Accessibility setting

Agpili iti lengguahe

Mapan iti segundario a pagpilian

Mapan iti listaan dagiti linaonna

Mapan iti linaonna

Dagiti Saksi ni Jehova

Iloko

2014 Tinawen a Libro Dagiti Saksi ni Jehova

 SIERRA LEONE AND GUINEA

1945-1990 ‘Panangyeg Kadagiti Adu iti Kinalinteg’—Dan. 12:3. (Paset 4)

1945-1990 ‘Panangyeg Kadagiti Adu iti Kinalinteg’—Dan. 12:3. (Paset 4)

Panangisuro nga Agbasa ken Agsurat

Idi rugrugi ti 1963, bayat ti maikadua nga ibibisita ni Milton Henschel iti Sierra Leone, inasikasona ti maysa a problema a medio nabayagen a solsolbaren ti sanga nga opisina. Indagadagna a masapul nga ad-adda pay a reggetanda nga isuro dagiti kakabsat nga agbasa ken agsurat.

Adda dagiti kongregasion a mangang-angay kadagiti klase a mangisuro iti panagbasa ken panagsurat iti Ingles. Ngem kalpasan ti ibibisita ni Brother Henschel, insuro dagiti kakabsat dagiti estudiante nga agbasa ken agsurat iti nakayanakanda a pagsasao. Dadduma a kongregasion ti mangang-angay iti klase iti dua wenno tallo a pagsasao. Nakalatlatak dagitoy a klase nga uray la a nagadu ti agibumbunannag a nagpasalista.

Idi 1966, nangaramid dagiti kakabsat iti Liberia iti libro a Kisi nga aduan iti ladawan a pagsursuruan nga agbasa. Impakitada daytoy a libro kadagiti opisial ti gobierno ti Liberia. Nagustuan dagiti opisial ket inkeddengda a yimprenta ken iwaras a libre. Naibunong ti libro iti Guinea, Liberia, ken Sierra Leone, ket nakatulong iti ginasut nga agsasao iti Kisi tapno makasursuroda nga agbasa ken agsurat. Idi agangay, napasayaat wenno natulad dagiti libro para iti dadduma a lengguahe isu nga ad-adu pay ti nakasursuro nga agbasa ken agsurat.

Tapno mairekord ni Sia ti maar-aramidanna iti ministerio, agusar iti nangisit ken nalabaga a tali

Iti klase, saan laeng a masursuruan dagiti tattao nga agbasa ken agsurat. Natulonganda pay a rumang-ay iti naespirituan. Kas pagarigan, ni Sia Ngallah a maysa a di bautisado nga agibumbunannag ken agtawen iti 50 ket dina  ammo ti agbasa ken agsurat. Tapno mairekordna ti maar-aramidanna iti ministerio, agusar iti nangisit ken nalabaga a tali. Kalpasan ti maysa nga oras a panangasaba, siglotenna iti maminsan ti nangisit a tali. Kalpasan ti panagsarungkarna, siglotenna met ti nalabaga a tali. Gapu iti itatabunona iti klase iti panagbasa ken panagsurat, mas umiso ti panangirekordnan iti nagapuananna iti ministerio. Rimmang-ay agingga a nabautisaran ket naep-epektibo metten ti panangasaba ken panangisurona.

Agingga ita, adu pay a kongregasion iti Sierra Leone ken Guinea ti mangang-angay kadagita a klase. Maysa a nabayagen nga opisial ti gobierno iti Sierra Leone ti nangibaga kadagiti kakabsat iti sanga nga opisina: “Nagsayaat ti panangtultulongyo kadagiti tattao a makasursuro nga agbasa ken agsurat malaksid iti panangisuroyo iti Biblia.”

Agsao “Dagiti Bato”

Kadagiti nagduduma nga etniko a grupo, umad-adu ti makasursuro nga agbasa isu a dimmakkel ti panagkasapulan iti panagipatarus. Manmano, no adda man, dagiti sekular a pagbasaan a magun-odan iti mismo a lengguahe ti kaaduan a tribu. Makabasa iti Ingles dagiti de adal a taga-Sierra Leone. Makabasa met iti French dagiti de adal a taga-Guinea. Ania ti masapul nga aramiden tapno maaddaanda kadagiti literatura iti Biblia iti bukodda a lengguahe?

