Accessibility setting

Agpili iti lengguahe

Mapan iti segundario a pagpilian

Mapan iti listaan dagiti linaonna

Mapan iti linaonna

Dagiti Saksi ni Jehova

Iloko

2014 Tinawen a Libro Dagiti Saksi ni Jehova

 SANGALUBONGAN A PANANGASABA KEN PANANGISURO

Africa

Africa
  • PAGILIAN 58

  • POPULASION 979,685,702

  • AGIBUMBUNANNAG 1,363,384

  • YAD-ADALAN ITI BIBLIA 3,265,314

“Nakasaganaakon a Rummuar iti Babilonia a Dakkel”

Ni Thomson, nga agtutubo a lalaki a taga-Uganda, ket nadismaya iti relihion. Saanen a makimismisa gapu iti panagdawdawat dagiti panguluen ti relihion iti kuarta. Ngem inaldaw latta nga agbasa iti Biblia. Naginteres unay iti libro nga Apocalipsis ket inkagumaanna a tarusan dayta sa aginotar iti bassit a notebook. Adda kabsat a nakakita ken Thomson  nga agbasbasa iti Bibliana iti konstruksion a pagtrabtrabahuanna. Nagsayaat ti panagtungtongda, ken inawat ni Thomson ti libro nga Ania a Talaga ti Isursuro ti Biblia? Agpatnag a binasana ti intero a libro. Kabigatanna, nakaawat ti kabsat iti teks: “Agyamanak iti Apo gapu iti impormasion nga inranudmo. Nakasaganaakon a rummuar iti Babilonia a Dakkel.” Kiniddaw ni Thomson ti amin a publikasion a nadakamat kadagiti footnote ken apendise ti libro. Impasnekna ti nagadal iti Biblia, nagalisto a rimmang-ay, ket nabautisaran iti 2012 a “Saluadam ta Pusom!” a Kombension Distrito. Idi Marso 2013, nagbalin a regular pioneer ni Thomson. Tultulongannan ti sabsabali a mangbigbig a masapul a rummuarda iti Babilonia a Dakkel.

Walo a Kakabsat a Lallaki ti Nangyadal Kenkuana

Dimmakkel ni Jimmy iti Port Louis, a kabesera ti Mauritius. Inrugina ti naginum idi agtawen iti 16 ket di nagbayag, inaldawen nga agbartek. Gapu iti bartekna, masansan a di makatepteppel isu nga agkarasubli iti pagbaludan. No dadduma, tallo a botelia nga arak ti mainumna ken 60 ti masigariliona iti maysa nga aldaw. No awan kuartana, uminum iti alkohol a pagdalus kadagiti tawa. Ininumna pay ti bangbanglo ni nanangna. Idi adda nangibaga a kasla bangkay ti itsurana, nagpa-confine iti rehabilitation center, ken nagyan sadiay iti maysa ket kagudua a tawen. Ngem saan a nakatulong dayta kenkuana.

Rodrigues: Determinado ni Jimmy a mangbalbaliw iti biagna

Idi agangay, naam-ammo ni Jimmy dagiti Saksi ni Jehova ket nakipagadal iti Biblia. No dadduma, pumanaw biit bayat ti panagadalda tapno uminum iti arak. Iti panaglabas ti panawen, walo a kakabsat a lallaki ti nangyadal kenkuana. Nabigbig met laeng ni Jimmy a masapul a balbaliwanna ti panagbiagna. Kinunana: “Kasla  sumalsalput iti pusok ti naespirituan a kampilan a nadakamat iti Hebreo 4:12. Maysa nga aldaw, nabasak iti Bibliak ti Proverbio 24:16: ‘Daydiay nalinteg mabalin a matuang iti mamimpito a daras, ket sigurado a tumakderto.’ Dayta ti nangrugian ti panagbalbaliw ti biagko.” Kalpasan a ‘natuang’ ni Jimmy kadagiti pito a kakabsat a nangyadal kenkuana, determinadon nga agbalbaliw ken ‘tumakder’ iti tulong ti maikawalo a kabsat. Nagkiddaw ni Jimmy iti bileg ken Jehova, timmabuno kadagiti gimong, ken insardengna dagiti dakes a bisiona. Nabautisaran idi 2003 ken nagbalin a regular pioneer idi 2012. Agserserbi itan a ministerial nga adipen iti maysa a kongregasion iti isla ti Rodrigues.

