AGARUP 500 a tawenen ti napalabas, maysa a silk-cotton tree (kapasanglay) ti nagtubo ken dimmakkel iti asideg ti sabangan ti Sierra Leone River. Bayat ti 300 a tawen, nasaksian daytoy a kayo ti nakalkaldaang a pasamak. Dagiti awanan-asi a negosiante inluganda iti barko ti agarup 150,000 a lallaki, babbai, ken ubbing tapno ilakoda ida kas tagabo iti ballasiw-taaw.

Ti historikal a Cotton Tree iti Freetown

 Idi Marso 11, 1792, ginasut a nawayawayaan a tagabo manipud America ti naguummong iti sirok ti Cotton Tree tapno rambakanda ti pannakaisublida iti Africa. Iti daydi nga aldaw, nangbuangayda iti ili a mangisimbolo iti nabayagen nga arapaapda—ti Freetown. Nagtultuloy ti panagsangpet dagiti nawayawayaan a tagabo agingga nga addan nasurok a 100 a tribu dagiti Africano iti dayta nga ili. Para kadagitoy a kabbaro nga umili, ti Cotton Tree ti simbolo ti wayawaya ken namnamada.

Dandani 100 a tawenen a mangipapaay dagiti Saksi ni Jehova iti liwliwa kadagiti taga-Sierra Leone maipapan iti namnama a nasaysayaat a wayawaya—ti “nadayag a wayawaya ti annak ti Dios.” (Roma 8:21) Kaipapanan daytoy ti wayawaya manipud pannakaadipen iti basol ken ipapatay inton ti Mesianiko a Pagarian ti Dios yegna ti talna ken pagbalinenna a Paraiso ti daga.—Isa. 9:6, 7; 11:6-9.

Iti napalabas a 50 a tawen, ti sanga nga opisina dagiti Saksi ni Jehova iti Sierra Leone idadauluanna met ti trabaho a panangasaba iti Guinea. Agpaspasar ti Guinea iti problema iti politika, kagimongan, ken ekonomia isu nga adu nga umili ti mangipangpangag iti makaparagsak a mensahe ti Biblia.

Dagiti Saksi ni Jehova iti Sierra Leone ken Guinea ikaskasabada ti naimbag a damag uray no nakaad-adu dagiti lapped. Karaman kadagitoy ti nakaro a kinapanglaw, nairamut a kaugalian, pannakasinasina dagiti tribu, nakaro a kinaranggas, ken adu a tattao ti saan a makabasa ken makasurat. Paneknekan dagiti sumaganad a salaysay a nabileg ti pammati ken debosion dagitoy a nasungdo nga adipen ni Jehova. Sapay koma ta matignay ti pusoyo iti pakasaritaanda ken mapabileg ti pammatiyo iti “Dios a mangipaay iti namnama.”—Roma 15:13.