Idi 1959, dua a nagraduar iti Gilead ti nangipatarus iti maysa a tract ken bokleta iti pagsasao a Mende, ngem bassit laeng a kopia ti naiwaras. Kalpasan ti 10 a tawen, naipatarus iti Kisi dagiti bokleta a “This Good News of the Kingdom” ken Living in Hope of a Righteous New World.  Dandani 30,000 a bokleta ti naiwaras ken nausar a pangyadal iti Biblia.

Idi 1975, nagipablaak ti sanga nga opisina kadagiti mapagadalan nga artikulo Ti Pagwanawanan iti Kisi. Naragsakan dagiti kakabsat a Kisi! Insurat ti maysa kadakuada: “Nakaskasdaaw ti inaramid ni Jehova agpaay kadakami. Awan ti nakapageskuela kadakami. Kaslakami idi batbato a di makapagsao. Ngem maibagami itan dagiti naindaklan nga ar-aramid ni Jehova ta addan Pagwanawanan a Kisi.” (Luc. 19:40) Adu a sabali pay a publikasion ti naipatarus met iti Kisi.

Adu pay laeng ita a taga-Sierra Leone ken Guinea ti mangbasbasa kadagiti publikasiontayo iti Ingles wenno French, dagiti lengguahe a maus-usar kadagiti gimong ti kongregasion. Ngem iti nabiit, alisto nga immadu dagiti publikasion a maipatpatarus kadagiti lokal a pagsasao. Magun-odanen dagiti literatura ti Biblia iti Guerze, Kisi, Krio, Maninkakan, Mende, Pular, ken Susu. Magun-odan kadagita a pagsasao dagiti broshur nga Umimdengka iti Dios ket Agbiagka nga Agnanayon ken ti Listen to God. Gapu kadagitoy a simple a katulongan iti panangisuro, adu a tattao a di unay makabasa ti matultulongan a mangtarus ken mangipateg kadagiti nakaskasdaaw a mensahe ti Biblia.

Panangibangon iti Sanga nga Opisina

Idi rugrugi ti dekada 1960, nagbirok dagiti kakabsat iti Freetown iti lote a pakaibangonan ti baro a sanga nga opisina. Idi 1965, nakagatangda iti lote iti Wilkinson Road. Maysa dayta kadagiti kasasayaatan a paset ti siudad nga ayan ti balbalay a pakatannawagan iti baybay.

Iti pinal a plano, daytoy napintas a pasdek ket addaan iti Kingdom Hall, pagtaengan dagiti misionero, ken pagopisinaan. Kimmaro ti trapik iti Wilkinson Road ta masansan a bumannayat ti taray dagiti lugan agingga a saanen nga aggaraw gapu ta kayat a kitaen dagiti drayber ken pasahero  ti buya ti maibangbangon a pasdek. Naidedikar daytoy a pasdek idi Agosto 19, 1967. Dandani 300 ti timmabuno iti programa, a pakairamanan dagiti lumugar a nangato ti saadna ken sumagmamano a nabayagen a Saksi a binautisaran ni “Bible” Brown idi 1923.

Sanga nga opisina ken pagtaengan dagiti misionero iti Freetown (1965-1997)

Gapu iti baro a pasdek ti sanga nga opisina, rinaem ti adu a tattao ti trabaho dagiti Saksi ni Jehova. Pammaneknek pay dayta a saan nga umiso ti ibagbaga ti sumagmamano a kritiko ti relihion a saan nga agpaut dagiti Saksi iti Sierra Leone. Ti baro a pasdek ket nalawag a pammaneknek nga agtalinaed dagiti Saksi ni Jehova ditoy.

