Accessibility setting

Agpili iti lengguahe

Mapan iti segundario a pagpilian

Mapan iti listaan dagiti linaonna

Mapan iti linaonna

Dagiti Saksi ni Jehova

Iloko

2014 Tinawen a Libro Dagiti Saksi ni Jehova

100 a Tawenen ti Napalabas—1914

100 a Tawenen ti Napalabas—1914

KUNA ti Enero 1, 1914, a ruar ti The Watch Tower: “Patienmi a ti Tawen 1914 ket mangyeg pammaneknek iti ad-adu a gundaway ti panagserbi maipaay iti Kinapudno no idilig kadagiti immun-una a tawen ti Panagani.” Dimteng met laengen ti tawen a padpadaanan dagiti Estudiante ti Biblia iti dinekdekada, ken nakaregregtada iti ministerio. Kas resulta ti kinapingetda iti dayta a tawen, minilion ti nakangngeg kadagiti kari ti Biblia. Ngem naiduma unay ti pagregreggetan dagiti tattao iti lubong.

 Kumarkaro ti Kinaranggas iti Lubong

Iti nasapa a paset ti 1914, napasamak ti maysa kadagiti kararanggasan a panagwelga dagiti trabahador iti Estados Unidos a nakapukawan ti biag ti adu a lallaki, babbai, ken ubbing. Napagtalaw dagiti nagwelga a minero ken ti pamiliada kadagiti pagtaengan a kukua ti kompania, ket napilitanda nga agnaed kadagiti tolda. Iti Abril 20, adda nagpipinnaltog iti maysa kadagiti nagibangonanda iti tolda iti asideg ti Ludlow, Colorado. Nauram dagiti tolda dagiti minero. Nakapungtot dagiti minero iti intero a rehion isu a pinapatayda ti adu a guardia ti kompania tapno makaibalesda. Timmulong dagiti soldado a nangpasardeng iti riribuk.

Nakarkaro pay ti pasamak iti Europa. Iti Hunio 28, ti 19 anyos a Bosnian Serb a ni Gavrilo Princip pinaltoganna ni Archduke Francis Ferdinand iti Austria. Dayta ti nangrugian ti Gubat Sangalubongan I. Idi agngudo ti tawen, nagramaramen iti intero a Europa ti Gubat Sangalubongan I, a naawagan idi kas Dakkel a Gubat.

Panangasaba ti Nakaipamaysaan Dagiti Kombension

Iti laksid dagiti kumarkaro a riribuk iti lubong, nagpipinnaregta dagiti Estudiante ti Biblia nga agbalin a nagaget iti panangasaba. Nangrugi iti Abril 10 ti kaunaan a kombension dagiti adipen ti Dios iti South Africa. Ti kangatuan a bilang ti timmabuno ket 34. “Pudno a ‘bassitkami nga ipastoran,’” insurat ni William W. Johnston. “Dandani kagudua [iti timmabuno] iti Kombension ti nabautisaran. Walo a babbai ken walo a lallaki ti nangisimbolo iti dedikasionda iti pamay-an nga insuro ti Apo.” Iti maudi nga aldaw ti kombension, pinagsasaritaan dagiti timmabuno no ania ti kasayaatan a panangparang-ay iti trabaho a panangasaba iti South Africa. Ita, ti nasurok a 90,000 a matalek a kakabsat iti South Africa ti pammaneknek a nagballigi daytoy a ‘bassit nga ipastoran.’

Idi Hunio 28, 1914, iti mismo nga aldaw a pannakapaltog ni Archduke Ferdinand, nagtataripnong dagiti Estudiante ti Biblia  iti Clinton, Iowa, U.S.A. Iti dayta a kombension, iti Hunio 30, kinuna ni A. H. MacMillan: “No kayattayo a magun-od ti gunggonatayo, agtalinaedtayo nga aktibo a mangaramid iti pagayatan ti Dios, nga agserbi iti ministerio agingga a posible tapno maiwaragawagtayo ti mensahe ti panagani iti intero a lubong.”

Minilion ti Nakabuya iti “Photo-Drama”

Idi Enero 11, 1914, nangrugi a naipabuya iti New York City ti “Photo-Drama of Creation,” a naglaon kadagiti nairekord a naibatay-Biblia a palawag ken musika a magiddanan kadagiti dekolor a glass slides ken motion picture. Lima ribu ti timmabuno iti umuna a panagpabuya ken adu ti saan a nakastrek gapu ta awanen lugarda.

Dua a tawen a naisagana ti “Photo-Drama of Creation,” ngem “kasla di pay mabalin para iti umuna a pannakaipabuya dayta iti Enero,” kuna ti The Watch Tower. Bayat ti umuna nga innem a bulan ti 1914, adu a panangpasayaat ti inaramid dagiti kakabsat iti “Photo-Drama.” Kas pagarigan, inikkanda iti mabuya nga introduksion a magiddanan kadagiti sasao ni Charles Taze Russell tapno maammuan ti mangis-isponsor iti “Photo-Drama.”

Dimteng ti tiempo nga aggigiddanen a maipabuya ti “Photo-Drama” iti 80 a siudad. Iti Hulio 1914, nakadanonen iti Great Britain, a naipabuya iti Glasgow ken London kadagiti pasdek a napno iti tattao. Iti Septiembre, nakadanon metten iti Denmark, Finland, Germany, Sweden, ken Switzerland. Iti Oktubre, dimmanonen iti Australia ken New Zealand. Agdagup iti nasurok a siam a milion ti nakabuya iti “Photo-Drama” iti umuna a tawenna.

