Accessibility setting

Agpili iti lengguahe

Mapan iti segundario a pagpilian

Mapan iti listaan dagiti linaonna

Mapan iti linaonna

Dagiti Saksi ni Jehova

Iloko

2014 Tinawen a Libro Dagiti Saksi ni Jehova

 DAGITI TAMPOK ITI NAPALABAS A TAWEN

Damdamag—Manipud iti Intero a Lubong

Damdamag—Manipud iti Intero a Lubong

Timmulong Dagiti Polis a Nagidiskarga Kadagiti Hollow Block

Iti Kutaisi, a maikadua a kadakkelan a siudad iti Republic of Georgia, 13 a tawenen nga agas-asamblea dagiti kakabsat iti madaddadael ken daanen a paktoria iti arak. Mangikabilda kadagiti dadakkel a plastik a pannakabobida tapno saan a matedtedan dagiti tumabuno no agtudo. Ita, addaandan iti napintas a baro nga expandable a Kingdom Hall a mabalin a pagasambleaan ken pagkombensionan. Bayat ti konstruksion, 50 a boluntario ti agidisdiskarga kadagiti hollow block manipud iti trak idi inasitgan ida dagiti polis. Kayatda a kitaen ti mapaspasamak  ket nasdaawda iti kinaragsak ken kinagaget dagiti boluntario isu a kinomendaranda ida. Timmulongda pay a nagidiskarga kadagiti hollow block ken imbagada kadagiti kakabsat nga umawagda laeng no adda mangriribuk kadakuada. Inkari met dagiti polis a tabunuanda ti umuna a kombension a maangay iti baro nga Assembly Hall.

Inlakona ti Bisikletana

Agtaltalon ken agitultulod kadagiti karga babaen ti bisikleta ti pagsapulan ni Malachi, a maysa a panglakayen a taga-Burundi. Tapno makatulong iti panagibangon iti Kingdom Hall-da, inkeddengna ti agboluntario iti inaldaw. Ngem kasapulanna ti kuarta a pangsuporta iti pamiliana bayat ti dua a bulan a konstruksion. Isu nga inlakona ti bisikletana ken intedna ken ni baketna ti dadduma a naglakuanna para iti kasapulan ti pamiliada sa indonarna amin iti konstruksion ti natedda. Kas resultana, adu ti nasursurona kadagiti Kingdom Hall construction servant. Idi nalpas ti Kingdom Hall, nakabirok iti trabaho iti konstruksion ta nakita dagiti tattao ti laingna nga agibangon. Idi agangay, nakagatang met laeng iti sabali a bisikletana!

Natignayda a Tumulong

Saan a kaskarina ti agibangon kadagiti Kingdom Hall iti adayo a luglugar iti Malawi. Iti napalabas a tawen serbisio, adda Kingdom Hall a naibangon iti maysa a lugar a di nasayaat ti kalsadana. Babaen kadagiti lugan a four-wheel drive, dagiti kakabsat manipud iti sanga nga opisina intulodda sadiay dagiti materiales para iti konstruksion. Kuna dagiti lumugar a kakabsat a naatrakar ti komunidad iti daytoy a proyekto. Adu a saan a Saksi ti timmulong ken nagrabrabii a nagidiskarga kadagiti  darat, bato, semento, ken galba. Adda pay dagiti tiempo nga ad-adu ti nakipagtrabaho a saan a Saksi! Gapu ta maragsakanda iti kinapasnek dagiti Saksi ni Jehova nga agibangon iti disente a lugar a pagdaydayawan kadagiti adayo a lugar a kas iti ayanda, natignayda a tumulong.

Naglako Dagiti Ubbing iti Kendi

Idiay Côte d’Ivoire, adda agassawa nga special pioneer a mangyad-adal iti Biblia iti pagsasao a Bete iti agassawa a 10 ti annakda. Idi Mayo 2013, kayat ti intero a pamilia a tabunuan ti umuna nga asamblea iti Bete a maangay iti ili ti Daloa. Ngem 800 CFA ($1.60 U.S.) ti round trip a plete ti tunggal maysa. Nupay awan ti umdas a pagpleteda, determinadoda a tumabuno isu a nakapanunot ti ama iti remedio. Inikkanna ti inauna a balasangna iti 300 CFA ($.60 U.S.) a puonanna nga aglako iti kendi, ket nakaganansia iti umdas a pagpletena. Inikkan met ti ama iti sag-300 CFA ti dadduma pay nga annakna kas puonan iti ilakoda a kendi agingga a nakaurnongda amin iti pagpleteda. Gapuna, nakaduada dagiti kakabsat a nakiasamblea. Maragragsakanda unay a dimngeg iti programa iti mismo a pagsasaoda!