti linaonna

Mapan iti segundario a pagpilian

Mapan iti listaan dagiti linaonna

Dagiti Saksi ni Jehova

Iloko

2014 Tinawen a Libro Dagiti Saksi ni Jehova

 SIERRA LEONE AND GUINEA

Tinulongannak ni Jehova

Jay Campbell

Tinulongannak ni Jehova
  • NAYANAK 1966

  • NABAUTISARAN 1986

  • ABABA A PAKASARITAANNA Addaan iti polio a nagbalin a regular pioneer.

DIMMAKKELAK a paralisado ti bagik manipud siket agingga iti dapan. Nagnaedkami ken nanangko iti maysa a compound iti Freetown nga ayan ti dadduma pay a napanglaw a pamilia. Iti 18 a tawen, naminsan laeng a rimmuarak iti compound gapu ta mabain ken maamakak iti mabalin nga ibaga kaniak dagiti tattao.

Idi agtawenak iti 18, simrek iti compound-mi ti maysa a misionera a Saksi a ni Pauline Landis ket imbagana a yadalannak iti Biblia. Idi imbagak a diak ammo ti agbasa ken agsurat, kinunana nga isuronak pay isu a nagpayadalak.

Maragragsakanak kadagiti maad-adalko iti Biblia. Maysa nga aldaw, dinamagko ken Pauline no mabalinko ti tumabuno iti maysa a gimong iti balay nga adda iti sumaruno a kanto. “Usarek dagitoy dua a bloke ti kayo a mapan sadiay,” kinunak.

Idi dinagasnak ni Pauline, madandanagan ni nanangko ken dagiti kaarrubami a mangbuybuya kaniak. Pinetpetak dagiti bloke a kayo a katulongak a magna, sa insammakedko dagita  iti daga tapno maingatok ti bagik ket makaaddangak. Idi addaakon iti paraangan, impukkaw dagiti kaarrubami ken ni Pauline: “Apay a pilpilitem? Pinadasna ti nagna idin ngem dina kabaelan.”

“Jay, kayatmo kadi ti umay?” siaalumamay nga insaludsod ni Pauline.

“Wen!” insungbatko. “Desididoak nga umay.”

Nakaul-ulimek dagiti kaarrubami a mangbuybuya kaniak agingga a nakadanonak iti ruangan. Idi nakaruarakon iti compound, nagiikkisda.

Nagustuak ti gimong! Sipud idin, determinadoakon a mapan iti Kingdom Hall. Kaipapanan dayta ti “pannagna” agingga iti ungto ti kalsada, panaglugan iti taxi, ken panangbagkat kaniak dagiti kakabsat iti nasang-at a turod. Masansan a sumangpetak a nabasa ken pitakpitak isu nga agsukatak iti paggigimongan. Idi agangay, pinatulodannak iti wheelchair ti maysa a nasingpet a kabsat a babai iti Switzerland isu a nanamnam-ayen ti “pannagnak.”

Gapu kadagiti nabasak a kapadasan ti dadduma a baldado a kakabsat, naparegtaak a naan-anay nga agserbi ken Jehova. Idi 1988, nagbalinak a regular pioneer. Inkararagko ken Jehova a tulongannak a mangragpat iti kalatko—adda koma matulongak iti teritoriami ken iti pamiliami nga agbalin nga adipen ni Jehova. Nasungbatan dagiti kararagko idi natulongak ti dua a kaanakak ken maysa a babai a nakasabaak iti kalsada nga immawat iti kinapudno.

Ita, awanen ti pigsa dagiti imak isu nga addan mangiduron iti wheelchair-ko. Agpaspasarak pay iti nakaro nga ut-ot. Ngem ti maysa a remedio ti ut-ot ket ti panangisurok iti sabsabali maipapan ken Jehova. Ti rag-o a mariknak ti mangep-ep iti ut-ot ken mangliwliwa kaniak. Talaga a tinulongannak ni Jehova, ket makapnek itan ti biagko.