Accessibility setting

Agpili iti lengguahe

Mapan iti segundario a pagpilian

Mapan iti listaan dagiti linaonna

Mapan iti linaonna

Dagiti Saksi ni Jehova

Iloko

2014 Tinawen a Libro Dagiti Saksi ni Jehova

 SIERRA LEONE KEN GUINEA

1945-1990 ‘Panangyeg Kadagiti Adu iti Kinalinteg’—Dan. 12:3. (Paset 1)

1945-1990 ‘Panangyeg Kadagiti Adu iti Kinalinteg’—Dan. 12:3. (Paset 1)

 Simmangpet Dagiti Misionero Manipud Gilead

Idi Hunio 1947, simmangpet iti Freetown ti tallo a nagraduar iti Watchtower Bible School of Gilead a da Charles Fitzpatrick, George Richardson, ken Hubert Gresham. Dagitoy ti immuna kadagiti adu a misionero a simmangpet.

Nadlaw dagiti misionero a magagaran a mangasaba dagiti kakabsat ngem masapul nga agbalinda a mas epektibo a mannursuro. (Mat. 28:20) Gapuna, rinugian dagiti misionero nga isuro dagiti kakabsat no kasano a parayrayen ti interes dagiti tattao ken no kasano ti mangyadal iti Biblia. Insuroda met dagiti kabaruan nga instruksion mainaig kadagiti gimong ti kongregasion ken teokratiko nga urnos ti organisasion. Naangay ti palawag publiko iti Wilberforce Memorial Hall. Naragsakan dagiti misionero ta 450 ti timmabuno! Idi agangay, inrugi dagiti misionero ti linawas a Magazine Day. Daytoy a panagsanay ti nangparegta iti kongregasion ken naluktan ti gundaway para iti ad-adu pay nga irarang-ay.

Kabayatanna, marigrigatan dagiti misionero a mairuam iti klima. Kuna ti 1948 a report ti sanga nga opisina: “Nakarigrigat ti klima iti Sierra Leone. Agpaut iti innem a bulan ti panagtutudo. Napigsa, bumayakabak, ken di agsarday, a no dadduma agpaut iti dua a lawas. No kalgaw, makasinit ti pudot ken nakadagdagaang.” Dagiti taga-Europe nga immun-una a pimmasiar iti Sierra Leone inawaganda daytoy a pagilian kas tanem dagiti puraw a tattao. Adu ti nakaptan iti malaria, yellow fever, ken  dadduma pay a sakit iti tropiko. Nagsasaruno a nagsakit dagiti misionero isu a masapul a pumanawda.

Maladingitan dagiti kakabsat iti mapaspasamak ngem saanda a naupay. Idi 1947, adda laeng 38 nga agibumbunannag ngem idi 1952, nagbalinen a 73. Iti ili ti Waterloo nga asideg ti Freetown, timmulong dagiti nagaget a payunir iti pannakabuangay ti baro a kongregasion. Nabukel met dagiti baro a grupo ti panagadal iti Kissy ken Wellington a masarakan iti ruar ti Freetown. Agparang a nakasaganan a rumang-ay ti Sierra Leone. Kasano ngata a posible dayta?

Makaparegta nga Ibibisita

Idi Nobiembre 1952, maysa a natayag ken narapis nga Americano nga agtawen iti nasurok bassit a 30 ti simmanglad iti adu ti taona a pantalan ti Freetown. Isu ni Milton G. Henschel manipud iti sangalubongan a hedkuarter. Malagipna: “Masdaawak a makakita iti moderno a siudad nga adayo a nadaldalus ngem iti adu a siudad iti lubong. . . . Sementado dagiti kalsada, adu ti aggatang kadagiti pagtagilakuan, baro dagiti lugan, ken adu ti aglablabas a tattao.”

Nagna ni Brother Henschel agingga iti pagtaengan dagiti misionero iti Freetown, dua a bloke manipud iti nalatak a Cotton Tree. Impakaammona kadagiti naguummong sadiay a kakabsat nga adda kanayonan a tulong iti Sierra Leone. Iti simmaganad a Domingo, 253 a tattao iti Wilberforce Memorial Hall ti dimngeg kadagiti agsasaruno a makapagagar nga impakaammona: Maaddaan ti Sierra Leone iti bukodna a sanga nga opisina, manangaywan iti sirkito, ken asamblea sirkito; mabuangay ti baro a kongregasion iti Kissy; ken mapalawa pay ti panangasaba kadagiti probinsia. Naragsakan unay ti tallaong!

Kinuna ni Brother Henschel: “Sangkaibagada ti kusheh, a kaipapananna ti ‘nagsayaaten!’ Nakaragragsak dagiti  kakabsat ken rabiin idi agsisinada, . . . agkankanta pay ti dadduma a timmabuno.”

Ti kassangpet a misionero a ni William Nushy ti nadutokan a mangaywan iti baro a sanga nga opisina. Dati nga aglaklako iti baraha ken dice kadagiti casino iti Estados Unidos. Idi nagbalin a Kristiano, insardengna dayta a trabaho ken inannurotna dagiti nalinteg a pagalagadan—maysa a kababalin a nakaigapuan ti panagayat ken panagraem kenkuana dagiti kakabsat iti Sierra Leone.