Accessibility setting

Agpili iti lengguahe

Mapan iti segundario a pagpilian

Mapan iti listaan dagiti linaonna

Mapan iti linaonna

Dagiti Saksi ni Jehova

Iloko

Online a Biblia

BARO A LUBONG A PATARUS TI NASANTUAN A KASURATAN

Uk-ukom 9:1-57

9  Idi agangay ni Abimelec+ nga anak ni Jerubaal napan idiay Siquem+ iti kakabsat ni inana ket rinugianna ti nagsao kadakuada ken iti isuamin a pamilia ti balay ti ama ni inana, a kunkunana:  “Sawenyo, pangngaasiyo, iti pagdengngeg dagiti amin nga agtagtagikua iti daga iti Siquem, ‘Ania ti nasaysayaat kadakayo, a ti pitopulo a lallaki,+ dagiti amin nga annak ni Jerubaal, ti mangituray kadakayo wenno maymaysa a lalaki ti mangituray kadakayo? Ket masapul a laglagipenyo a siak ket tulangyo ken lasagyo.’”+  Gapuna ti kakabsat ni inana rinugianda a sinao amin dagitoy a sasao maipapan kenkuana iti pagdengngeg dagiti amin nga agtagtagikua iti daga iti Siquem iti kasta nagannayas ti pusoda ken Abimelec,+ ta kinunada: “Isu bukodtayo a kabsat.”+  Kalpasanna inikkanda iti pitopulo a kapisi a pirak manipud balay ni Baal-berit,+ ket babaen kadagita nangtangdan ni Abimelec kadagiti bayanggudaw ken nakuspag a lallaki,+ tapno isu kuyogenda.  Kalpasan dayta napan iti balay ni amana idiay Ofra+ ket pinatayna ti kakabsatna,+ ti annak ni Jerubaal, pitopulo a lallaki, iti rabaw ti maysa a bato, ngem natedda ni Jotam nga inaudian nga anak ni Jerubaal, gapu ta naglemmeng.  Kalpasanna naguummong a sangsangkamaysa dagiti amin nga agtagtagikua iti daga iti Siquem ken ti intero a balay ti Millo+ ket napanda ket pinagturayda ni Abimelec kas ari,+ iti asideg ti dakkel a kayo,+ ti adigi nga adda idi idiay Siquem.+  Idi impadamagda dayta ken Jotam madagdagus a napan ket nagtakder iti tapaw ti Bantay Gerizim+ ket impigsana ti timekna ket nagpukkaw ken kinunana kadakuada: “Imdengandak, dakayo nga agtagtagikua iti daga iti Siquem, ket imdengannakayo koma ti Dios:  “Idi un-unana a tiempo napan dagiti kayo tapno mangpulotda iti maysa nga ari kadakuada. Gapuna kinunada iti kayo nga olibo,+ ‘Agarika kadakami.’+  Ngem kinuna kadakuada ti kayo nga olibo, ‘Bay-akto kadi ti kinalukmegko a pangidaydayawda+ iti Dios ken iti tattao, ket mapanakto kadi agampayag iti ngatuen ti dadduma a kayo?’+ 10  Kalpasanna dagiti kayo kinunada iti kayo a higos,+ ‘Umayka, agreynaka kadakami.’ 11  Ngem kinuna kadakuada ti kayo a higos, ‘Bay-akto kadi ti kinasam-itko ken ti nasayaat a bungak, ket mapanakto kadi agampayag iti ngatuen ti dadduma a kayo?’+ 12  Sumaganad kinuna dagiti kayo iti puon ti ubas, ‘Umayka, agreynaka kadakami.’ 13  Kalpasanna kinuna kadakuada ti puon ti ubas, ‘Bay-akto kadi ti baro nga arakko a mangparag-o iti Dios ken iti tattao,+ ket mapanakto kadi agampayag iti ngatuen ti dadduma a kayo?’ 14  Kamaudiananna ti amin a sabsabali a kayo kinunada iti siitsiitan,+ ‘Umayka, agarika kadakami.’ 15  Gapu itoy ti siitsiitan kinunana kadagiti kayo, ‘No pudno a pulotandak kas ari kadakayo, umaykayo, agkamangkayo iti sirok ti salinongko.