“Ni Jehova ken Dagiti Anghel ti Gagayyemkonto”

Sipud idi ubing, miembron ti Presbyterian Church ti 70 anyos a ni Mary a taga-Kenya. Nalaing nga agur-or iti donasion ken timmulong iti pannakaipatakder ti maysa a kapilia iti lugarda. Saan a naragsakan idi nagbalin a Saksi ti maysa nga anakna a lalaki. Aw-awisen ti anakna a tumabuno kadagiti gimong ngem dina kayat. Irasrasonna a kayatna a mangngeg ti mensahe ti Biblia iti lengguahena a Kikuyu, imbes a Swahili. Ngem immannugot met laeng idi naawis a tumabuno iti kombension distrito iti lengguahe a Kikuyu. Iti pagkombensionan, nagtugaw iti paset nga ayan dagiti nataengan. Nagustuanna unay ti naasi ken naayat a panangtratoda kenkuana. Kinuna ni Mary a dina napadasan ti kasta a kinamanagayat iti relihionda. Sipapasnek nga inimdenganna ti amin a palawag ken maragragsakan kadagiti naammuanna. Idi naitukonan a  mayadalan iti Biblia babaen ti broshur a Listen to God, dagus nga inawatna.

Kalpasan ti sumagmamano a bulan a panagadal ni Mary, kayatnan ti agbalin a Saksi ni Jehova isu a nagikkat iti relihionda. Nakapungtot dagiti mangidadaulo iti relihionda. Inayabanda ti maysa a pastor iti kabesera a Nairobi tapno kasaritana ni Mary. Inkagumaan ti pastor a kombinsiren ni Mary a saan nga agikkat iti relihionda, ngem saan a timmulok. “Asinonto ti gagayyemmo no agikkatka?” insaludsod ti pastor. “Adu ti gagayyemmo ken kaarrubam a karelihionantayo.”

“Ni Jehova ken dagiti anghel ti gagayyemkonto,” kinuna ni Mary. “Gagayyemkonto pay dagiti Saksi.”

Gapu ta dina nakombinsir ni Mary, pimmanaw ti pastor. Nagtultuloy a rimmang-ay ti panagadal ni Mary iti Biblia. Tabtabunuannan ti amin a gimong uray no adayo ti pakaang-angayan dagita. Itay nabiit, dina nakamakam ti paglugananna a mapan makigimong ngem napan latta a nagnagna iti dua nga oras uray agtudtudo. Nupay busbusoren dagiti kaarrubana, determinado nga agpabautisar.

Liberia: Panangisagana iti pagtugawan para iti Memorial. Idi 2013, maragsakan ti 6,148 nga agibumbunannag ta adda 81,762 a timmabuno

 Sinikkarud ti Pastora!

Ni Ashton ket balasitang nga agtawen iti 14 a taga-Cameroon a makipagnanaed iti anti ken angkelna. Idi nakipagadal iti Biblia kadagiti Saksi ni Jehova, nakaro ti panangbusorda kenkuana. Pilpilitenda ni Ashton a kumuyog kadakuada iti kapilia ti Pentecostal. Iti maysa a seremonia iti kapilia, imparabaw ti pastora dagiti imana iti ulo dagiti timmabuno tapno mayallatiw kano ti espiritu ket matumbada. Saan a natumba ni Ashton. Kararag a kararag ti pastora ngem nakatakder latta ni Ashton isu a sinikkarudna tapno matumba! Idi nakaawiddan, imbagana kada anti ken angkelna a sinikkarud isuna ti pastora, ngem dida namati. Sipud idin, dinan kayat ti mapan iti kapilia. Ita, uray busbusoren ken in-insultuen ti pamilia ken dagiti kaarrubana, makigimgimong latta ni Ashton iti Kingdom Hall.

