Accessibility setting

Agpili iti lengguahe

Mapan iti segundario a pagpilian

Mapan iti listaan dagiti linaonna

Mapan iti linaonna

Dagiti Saksi ni Jehova

Iloko

2014 Tinawen a Libro Dagiti Saksi ni Jehova

 SIERRA LEONE KEN GUINEA

1915-1947 Immuna a Tawtawen (Paset 1)

1915-1947 Immuna a Tawtawen (Paset 1)

 Nagsilnag ti Lawag ti Kinapudno

Idi 1915, adda dagiti nagawid a taga-Sierra Leone a naggapu iti England. Nangyawidda kadagiti naibatay-Biblia a literatura isu a nakadanon ditoy ti naimbag a damag. Iti Hulio dayta a tawen, simmangpet iti Freetown ti umuna a bautisado nga adipen ni Jehova. Isu ni Alfred Joseph nga agtawen iti 31 ken taga-Guyana, South America. Nabautisaran iti nasapsapa a paset dayta a tawen iti Barbados, West Indies, ngem adda kontratana nga agtrabaho iti Freetown kas locomotive engineer. Nagnaed ni Alfred iti compound ti tren iti Cline Town, a 3.2 a kilometro manipud iti Cotton Tree iti Freetown. Dagus nga inranudna ti mensahe ti Biblia kadagiti katrabahuanna.

Iti simmaganad a tawen, simmangpet met ni Leonard Blackman a dati a katrabahuan ni Alfred idiay Barbados. Ti nanang ni Leonard a ni Elvira Hewitt ti nakaammuan ni Alfred iti kinapudno. Agkaarruban da Leonard ken Alfred ket regular a naggimongda tapno pagsaritaanda ti Biblia. Nagiwarasda met kadagiti literatura iti Biblia kadagiti gagayyemda ken iti dadduma pay nga interesado a tattao.

Napaliiw da Alfred ken Leonard a ti Freetown ket ‘purawen maipaay iti pannakaani.’ (Juan 4:35) Idi 1923, insurat ni Alfred iti sangalubongan a hedkuarter iti New York: “Adu a tattao ditoy ti interesado iti Biblia. Mabalinyo kadi ti mangibaon iti tumulong kadakuada ken mangparang-ay iti panangasaba iti Sierra Leone?” Kastoy ti naawatna a sungbat: “Addanto ibaonmi!”

Ni William “Bible” Brown ken ni baketna nga Antonia

 “Sumagmamano a bulan kalpasanna, diak ninamnama nga adda umawag kaniak iti maysa a rabii ti Sabado,” kinuna ni Alfred.

“‘Sika kadi ti nagsurat iti Watch Tower Society nga agkidkiddaw kadagiti mangasaba?’ dinamag ti immawag.

“‘Wen,’ insungbatko.

“‘Siak ti imbaonda,’ kuna ti nakapigpigsa a timek.

“Timek dayta ni William R. Brown. Kaduana ni baketna nga Antonia ken ti bassit pay a balasitangda a simmangpet iti dayta nga aldaw, ket nagdagusda iti Gainford Hotel.

“Kabigatanna, adda dakkel a lalaki a nagparang iti ridaw bayat ti linawas a panagadalmi iti Biblia ken Leonard. Isu ni William R. Brown. Napalalo ti regtana iti kinapudno ta kayatna ti agpalawag iti publiko iti sumaganad nga aldaw. Dagus nga inabanganmi ti kadakkelan a pasdek iti Freetown—ti Wilberforce Memorial Hall—ken inyiskediulmi ti umuna kadagiti uppat a palawagna iti rabii ti Huebes.

 “Okupado ti bassit a grupomi a mangipakaammo kadagiti palawag babaen ti diario, polieto, ken panangibaga kadagiti tattao. Dimi ammo no ania ti reaksion dagiti tattao ngem saankami a madanagan. Agarup 500 a tattao ti nangpunno iti pasdek, a pakairamanan ti adu a klero iti Freetown. Napalalo ti ragsakmi!”

Bayat ti maysa oras a palawag, namin-adu a nagkotar ni Brother Brown iti Kasuratan ken nagusar iti slide projector tapno makita iti telon dagiti teksto ti Biblia. Kanayonna met nga impaganetget, “Dayta ti kuna ti Biblia, saan a ni Brown.” Masmasdaaw dagiti agdengdengngeg ken agpalakpakda tunggal adda ibagana a punto. Saan a ti kinalaing ni Brother Brown nga agpalawag ti pagsidsiddaawanda no di ket dagiti makakombinsir a pammaneknekna manipud iti Biblia. Maysa nga estudiante iti seminario nga adda iti tallaong ti nagkuna, “Kabesado ni Mr. Brown ti Bibliana!”

1930

Naallukoy dagiti taga-siudad kadagiti palawag ni Brother Brown isu nga adu ti mapan dumngeg kadagita. Iti simmaganad a Domingo, napumpunno manen ti pasdek kadagiti tattao a dumngeg iti palawagna a “To Hell and Back—Who Are There?” Dagiti nabileg a kinapudno nga indatag ni Brother Brown iti dayta a rabii ti nangtignay uray kadagiti prominente a makimismisa nga agikkat iti relihionda.

Nakaad-adu ti dimngeg iti maikapat ken maudi a palawag a “Millions Now Living Will Never Die,” isu a naikuna ti maysa a taga-Freetown, “Kinanselar dagiti simbaan ti misada iti daydi a rabii gapu ta amin a miembroda ket napan nagdengngeg iti palawag ni Brother Brown.”

Kanayon nga usaren ni Brother Brown ti Biblia kas nakaibatayan ti isursurona isu nga inawagan dagiti tattao iti “Bible” Brown. Nagtalinaed ken limmatak dayta nga awag kenkuana iti intero a West Africa. Impagpannakkel ni William R. Brown dayta a nagan ket inusarna agingga a naturposna ti biagna ditoy daga.