Accessibility setting

Agpili iti lengguahe

Mapan iti segundario a pagpilian

Mapan iti listaan dagiti linaonna

Mapan iti linaonna

Dagiti Saksi ni Jehova

Iloko

2014 Tinawen a Libro Dagiti Saksi ni Jehova

 SIERRA LEONE KEN GUINEA

1915-1947 Immuna a Tawtawen (Paset 3)

1915-1947 Immuna a Tawtawen (Paset 3)

Agingga Kadagiti Kaadaywan a Paset Dagiti Probinsia

Bumarbara ti regta ti kongregasion ti Freetown maipaay iti kinapudno isu a ‘makumikomda unay iti sao.’ (Ara. 18:5) Inestoria ni Alfred Joseph: “Masansan a mangigalutak iti sangakarton a libro iti dakkel a motorko a Norton. Umangkas iti likudak ni Brother Thomas wenno Sylvester Grant sa mapankami kadagiti bario ken babassit nga ili iti aglawlaw ti Freetown tapno agkambas, kas awagmi idi.”

Agingga idi 1927, masansan a mangasaba dagiti kakabsat iti Freetown ken iti aglawlawna a maaw-awagan iti The Colony. Ngem sipud idi 1928, kada tawen sakbay ti panagtutudo, mangarkila ti kongregasion iti bus a pagluganan a mapan kadagiti probinsia. Dagidiay saan a makapan tumulongda kadagiti magastos kadagita a biahe, nga indauluan ni Melbourne Garber. Dagidiay mapan ket mangasabada kadagiti ili ken purpurok nga agpadaya agingga iti Kailahun ken agpaabagatan agingga iti asideg ti beddeng ti Liberia. Sublianda dagiti interesado tunggal umuna a Domingo ti bulan.

 Iti daydi a tiempo, simmarungkar ni Brother Brown iti West Indies ket nangisangpet iti lugan. Dayta ti maysa a kaunaan a lugan iti Sierra Leone. Adda napigsa a sound system-na a nadisenio a pangasaba iti publiko. Iparada ni Brother Brown ti lugan iti publiko a lugar sa agpatokar kadagiti musika a makaguyugoy kadagiti tattao. Agpalawag iti apagbiit wenno agpatokar iti nairekord a diskurso sa awisenna dagiti tattao a mangala kadagiti literatura ti Biblia. Ti agsasao a lugan—kas pangawagda idi—ket pagdidinnamagan dagiti tattao ken asitganda a denggen dayta.

Panangasaba a situtured

Insaruno ni Brother Brown nga inasikaso dagiti di pay nakaskasabaan a teritoria—ti dadduma a pagilian iti West Africa nga agsasao iti Ingles. Iti maudi a paset ti dekada 1920, rinugianna ti agsasaruno a panagdaliasatna  a mangasaba kadagiti pagilian ti Gambia, Ghana, Liberia, ken Nigeria. Nakasarak ni Brother Brown kadagiti interesado iti kada pagilian, ngem agparang a naisalsalumina ti kaadu ti interesado iti Nigeria. Idi 1930, pinanawanda ti Freetown ket napanda a sangapamiliaan iti Lagos. Sadiay nga intultuloyna nga idauluan ti trabaho ti Pagarian iti West Africa.

Nasurok itan a 500,000 a Saksi ti agserserbi ken Jehova iti West Africa

Idi 1950, kimmapuy ti salun-at ni Brother Brown isu a napilitanda a nagawid idiay Jamaica. Ngem nakaibati iti nagsayaat a pakalaglagipan. Iti unos ti 27 a tawen, nakitada ken baketna ti yaadu dagiti Saksi iti West Africa manipud 2 agingga iti nasurok a 11,000. Literal a nakitada ti kaitungpalan ti padto ni Isaias: ‘Daydiay bassit agbalinto a sangaribu, ket daydiay nagbassitan maysa a mannakabalin a nasion.’ (Isa. 60:22) Kalpasan laeng ti nasurok nga 60 a tawen, maysa itan a “mannakabalin a nasion” ti nasurok a 500,000 a Saksi nga agserserbi ken Jehova iti West Africa.

