Accessibility setting

Agpili iti lengguahe

Mapan iti segundario a pagpilian

Mapan iti listaan dagiti linaonna

Mapan iti linaonna

Dagiti Saksi ni Jehova

Iloko

2014 Tinawen a Libro Dagiti Saksi ni Jehova

 SANGALUBONGAN A PANANGASABA KEN PANANGISURO

Dagiti Pagilian ti America

Dagiti Pagilian ti America
  • PAGILIAN 57

  • POPULASION 970,234,987

  • AGIBUMBUNANNAG 3,943,337

  • YAD-ADALAN ITI BIBLIA 4,341,698

Pinadagusda ti Agassawa iti Balayda

Iti Las Vegas, Nevada, kayat ti maysa a pagassawaan a saan a Saksi ti agnaed iti natalna a lugar, isu nga inlakoda ti balayda ket umakarda iti Dominican Republic. Ngem masapul a pumanawda iti balayda 10 nga aldaw sakbay ti nakaeskediul a panagluasda. Kayat dagiti kaarrubada a Saksi ni Jehova ti tumulong isu a pinadagusda dagitoy nga agassawa iti  balayda. Bayat ti panagdagusda, kimmuyogda iti Kingdom Hall. Nasdaaw ken naginteresda idi nangngegda iti gimong ti petsa a 1914. Ammoda a napateg daytoy a petsa iti pakasaritaan ti lubong. Idi nakadanondan iti Dominican Republic, nagpayadalda iti Biblia iti umuna a Saksi a simmarungkar kadakuada. Kalpasan ti 14 a bulan, indedikarda ti biagda ket nagpabautisarda.

Dayta ti Apag-isu a Kasapulanna

Iti 2012 International Book Fair iti Panama City, Panama, nangikabil dagiti kakabsat iti lamisaan a pagidispleyan iti literatura. Immasideg ti dua nga estudiante a babbai. Maysa kadakuada ti nangibaga iti sister nga agbambantay iti pagidispleyan nga isu ket agprobproblema gapu ta adikto iti droga ni tatangna, ket dina ammo no ania ti aramidenna. Impakita ti sister ti kapitulo 23 ti libro a Dagiti Saludsod nga Iyimtuod ti Agtutubo—Dagiti Sungbat nga Epektibo, Tomo 2 a napauluan: “No Ngay Adikto ni Tatangko iti Droga Wenno Arak?” Kinuna ti estudiante: “Daytoy ti apag-isu a kasapulak!” Inarakup dagiti estudiante ti sister sa nagsublida kalpasan ti maysa nga oras tapno agyaman manen. Bayat ti lima nga aldaw a Book Fair, nakaipaima dagiti kakabsat iti 1,046 a libro, 1,116 a magasin, ken 449 a broshur. Adda 56 a tattao a nangted iti adresda tapno masarungkaran ida dagiti Saksi.

Uppat a Tawen a Nangaskasaba a Bukbukodna

Ni Fredy, a Cabecar ti nakayanakanna a pagsasao, ket agnanaed iti nasulinek a komunidad iti maysa a bantay ti Costa Rica. Aguppat a tawenen sipud idi nakaawat ni Fredy iti libro nga Ania a Talaga ti Isursuro ti Biblia? ken  broshur nga Ania ti Kalikaguman ti Dios Kadatayo? idi agtrabtrabaho iti kabesera a San José. Imbaga ti kabsat a nangted kenkuana kadagitoy a literatura a mapanna kasabaan dagiti kalugaranna. Isu a nagawid, personal nga inadalna ti libro nga Isursuro ti Biblia, ken nangaramid kadagiti panagbalbaliw, kas iti panangirehistrona iti panagasawana. Insurona ti kinapudno iti amin a kabaelanna kadagidiay agsasao iti Cabecar.

Nangyurnos ni Fredy kadagiti klase para kadagiti yad-adalanna iti Biblia. Biningayna dagiti estudiante iti innem a klase, depende iti maalada a marka iti intedna nga eksaminasion a pangsubokan iti pannakaammoda iti Biblia. Nangorganisar kadagiti gimong ken nangangay pay iti Memorial. Nangaramid iti imbitasion a naglaon iti: “Aw-awisendakayo dagiti Saksi ni Jehova a tumabuno iti Pananglaglagip iti ipapatay ni Kristo.” Uppat a tawen nga inaramidna dagitoy uray awanen ti nakasarsaritana a Saksi! Ngem inkarkararagna ken Jehova a mangibaon kadagiti Saksi a tumulong kenkuana.

