Accessibility setting

Agpili iti lengguahe

Mapan iti segundario a pagpilian

Mapan iti listaan dagiti linaonna

Mapan iti linaonna

Dagiti Saksi ni Jehova

Iloko

Online a Biblia

BARO A LUBONG A PATARUS TI NASANTUAN A KASURATAN

Zacarias 1:1-21

1  Iti maikawalo a bulan iti maikadua a tawen ni Dario+ dimteng ti sao ni Jehova ken Zacarias+ nga anak ni Berekias nga anak ni Iddo+ a mammadto, a kunkunana:  “Ni Jehova nagrurod kadagiti ammayo—iti kasta unay.+  “Ket masapul a kunaem kadakuada, ‘Daytoy ti kinuna ni Jehova ti buybuyot: “‘Agsublikayo kaniak,’+ kuna ni Jehova ti buybuyot, ‘ket agsubliakto kadakayo,’+ kinuna ni Jehova ti buybuyot.”’  “‘Dikay agbalin a kas kadagiti ammayo+ nga immawagan dagiti immun-una a mammadto,+ a kunkunada: “Daytoy ti kinuna ni Jehova ti buybuyot, ‘Agsublikayo, pangngaasiyo, manipud iti dakes a daldalanyo ken manipud kadagiti dakes a pannakilangenyo.’”’+ “‘Ngem saanda nga immimdeng, ket saandak nga impangag,’+ kuna ni Jehova.  “‘No maipapan kadagiti ammayo, sadino ti ayanda?+ Ket no maipapan kadagiti mammadto,+ agingga kadi iti tiempo a di nakedngan a nagtultuloyda nga agbiag?  Nupay kasta, no maipapan iti sasaok ken al-alagadek nga imbilinko iti ad-adipenko, dagiti mammadto,+ saanda kadi a nakamakam dagiti ammayo?’+ Gapuna nagsublida ket kinunada: ‘Maitunos iti adda iti panunot ni Jehova ti buybuyot nga aramiden kadatayo,+ maitunos iti daldalantayo ken maitunos kadagiti pannakilangentayo, kasta ti inaramidna kadatayo.’”+  Iti maikaduapulo ket uppat nga aldaw ti maikasangapulo ket maysa a bulan, awan sabali, ti bulan ti Sebat, iti maikadua a tawen ni Dario,+ ti sao ni Jehova dimteng ken Zacarias+ nga anak ni Berekias nga anak ni Iddo+ a mammadto, a kunkunana:  “Kimmitaak iti rabii, ket, adtoy! maysa a lalaki+ a sisasakay iti nalabaga a kabalio,+ ket siiintek iti tengnga dagiti kayo nga arrayan+ nga adda idi iti nauneg a lugar; ket iti likudanna adda kabkabalio a nalabaga, narangrang a nalabaga, ken puraw.”+  Ket ngarud kinunak: “Siasino dagitoy, apok?”+ Iti kasta kinuna kaniak ti anghel a makisasao+ kaniak: “Siak ipakitakto kenka no siasino dagitoy.” 10  Idin simmungbat ti lalaki a siiintek iti tengnga dagiti kayo nga arrayan ket kinunana: “Dagitoy isuda dagidiay imbaon ni Jehova nga agsursor iti daga.”+ 11  Ket simmungbatda iti anghel ni Jehova a sitatakder iti tengnga dagiti kayo nga arrayan ket kinunada: “Nagsursorkami iti daga,+ ket, adtoy! ti intero a daga adda a sitatalna ken awanan pannakasinga.”+ 12  Gapuna simmungbat ti anghel ni Jehova ket kinunana: “O Jehova ti buybuyot, kasanonto kabayag a saanka a mangipakita ti asi iti Jerusalem ken kadagiti siudad ti Juda,+ isuda a kinondenarmo kadagitoy pitopulo a tawen?”+ 13  Ket simmungbat ni Jehova iti anghel a makisasao kaniak, babaen iti naimbag a sasao, makaliwliwa a sasao;+ 14  ket kinuna kaniak ti anghel a makisasao kaniak: “Agpukkawka, a kunaem, ‘Daytoy ti kinuna ni Jehova ti buybuyot: “Nagimonak maipaay iti Jerusalem ken maipaay iti Sion buyogen ti dakkel a panagimon.+ 15  Buyogen iti dakkel a rurod marurodak maibusor kadagiti nasion nga agnamnam-ay;+ agsipud ta siak, iti biangko, bassit laeng ti panagrurodko,+ ngem isuda, iti biangda, timmulongda a maipaay iti didigra.”’+ 16  “Gapuna daytoy ti kinuna ni Jehova, ‘“Sigurado nga agsubliakto iti Jerusalem buyogen kadagiti asi.+ Ti bukodko a balay maibangonto kenkuana,”+ kuna ni Jehova ti buybuyot, “ket ti met laeng pagrukod a parteng mayunnatto iti rabaw ti Jerusalem.”’+ 17  “Agpukkawka pay, a kunaem, ‘Daytoy ti kinuna ni Jehova ti buybuyot: “Dagiti siudadko kaskasdi nga aglippiasdanto iti kinaimbag;+ ket pudno unay a ni Jehova kaskasdi nga agladladingitto gapu iti Sion+ ket pudno a piliennanto manen ti Jerusalem.”’”+ 18  Ket intangadko dagiti matak ket kimmitaak; ket, adtoy! adda uppat a sara.+ 19  Gapuna kinunak iti anghel a makisasao kaniak: “Ania dagitoy?” Kinunana kaniak kalpasanna: “Dagitoy dagiti sara a nangiwarawara iti Juda,+ Israel+ ken Jerusalem.”+ 20  Kanayonanna pay, nangipakita kaniak ni Jehova iti uppat a nasigo a trabahador. 21  Iti kasta kinunak: “Ania ti umay aramiden dagitoy?” Ket kinunana: “Dagitoy dagiti sara+ a nangiwarawara iti Juda iti kasta unay nga awan a pulos ti nangitangad iti ulona; ket umayto dagitoy a dadduma tapno pagpigergerenda ida, tapno ipadsoda dagiti sara ti nasnasion a mangitagtag-ay iti sara maibusor iti daga ti Juda, tapno isu iwarawarada.”+

Footnotes