Naregta Nupay Maparparitan

Idi dimmanon ti Gubat Sangalubongan II iti Africa, nagtalinaed a neutral dagiti adipen ni Jehova iti Sierra Leone. (Mik. 4:3; Juan 18:36) Imbilang ida dagiti Britano nga agtuturay kas rebelde isu a siniimda ti aktibidad dagiti Saksi ken imparitda dagiti literaturada. Dagiti opisial ti Customs iti Freetown kinompiskarda ti maysa a kargamento dagiti literatura sada pinuoran. Naaresto ti dadduma a kakabsat nga addaan kadagiti maiparit a literatura ngem di nagbayag, nawayawayaanda met laeng. *

Intultuloy dagiti Saksi ti nangasaba uray naparitanda.  Inestoria ni Pauline Cole: “Regular a bisbisitaennakami ti maysa a kabsat nga empleado iti barko ket supsuplayannakami a kanayon iti Pagwanawanan. Nagimakiniliakami iti kanayonan a kopia para kadagiti gimong. Nagimprentakami met kadagiti polieto maipapan kadagiti topiko iti Biblia sa inwarasmi iti publiko. Intultuloy dagiti kakabsat a lallaki ti nagpalawag iti publiko ken nagpatokar kadagiti nairekord a diskurso ni Brother Rutherford iti radio, nangnangruna kadagiti adayo a purpurok.”

Nabatad a binendisionan ni Jehova dagidi a panagreggetda. Malagip ni James Jarrett, a nabayagen a panglakayen ken special pioneer: “Bayat ti gubat, agtabtabas iti bato ti trabahok. Adda baket a nangted kaniak iti bokleta a Refugees. Gapu ta adu ti nagbakuit iti Freetown, naginteresak iti paulona. Binasak ti bokleta iti daydi a rabii ket dagus a nabigbigko ti kinapudno. Kabigatanna, binirokko ti baket sa nangalaak kadagiti kopia para iti tallo a kakabsatko a lallaki. Inawatmi nga uppat ti kinapudno.”

Idi nagpatingga ti gubat idi 1945, adda 32 nga agibumbunannag iti Freetown Congregation. Nagtalinaed dagitoy a kakabsat a natarnaw ken aktibo iti naespirituan. Sisasagana ken magagaranda pay a rumang-ay.

Panangyawis Kadagiti Palawag Publiko

Idi Agosto 29, 1945, iti linawas a Gimong ti Serbisio ti Freetown Congregation, napagsasaritaan ti baro a kampania a naipakaammo iti Disiembre 1944 nga Informant (Ti Ministeriotayo iti Pagarian itan). Masapul a mangangay ken yawis ti tunggal kongregasion ti uppat nga agsasaruno a palawag publiko iti “tunggal siudad, ili, ken bario” iti teritoriana. Kada gimong, adda maysa oras a palawag nga iparang ti kabsat a lalaki (agtawen iti 18 wenno nasursurok) a nasanay iti Teokratiko nga Eskuelaan ti Panagministro. Kalpasan ti uppat a gimong, mangyurnos dagiti  kakabsat kadagiti grupo a panangyadal iti Biblia tapno tulonganda dagiti interesado iti tunggal lugar.

Ania ti reaksion dagiti kakabsat iti daytoy baro nga urnos? Kastoy ti naisurat a rekord ti Gimong ti Serbisio ti Freetown Congregation:

Tserman: “Kabaelantayo ngata nga aramiden daytoy baro a kampania?”

Brother 1: “Ditay namnamaen a kas iti kaballigi ti kampania iti America. Naiduma dagiti tattao ditoy.”

Brother 2: “Hustoka.”

Brother 3: “Apay a ditay padasen?”

Brother 4: “Ngem addanto dagiti tumaud a problema.”

Brother 5: “Masapul latta a surotentayo ti panangiwanwan ti organisasion ni Jehova.”

Brother 6: “Amangan no saan nga epektibo iti daytoy a pagilian.”

Sister 1: “Ngem nalawag ti instruksion iti Informant. Padasentayo!”

Kasta ti inaramidda. Manipud kadagiti igid ti baybay iti Freetown agingga iti Bo iti abagatan a daya ken agpa-Kabala iti makin-amianan a tapaw ti kabambantayan, mangangay dagiti kakabsat kadagiti gimong iti eskuelaan, tiendaan, ken balbalay dagiti tattao. Daytoy nga aktibidad ti nangparegta iti kongregasion ket “ti sao ni Jehova nagtultuloy a rimmang-ay ken nagsaknap.”—Ara. 12:24.

Kaskasdi a kasapulan ti teokratiko a pannakasanay dagiti kakabsat. Ket impaay dayta ni Jehova.

^ par. 10 Maipalubos manen dagiti literatura idi 1948.