Pimmardas ti Panagrang-ay Gapu Kadagiti Naregta a Misionero

Kakabsat a mapan mangasaba a magmagna iti napitak a kataltalonan

Sipud katengngaan ti dekada 1970, agtultuloy ti panagsangpet dagiti misionero a nasanay iti Gilead isu a  pimmardas ti panagrang-ay ti trabaho iti Sierra Leone ken Guinea. Adda dagiti nagserbi iti dadduma a pagilian ti Africa ket alistoda a nairuam kadagiti kasasaad iti nakaibaonanda. Dadduma ti agdadamo iti Africa. Kasanoda a makapagbayag iti daytoy a “tanem dagiti puraw a tattao”? Kitaentayo ti dadduma a komentoda.

“Napakumbaba dagiti tattao ken mabisbisinda iti naespirituan. Maragragsakanak no makitkitak a sumaysayaat ti biagda gapu iti kinapudno.”—Hannelore Altmeyer.

“Maysa a karit ti makibagay iti klima ken kadagiti sakit iti tropiko. Ngem makaparagsak ti panangtulong kadagiti nasingpet ti panagpuspusona a tattao nga agserbi ken Jehova.”—Cheryl Ferguson.

“Nasursurok ti agbalin a naanus. Naminsan, dinamagko iti maysa a kabsat a babai no kaano a sumangpet dagiti bisitana, kunana: ‘Mabalin nga ita wenno inton bigat wenno inton maminsan nga aldaw.’ Nadlawna siguro a nasdaawak isu nga impilitna, ‘Ngem sumangpetdanto!’”—Christine Jones.

“Iti pagtaengan dagiti misionero iti Freetown, adda 14 a misionero a nagduduma ti puli ken kulturada. Dua ti kasiliasmi, maymaysa ti banio, washing machine, ken kosinami. Limitado ken saan a nasayaat a klase ti taraonmi. Saan a mapakpakadaan ti panagawan ti koriente—no dadduma, abutenna iti adu nga aldaw. Kaaduan kadakami ti nagmalaria ken naaddaan iti dadduma pay a sakit iti tropiko. Imbes a dagitoy ti nangupay kadakami, nasursuromi ti agsisinnaranay, agpipinnakawan, ken agiinnangaw uray kadagiti narigat a kasasaad. Makaparagsak ti mangasaba, ken simminged ti panaggagayyem  dagiti misionero.”—Robert ken Pauline Landis.

Ni Pauline Landis a mangyad-adal iti Biblia

“Ti kaaddami iti Sierra Leone ti maysa kadagiti kararagsakan a tiempo iti biagmi. Awan ti pagbabawyan ken reklamomi. Kailiwmi unay ti Sierra Leone.”—Benjamin ken Monica Martin.

“Naminsan, imyankami iti balay ti maysa nga interesado a babai. Nangidasar iti karkarna a masida. ‘Uleg daytoy,’ kinunana. ‘Inikkatkon dagiti sangina. Ramananyo!’ Dimi koma kayat ngem impilitna. Nupay narigat dagiti kastoy a kapadasan, inapresiarmi ti kinamanagpadagus dagiti tattao ken ad-adda pay nga impategmi ida.”—Frederick ken Barbara Morrisey.

“Bayat ti 43 a tawenko kas misionero, nasurok a 100 a misionero ti nakaduak. Maysa a pribilehio ti pannakaam-ammok iti kasta kaadu a tattao! Nagduduma ti personalidadmi ngem maymaysa ti panggepmi. Ken anian a ragsak ti panagbalin a katrabahuan ti Dios ken makakita kadagiti tattao nga umawat iti kinapudno ti Biblia!”—Lynette Peters.

“Anian a ragsak ti panagbalin a katrabahuan ti Dios ken makakita kadagiti tattao nga umawat iti kinapudno ti Biblia!”

Sipud 1947, adda 154 a misionero a nagserbi iti Sierra Leone, ken 88 iti Guinea. Adu pay a kakabsat ti immay timmulong iti panangasaba. Ita, adda 44 a misionero iti Sierra Leone ken 31 iti Guinea. Adu ti natulongan gapu iti panagregget ken panagsakripisioda. Kuna ni Alfred Gunn a nabayagen a kameng ti Branch Committee, “Maragragsakankami no malaglagipmi ida.”