Mapan iti linaonna

Mapan iti segundario a pagpilian

Mapan iti listaan dagiti linaonna

Dagiti Saksi ni Jehova

Iloko

Online a Biblia | BARO A LUBONG A PATARUS TI NASANTUAN A KASURATAN

Zacarias 14:1-21

14  “Adtoy! Adda um-umayen nga aldaw, a kukua ni Jehova,+ ket ti samsammo sigurado a mabingaybingayto iti tengngam.  Ket sigurado nga ummongekto amin dagiti nasion maibusor iti Jerusalem maipaay iti gubat;+ ket pudno a makautibonto ti siudad+ ken makamkam dagiti balay, ket maramesto dagiti babbai a mismo.+ Ket ti kagudua ti siudad mapanto iti pannakaidestiero;+ ngem no maipapan kadagidiay nabatbati kadagiti umili,+ saandanto a magessat iti siudad.+  “Ket sigurado a rummuarto ni Jehova ket makigubat kadagidiay a nasion+ kas idi aldaw ti pannakigubatna, iti aldaw ti dangadang.+  Ket pudno nga agtakderto dagiti sakana iti dayta nga aldaw iti rabaw ti bantay dagiti kayo nga olibo, nga adda iti sango ti Jerusalem, iti daya;+ ket ti bantay dagiti kayo nga olibo+ mapisinto iti tengngana,+ manipud iti leleggakan ti init ken agpalaud. Addanto dakkel unay a ginget; ket ti kagudua ti bantay pudno a mayakarto iti agpaamianan, ket ti kaguduana iti agpaabagatan.  Ket sigurado nga agtalawkayto nga agturong iti ginget ti bambantayko;+ agsipud ta ti ginget ti bambantay dumanonto agingga idiay Azel. Ket kasapulanto nga agtalawkayo, kas iti itatalawyo gapu iti ginggined idi kaaldawan ni Ozias nga ari ti Juda.+ Ket ni Jehova a Diosko sigurado nga umayto,+ a maikuyog kenkuana amin dagidiay sasanto.+  “Ket mapasamakto iti dayta nga aldaw nga awanto ti napateg a lawag+—agbalayto ti bambanag.+  Ket agbalinto a maysa nga aldaw a maammuan kas kukua ni Jehova.+ Saanto nga aldaw, saanto met a rabii;+ ket mapasamakto nga iti tiempo ti rabii agbalinto a lawag.+  Ket mapasamakto iti dayta nga aldaw a ti nabiag a dandanum+ rummuarto manipud Jerusalem,+ ti kagudua kadakuada agturong iti makindaya a baybay+ ket ti kagudua kadakuada agturong iti makinlaud a baybay.+ Mapasamakto dayta iti kalgaw ken iti kalam-ekna.+  Ket ni Jehova agbalinto nga ari iti intero a daga.+ Iti dayta nga aldaw maymaysanto ni Jehova,+ ket ti naganna maymaysa.+ 10  “Ti intero a daga mabaliwanto a kas iti Araba,+ manipud Geba+ agingga iti Rimmon+ iti abagatan ti Jerusalem; ket ngumatonto ken agbalin a mapagnaedan iti lugarna,+ manipud iti Ruangan ti Benjamin+ agingga iti lugar ti Umuna a Ruangan, agingga iti Makinsuli a Ruangan, ken manipud iti Torre ni Hananel+ agingga kadagiti pagpespesan a tangke ti ari. 11  Ket sigurado a pagnaedanto dagiti tattao; ket awanton ti mapasamak nga aniaman a pannakaikudi iti pannakadadael,+ ket ti Jerusalem mapagnaedanto a sitatalged.+ 12  “Ket daytoyto ti agbalin a pannaplit a pangsaplit ni Jehova kadagiti amin nga ili a pudno a mangaramidto iti panagserbi iti militar maibusor iti Jerusalem:+ Addanto panagrunot ti lasag ti maysa, bayat a ti maysa sitatakder kadagiti sakana;+ ket dagiti mismo a mata ti maysa agrunotto kadagiti lungogda, ket ti mismo a dila ti maysa agrunotto iti ngiwatna. 13  “Ket mapasamakto iti dayta nga aldaw a ti pannakariribuk manipud ken Jehova agsaknapto kadakuada;+ ket pudno a gammatandanto, tunggal maysa ti ima ti kaduana, ket ti imana pudno a maitag-ayto maibusor iti ima ti kaduana. 14  Ket ti met Juda a mismo makigubatto idiay Jerusalem; ket sigurado a maummongto ti kinabaknang dagiti amin a nasion iti aglikmut, balitok ken pirak ken kawkawes a nakalablabes ti kinaruayda.+ 15  “Ket kastoyto ti pannaplit ti kabalio, ti mulo, ti kamelio, ken ti kalakian nga asno, ken ti tunggal kita ti naamo nga animal nga adda kadagidiay a pakarso, kas itoy a pannaplit. 16  “Ket mapasamakto a, no maipapan iti tunggal maysa a nabatbati manipud kadagiti amin a nasion nga umay a maibusor iti Jerusalem,+ masapul a sumang-atda met iti tinawentawen+ tapno agruknoyda iti Ari,+ ni Jehova ti buybuyot,+ ken tapno rambakanda ti piesta dagiti abong-abong.+ 17  Ket mapasamakto a, no maipapan iti asinoman manipud iti pampamilia+ ti daga a saan a sumang-at+ idiay Jerusalem tapno agruknoy iti Ari, ni Jehova ti buybuyot, kadakuada a mismo awanto ti dumteng nga agbuyat a tudo.+ 18  Ket no ti met laeng pamilia ti Egipto saan a sumang-at ket pudno a saan a sumrek, awanto met ti agpaay kadakuada. Dumtengto ti pannaplit a pangsaplit ni Jehova kadagiti nasion a saan a sumang-at a mangrambak iti piesta dagiti abong-abong. 19  Daytoy a mismo ti agbalinto a pannusa maipaay iti basol ti Egipto ken iti basol dagiti amin a nasion a saan a sumang-at a mangrambak iti piesta dagiti abong-abong.+ 20  “Iti dayta nga aldaw addanto+ kadagiti kampanilia ti kabalio ‘Ti kinasanto kukua ni Jehova!’+ Ket dagiti nalawa ti ngarabna a paglutuan a banga+ iti balay ni Jehova agbalindanto a kas kadagiti malukong+ iti sanguanan ti altar.+ 21  Ket tunggal nalawa ti ngarabna a paglutuan a banga iti Jerusalem ken iti Juda agbalinto a nasantuan a banag a kukua ni Jehova ti buybuyot, ket amin dagidiay agisaksakripisio umaydanto ket mangalada kadakuada ket agipaburekdanto kadakuada.+ Ket awanton ti Canaanita+ iti balay ni Jehova ti buybuyot iti dayta nga aldaw.”+

Footnotes