Itay nabiit, nasungbatan ti kararag ni Fredy. Sumagmamano a Saksi ti dimteng iti komunidadda nupay narigat ti ipapan sadiay. Nasdaawda a nakakita iti amin a naaramidanna. Inreportda: “Kasla Saksin ni Fredy uray no di pay nabautisaran!” Kalpasan laeng ti tallo a bulan, naaprobaranen kas di bautisado nga agibumbunannag. Tapno mabautisaran, masapul a sumalog iti bantay a tumabuno iti kombension iti umuna a gundaway. Inkuyogna ti 19 a yad-adalanna iti Biblia. Ita, nakaorganisar iti kanayonan a tallo a grupo nga agsasao iti Cabecar iti nasulsulinek pay a lugar.

Costa Rica: Ni Fredy, a regular pioneer itan, ket adayo ti pagpagnaenna a mapan mangyadal iti Biblia

Indepensana ti Pammatina iti Eskuelaan

Ni Anna ket estudiante iti hayskul iti United States. Maysa nga aldaw, masapul nga idepensana ti pammatina  kadagiti kaklasena a masursuron gapu ta saan a mamati iti Trinidad. “Pinagmaymaysaandak,” kinuna ni Anna, “ngem kalmadoak latta ta diak kayat nga adda makunada kadagiti Saksi ni Jehova.” Karabiyanna, nagkararag a patureden koma ni Jehova ken nag-research maipapan iti doktrina a Trinidad. Kabigatanna, intugot ni Anna ti Bibliana iti eskuelaan. Inaribungbongan dagiti kaklasena ken adu ti agkakatawa. Ngem situtured nga imbasana ti sumagmamano a teksto sa inlawlawagna dagita. Idi kuan, awanen ti makuna dagidiay sumupsupiat. Ti presidente ti klase, a kangrunaan a sumupsupiat, imbagana a raraemennan dagiti Saksi ni Jehova. Iti intero a makatawen, adu ti sinalsaludsodna maipapan kadagiti patpatien ni Anna.

Naiparna a Naperdi ti Sapatosna

Maysa nga agsapa ti Domingo, mapan iti kapilia ti maysa nga agkabannuag a babai idiay Barbados. Bayat a magmagna, napugsat ti singdan ti sapatosna. Napan iti asideg  a balay ken nagdamag no adda imperdibleda a pangsimpana iti sapatosna. Balay gayam dayta ti maysa a sister ken ti balasangna. Bayat a simsimpaen ti babai ti sapatosna, inlawlawag ti sister no kasano a matungtungpalen dagiti padto iti Biblia. Inawis met ti balasangna a kumuyog kadakuada a makigimong iti Kingdom Hall iti dayta nga agsapa. Gapu ta maladawen ti babai iti kapiliada, pinatganna ti awisda. Bayat ti gimong, binasana amin a nangngegna a teksto iti King James a Bibliana. Nagustuanna unay ti programa. Kinunana a nauman a makangkangngeg kadagiti tambor ken panagiikkis iti kapiliada, ken nabayagen a kayatna ti agadal iti Biblia iti naulimek nga aglawlaw. Inawatna ti libro nga Isursuro ti Biblia ken nagpayadal iti Biblia. Tabtabunuanna ti amin a gimong ken maragragsakan a makipaset kadagita.

Maysa Laeng ti Makapasardeng Kenkuana a Mangasaba

Kinuna ti maysa nga agtutubo a lalaki a taga-Guyana: “Kaykayatko a kasabaan dagiti kaeskuelaak, ngem adda dina kayat ti makasabaan. Maysa nga aldaw, impidegnak iti diding sa kinunana, ‘Isardengmo ti mangasaba!’ Imbagak a ni laeng Jehova ti kakaisuna a makapasardeng kaniak. Idi intuloyko ti nangasaba, pinerdina ti bagko. Dinisnognak ket nabtak ti bibigko. Naayabankami a dua iti opisina ti prinsipal ket dinamagna no ania ti gapu a dinisnognak ti kaklasek. Imbagak nga ikaskasabak ngamin ti naimbag a damag. Dinamag manen ti prinsipal no apay a diak bimmales uray no kunana a bimmalesak koma. Imbagak a naadalko iti Biblia iti Roma 12:17 a saan a rumbeng nga agibales dagiti Kristiano. Idi nangngeg dayta ti prinsipal, pinaruarnakon iti opisinana ket imbagana nga isun ti makaammo iti nangdisnog kaniak.”

Catamarca, Argentina