Inimbitaran ti Maysa a Bassit nga Ubing

Awan pay maysa ket kagudua ti tawen ni Anilpa ngem naregtan a nakiraman iti panagimbitar para iti kombension distrito idiay Angola idi napan a tawen. Ti “paset” ni Anilpa ket agtuktok iti ridaw ken agyawat iti imbitasion kadagiti bumalay bayat nga ilawlawag ni nanangna no apay a simmarungkarda. Gapu ta magagaran unay ni Anilpa, di pay nalpas ni nanangna a makisarita iti bumalay, mapanen agtuktok iti sumaganad a ridaw. Maay-ayatan unay kenkuana dagiti bumalay. Kas pagarigan, iti maudi nga aldaw ti kombension, maysa a babai ti immasideg ken Anilpa ket kinunana: “Sapsapulenka. Maragragsakanak  ta nakitaka. Sika ngamin ti nangimbitar kaniak iti kombension.”

Naumadan a Mapapaidaman

Idi Agosto 2012, dagiti kakabsat iti Antaviranambo Congregation iti Madagascar nakasaritada ti maysa a grupo dagiti tattao a nagkuna a kayatda ti agbalin a Saksi ni Jehova. Nauman dagitoy a tattao kadagiti lider ti relihionda ta saanda nga ar-aramiden ti isursuroda. Imbagada nga awan ti programa ti simbaanda a mangisuro iti Biblia ken awan ti publikasionda a mangilawlawag kadagiti patpatienda. Dakkel ti ibaybayadda kadagiti serbisio ti simbaan, awan ti pudpudno a panagkakabsat, ken awan met ti pudpudno a Nakristianuan nga ayat. Kinunada pay nga ammoda nga awan dagiti kasta a problema dagiti Saksi ni Jehova.

Nagsurat daytoy a grupo iti sanga nga opisina. Kinunada: “Nagsuratkami ta kayatmi nga ipakaammo ti tarigagaymi nga agserbi ken Jehova. Ngem adayo  ti pagnanaedanmi. Dadduma kadakami ti magna iti 9 agingga iti 15 nga oras a mapan kadagiti paggigimongan. Pangngaasiyo ta mangibaonkayo koma iti tumulong kadakami nga agadal iti Biblia. Saankami a makapagserbi ken Jehova iti amin a pusomi no awan ti ibaonyo a mangpabileg iti panagayatmi kenkuana. Agdagupkami iti 215 manipud iti nasurok a tallo a purok. Nagduduma ti relihionmi ngem kayatmin ti agserbi ken agtulnog ken Jehova iti amin a pusomi. Agtalekkami a tulongandakami.”

Nagna dagiti kakabsat iti siam nga oras agingga iti umuna a purok tapno madanon daytoy a grupo. Nangangayda sadiay iti gimong ket 65 nga interesado ti timmabuno. Dagus a nagdinamag daytoy isu a kayat met dagiti adda iti dadduma a purok ti mabisita ken masuruan iti Biblia. Nagna manen dagiti kakabsat iti uppat nga oras a mapan iti maikadua a purok. Nangangayda iti gimong ket nasurok a 80 ti timmabuno. Adda dagiti nakasarita ditoy dagiti kakabsat a nangipakaasi a mapanda met iti purokda a dua nga oras pay a pagnaen. Napan dagiti kakabsat ket nangangayda met sadiay iti gimong a tinabunuan ti nasurok a 50.

Iti dua a nagduma a gundaway, nasurok a 30 kadagitoy a pumurok ti naki-asamblea idiay Mahanoro, a nagnada iti tallo nga aldaw nga agapan ken agawid. Iti bisita ti manangaywan iti sirkito, 25 kadakuada ti napan a buklen dagiti pagassawaan, sangapamiliaan, lallakay, ken babbaket. Nagdagusda amin iti maysa a balay isu a pinagsasaritaanda dagiti naadalda ken nagsalsaludsodda agingga iti tengnga ti rabii. Kinuna dagiti pumurok nga adu pay ti mayat a makikadua kadagiti Saksi iti panagdaydayawda gapu ta naumadan a mapapaidaman kadagiti lider ti relihionda.