Accessibility setting

Agpili iti lengguahe

Mapan iti segundario a pagpilian

Mapan iti listaan dagiti linaonna

Mapan iti linaonna

Dagiti Saksi ni Jehova

Iloko

2014 Tinawen a Libro Dagiti Saksi ni Jehova

 DAGITI TAMPOK ITI NAPALABAS A TAWEN

Maysa nga Organisasion nga Umab-abante

Maysa nga Organisasion nga Umab-abante

Iti Biernes, Hulio 5, 2013, naragsakan ti pamilia ti Bethel iti United States idi impakaammo ni Anthony Morris a kameng ti Bagi a Manarawidwid: “Idi kalman, Hulio 4, 2013, naaramid ti katulagan iti pannakailako ti innem a pasdek a masarakan iti 117 Adams Street ken iti 90 Sands Street iti Brooklyn. Gapuna, masapul a bakanteantayo dagiti mailako a Building 1 agingga iti 5 iti katengngaan ti Agosto iti daytoy a tawen.”

Imbaga ni Brother Morris a ti Laundry ken Dry Cleaning Department nga adda iti maikanem ken maikapito a kadsaaran ti Building 3 ket mausar agingga iti katengngaan  ti 2014. Innayonna: “Ti pasdek iti 90 Sands Street ket nalabit mabakantean inton 2017.”

Ti pannakailako ti innem a dadakkel a pasdek ket paset ti proyekto a ti sangalubongan a hedkuarter dagiti Saksi ni Jehova iti New York ket mayakar iti 102-ektaria a sanikua iti Warwick, New York. Ngem saan a marugian ti panangisagana ken panangsimpa iti lugar a pagibangonan agingga a saan a maala dagiti kasapulan a permit.

Iti Huebes, Hulio 18, magagaran ti pamilia ti Bethel iti United States a dimngeg iti ipakaammo ni Mark Sanderson a kameng ti Bagi a Manarawidwid: “Maragsakankami a mangipakaammo nga idi rabii ti Mierkoles, Hulio 17, nagkaykaysa ti Warwick Planning Board a nangaprobar iti site plan ti baro a sangalubongan a hedkuarter dagiti Saksi ni Jehova. Daytoy ti maudi nga aprobasion a kasapulan tapno makaala kadagiti building permit ket mairugi ti konstruksion. Makapainteres ta iti rabii a pannakaaprobarna, eksakto met nga uppat a tawen manipud nagatang ti sanikua iti Warwick. Dagiti pasamak iti napalabas nga al-aldaw a nakaigapuan daytoy nga aprobasion ket pammaneknek iti pamendision ni Jehova.” Nagyaman ni Brother Sanderson iti amin gapu iti pingetda nga agtrabaho ken napasnek a karkararagda para iti daytoy nagpateg a proyekto. “Kangrunaan iti amin,” kinunana, “ipaaytayo ken Jehova ti dayaw ken panagyaman iti daytoy nagpateg a panagrang-ay a pannakayakar ti sangalubongan a hedkuarter iti Warwick, New York.”

 Iti Biernes, Hulio 26, miniting ni Brother Morris ti agarup 1,000 a boluntario iti Bethel ken Regional Building Committee (RBC) a nagtataripnong iti baro a dining room iti Tuxedo, New York, ti lugar a pagisaganaan para iti proyekto iti Warwick. Kalpasan ti makaparegta iti naespirituan a palawag ni Brother Morris, imbagana nga adda ipakaammona. “Kaaw-awatko laeng daytoy ig-iggamak ita, ket kayatko nga iranud kadakayo. Ti nakasurat iti ngato daytoy a porma ket: ‘Building Permit.’” Sakbay pay nga ituloyna a basaen, gumgumluongen ti palakpak dagiti boluntario. Maragragsakanda amin idi binasa ni Brother Morris ti dadduma a paset ti umuna a kangrunaan a building permit, nga inted ti ili ti Warwick, tallo nga oras pay laeng ti napalabas.

Ania ti Maar-aramid iti Wallkill, Warwick, ken Tuxedo?

Sipud nangrugi ti proyekto a panagpalawa iti Wallkill idi Agosto 2009, agarup 2,800 a kakabsat ti nagserbi kas temporario a boluntario. Karaman iti proyekto ti pannakabangon ti baro a residence building, pagopisinaan, ken garahe a pagparkingan. Mapabpabaro ti maysa kadagiti agdama a residence building, ken adda pannakabalbaliw ti printery, laundry, auditorium, services building, ken main lobby. Manamnama nga agtultuloy ti konstruksion iti Wallkill agingga iti ngudo ti 2015.

Nangrugi metten ti konstruksion ti baro a sangalubongan a hedkuarter iti Warwick. Sumagmamano a bulan sipud nairugi ti trabaho, madaman ti panagpatad, panagkali, ken panagikabil kadagiti tubo ken kable iti uneg ti daga. Iti maudi a paset ti 2013, nairugi ti konstruksion ti umuna a tallo a pasdek—ti Vehicle Maintenance Building, Visitor Parking Garage, ken Maintenance Building. Napateg dagitoy a pasdek para iti pannakamantener dagiti  alikamen ken pannakaasikaso dagiti agtrabaho kabayatan ken kalpasan ti konstruksion. Manamnama a marugian a maibangon iti 2014 dagiti residence building ken ti Office/Services Building.

Ti pasilidad iti Tuxedo, a 20-ektaria a sanikua ken agarup 10 a kilometro iti amianan ti Warwick, “ket napateg para iti konstruksion ti baro a sangalubongan a hedkuarter iti Warwick,” kuna ni Kenneth Chernish a miembro ti Construction Project Committee. “Dayta ti pagyanan ti dadduma a boluntario ken pakaisaganaan dagiti taraon, materiales, ken alikamen.” Tapno mapaalisto ti konstruksion ti pasilidad iti Tuxedo, dagiti napili nga RBC iti makindaya a paset ti United States tumultulongda iti dadduma a benneg ti proyekto.

Adu a boluntario kadagiti RBC iti intero a pagilian ti mayat a tumulong iti konstruksion ti baro a sangalubongan a hedkuarter. Agtrabtrabahon dagiti addaan iti abilidad a kakabsat kas temporario a boluntario kadagitoy a proyekto. Adda iti Plumbing Department da Leslie Blondeau ken ni lakayna a Peter. Kinuna ni Leslie, “Sumingsingedkami gapu iti panagkaduami nga agtrabaho ken diminto pulos malipatan dagitoy nga ar-aramidenmi.”

“Maysaak kadagiti elektrisian ditoy Tuxedo,” kuna ni Mallory Rushmore. “Inaldaw a makaparagsak a makita ti sangsangkamaysa a pannakipagtrabaho iti amin a boluntario nga adda ditoy.”

“Naisangsangayan daytoy a pribilehio,” kuna ni Quincy Dotson. “Impagarupko idi nga adu ti maipaayko, ngem iti kinapudnona, ad-adu met gayam ti magunggonak.”

“Maragsakanak ta karamanak iti daytoy a proyekto,” kuna ni Brother Chernish. “Alisto ken nagsayaat ti panagtrabaho dagiti kakabsat ken maay-ayatanda pay.”