Accessibility setting

Agpili iti lengguahe

Mapan iti segundario a pagpilian

Mapan iti listaan dagiti linaonna

Mapan iti linaonna

Dagiti Saksi ni Jehova

Iloko

Online a Biblia

BARO A LUBONG A PATARUS TI NASANTUAN A KASURATAN

Zacarias 4:1-14

4  Ket ti anghel a nakisasao kaniak nagsubli ket riniingnak, kas iti tao a nariing iti pannaturogna.+  Idin kinunana kaniak: “Ania ti makitam?”+ Gapuna kinunak: “Nakitak, ket, adtoy! adda maysa a pagsaadan ti silaw, a balitok amin,+ nga addaan malukong iti rabawna. Ket adda iti dayta ti pito a pagsilawanna, ti met laeng pito;+ ket dagiti pagsilawan nga adda iti rabawna addaanda iti pito a tubo.  Ket adda dua a kayo nga olibo iti abayna,+ maysa iti makannawan a sikigan ti malukong ken maysa iti makannigid a sikiganna.”  Idin simmungbatak ket nagsaoak iti anghel a makisasao kaniak, a kinunak: “Ania ti kaipapanan dagitoy a banag, apok?”+  Gapuna simmungbat ti anghel a makisasao kaniak ket kinunana kaniak: “Pudno aya a saanmo nga ammo ti kaipapanan dagitoy a banag?” Kinunak kalpasanna: “Saan, apok.”+  Iti kasta simmungbat ket kinunana kaniak: “Daytoy ti sao ni Jehova ken Zorobabel, a kunkunana, ‘“Saan a babaen iti puersa militar,+ wenno uray babaen iti bileg,+ no di ket babaen iti espirituk,”+ kinuna ni Jehova ti buybuyot.  Siasinoka, O dakkel a bantay?+ Iti sanguanan ni Zorobabel+ agbalinkanto a nalantag a daga. Ket sigurado nga iyegnanto ti pannakaulo a bato.+ Addanto dagiti panagdir-i+ iti dayta: “Anian a makakayaw! Anian a makakayaw!”’”+  Ket ti sao ni Jehova nagtultuloy a dumteng kaniak, a kunkunana:  “Dagiti mismo nga ima ni Zorobabel insaadda ti pamuon daytoy a balay,+ ket leppasento dayta dagiti bukodna nga ima.+ Ket kasapulanto a maammuam a ni met laeng Jehova ti buybuyot imbaonnak kadakayo.+ 10  Ta siasino ti nangumsi iti aldaw dagiti babassit a banag?+ Ket sigurado nga agrag-odanto+ ket makitada ti tinnag iti ima ni Zorobabel. Dagitoy a pito isuda ti matmata ni Jehova.+ Agsursursorda iti intero a daga.”+ 11  Ket simmungbatak ket kinunak kenkuana: “Ania ti kaipapanan dagitoy dua a kayo nga olibo iti makannawan a sikigan ti pagsaadan ti silaw ken iti makannigid a sikiganna?”+ 12  Iti kasta simmungbatak iti maikadua a daras ket kinunak kenkuana: “Ania ti dua a punggos a sarsaringit dagiti kayo nga olibo a, babaen iti dua a nabalitokan a tubo, mangibuybuyat manipud a mismo kadakuada iti nabalitokan a likido?” 13  Gapuna kinunana kaniak: “Pudno kadi a saanmo nga ammo ti kaipapanan dagitoy a banag?” Kinunak kalpasanna: “Saan, apok.”+ 14  Iti kasta kinunana: “Dagitoy ti dua a napulotan+ a sitatakder iti sibay ti Apo ti intero a daga.”+

Footnotes