Tunggal kopia ti “Photo-Drama” ket addaan iti ginasut a glass slide, adu a rolio a film ti motion picture, ken adu a plaka. Dakkel ti magastos iti pannakapataud dagiti kopia, ken kasapulan dagiti eksperiensado a kakabsat iti tunggal panagpabuya. Gapuna, maipabuya laeng ti kompleto a “Photo-Drama” kadagiti dadakkel a siudad. Tapno maipabuya kadagiti ili, nangaramid dagiti Estudiante ti Biblia iti tallo a napaababa a bersion  ti “Photo-Drama.” Ti maysa a bersion a naawagan “Eureka Drama Y” ket addaan kadagiti glass slide a magiddanan kadagiti palawag iti Biblia ken musika. Ti sabali pay a bersion a naawagan “Eureka Drama X” ken ti ab-ababa pay a bersion a “Eureka Family Drama” ket audio laeng, nga awanan kadagiti slide wenno motion picture. Iti Estados Unidos, nasurok a 70,000 ti nakabuya iti “Eureka Drama” iti panagngudo ti 1914, awan pay uppat a bulan kalpasan a nairuar dayta.

Nakiraman Dagiti Colporteur ken Boluntario iti Panangasaba

Nupay kabbaro ken makapagagar ti panangipabuya iti “Photo-Drama,” bigbigen dagiti Estudiante ti Biblia nga ipangpangrunada ti dadduma a pamay-an ti panangasaba. Kastoy ti insurat ni Charles Taze Russell iti amin a colporteur, a maawagan itan iti payunir: “Awanen ti ammomi a sabali a nabungbunga a pamay-an ti panagserbi iti daytoy a panawen ti Panagani. Gapuna, saanmi a paregtaen dagiti Colporteur a makiramanda iti panangipabuya iti Photo-Drama . . . Adda  dagiti kakabsat a nasungdo met iti Apo . . . a makatulong iti pannakaipabuya ti Drama.”

Idi Enero 1914, ti bilang ti colporteur ket 850. Iti dayta a tawen, nakaiwaras dagitoy a naregta nga ebanghelisador iti nasurok a 700,000 a kopia ti Studies in the Scriptures. Inyebkas ti The Watch Tower ti “naayat a pannakaseknanna” kadagiti colporteur ken pinaregtana dagiti agbasbasa nga “agsaoda iti makaparegta kadagiti colporteur; ta narigat ti kasasaadda no dadduma.”

Dadduma nga Estudiante ti Biblia ti nakaipaima kadagiti tracts iti adu a lengguahe. Bayat ti 1914, nakaipaimada iti nasurok nga 47 a milion a kopia ti The Bible Students Monthly ken dadduma pay a tracts!

Makitkita dagiti tattao ti trabaho dagiti Estudiante ti Biblia. Mangaskasabada iti publiko, ken awan bayadna dagiti gimongda. Insennaay ti maysa a ministro ti Kakristianuan: “Di agbayag, ibilangton dagiti tattao a krimen ti panagur-or iti kuarta, ket kasanotayton? Isagsagmaknatayo ni Pastor Russell.”

Ti Panagpatingga ti Panawen Dagiti Gentil

Patien dagiti Estudiante ti Biblia nga agpatingga iti agarup Oktubre 1, 1914 ti “panawen dagiti Gentil” a nadakamat iti Lucas 21:24 (King James Version). Ad-adda a magagaranda bayat nga umas-asideg ti Oktubre. Dadduma nga Estudiante ti Biblia ti addaan pay kadagiti countdown card a pangmarkaanda iti tunggal aldaw nga aglabas. Adu ti mangipagarup nga agpalangitda iti dayta a petsa.

Iti agsapa ti Oktubre 2, 1914, simrek ni Brother Russell iti dining room ti Bethel ket impakaammona iti pamilia ti Bethel: “Nagpatinggan ti Panawen dagiti Gentil; nalpasen ti al-aldaw dagiti arida.” Dadduma kadakuada ti pamiliar kadagita a sasao, a liriko iti kanta 171 iti Hymns of the Millennial Dawn a pagkantaanda. Sipud 1879, ikankantan dagiti Estudiante ti Biblia dagiti liriko nga “Agpatpatinggan ti panawen dagiti Gentil,” ngem saanen nga umiso dagita a sasao gapu ta ti Panawen  dagiti Gentil, wenno ti “naituding a pampanawen dagiti nasion,” ket nagpatinggan. (Luc. 21:24) Idi agangay, makitan kadagiti simmaganad a pagkantaantayo daytoy a napateg a panagbalbaliw.

Ti countdown card a “Be Thou Faithful Unto Death” nga inusar ti dadduma tapno makapagtalinaedda a matalek agingga iti panungpalan

Idi agngudo ti tawen, natibkeren ti pannakaipasdek ti Mesianiko a Pagarian iti langlangit, ket ipagarup ti dadduma nga Estudiante ti Biblia a nalpasen ti trabahoda. Dida ammo a dandanidan sumrek iti panawen ti pannakasubok ken pannakasagat. Ti teksto iti tawen 1915 ket ‘Kabaelanyo aya ti uminum iti kopak?’ a naibatay iti Mateo 20:22 iti King James Version. Karaman iti ‘kopa’ a tuktukoyen ni Jesus ket dagiti suot a pakaipasanguanna agingga iti ipapatayna. Dandani metten maipasango dagiti Estudiante ti Biblia kadagiti suot, manipud kadagiti kakaduada ken iti sabsabali. Ti reaksionda kadagita a suot ti mangpaneknek no nasungdoda ken Jehova.

Ammuem ti Ad-adu Pay

Maika-100 a Tawen ti Makapabileg-Pammati a Pabuya

Ita a tawen ti maika-100 nga anibersario ti umuna a pannakaipabuya ti “Photo-Drama of Creation,” a nadisenio a mangpabileg iti pammati iti Biblia kas Sao ti Dios.