+ Ngem no saan, rummuar koma ti apuy+ manipud siitsiitan ket ibusenna dagiti sedro+ ti Libano.’+ 16  “Ket ita no pudno ken iti kinaawan pagkuranganna a nagtignaykayo ken pinagbalinyo nga ari ni Abimelec,+ ken no kinaimbag ti winatwatyo maipaay ken Jerubaal ken iti sangakabbalayanna, ken no inaramidyo kenkuana ti maikari iti ar-aramid dagiti imana, 17  idi nakirupak+ ni amak maipaay kadakayo ken inrisgona ti kararuana+ tapno maispalnakayo iti ima ti Midian;+ 18  ket dakayo, iti biangyo, timmakderkayo a maibusor iti sangakabbalayan ni amak ita nga aldaw tapno papatayenyo ti annakna,+ pitopulo a lallaki,+ iti rabaw ti maysa a bato, ken tapno pagbalinenyo ni Abimelec, ti anak ti adipenna a babai,+ nga ari+ kadagiti agtagtagikua iti daga iti Siquem gapu laeng ta isu bukodyo a kabsat; 19  wen, no pudno ken iti kinaawan pagkuranganna a nagtignaykayo ken Jerubaal ken iti sangakabbalayanna itoy nga aldaw, agrag-okayo gapu ken Abimelec ket isu agrag-o met koma gapu kadakayo.+ 20  Ngem no saan, rummuar koma ti apuy+ manipud ken Abimelec ket ibusenna dagiti agtagtagikua iti daga iti Siquem ken ti balay ti Millo,+ ket rummuar koma ti apuy+ manipud kadagiti agtagtagikua iti daga iti Siquem ken iti balay ti Millo ket ibusenna ni Abimelec.”+ 21  Kalpasanna nagtalaw ni Jotam+ ket nagtartaray ket napan idiay Beer, ket nagnaed sadiay gapu ken Abimelec a kabsatna. 22  Ket intultuloy nga inakem ni Abimelec ti kinaprinsipe iti Israel iti tallo a tawen.+ 23  Kalpasanna binay-an ti Dios a tumanor ti maysa a dakes nga espiritu+ iti nagbaetan ni Abimelec ken dagiti agtagtagikua iti daga iti Siquem, ket dagiti agtagtagikua iti daga iti Siquem nakilangenda a sigugulib+ ken Abimelec, 24  tapno dumteng ti kinaranggas a naaramid iti pitopulo nga annak ni Jerubaal+ ken tapno iparabawna ti darada ken Abimelec a kabsatda gapu ta pinatayna ida,+ ken kadagiti agtagtagikua iti daga iti Siquem gapu ta pinapigsada dagiti imana+ a mangpapatay iti kakabsatna. 25  Gapuna dagiti agtagtagikua iti daga iti Siquem nangisaadda maipaay kenkuana iti lallaki nga agsaneb kadagiti tapaw ti bambantay, ket rabsutanda ti tunggal maysa a lumabas kadakuada iti dalan. Idi agangay naipadamag dayta ken Abimelec. 26  Kalpasanna immay ni Gaal+ nga anak ni Ebed ken ti kakabsatna ket immallatiwda iti Siquem,+ ket nangrugi nga agtalek kenkuana dagiti agtagtagikua iti daga iti Siquem.+ 27  Ket napanda kas gagangay iti talon ket nagburasda kadagiti ubas dagiti kaubasanda ken imbaddebaddekda ida ken nangangayda iti piesta ti panagrag-o,+ a kalpasan dayta simrekda iti balay ti diosda+ ket nangan ken imminumda+ ket indawdawatda ti pakadaksan+ ni Abimelec. 28  Ket kinuna ni Gaal nga anak ni Ebed: “Siasino ni Abimelec,+ ken siasino ni Siquem tapno agserbitayo kenkuana? Saan kadi nga isu ti anak ni Jerubaal,+ ket saan kadi a komisionadona ni Zebul?+ Agserbikayo kadagiti lallaki ni Hamor,+ ama ni Siquem, dakayo a sabsabali, ngem apay a rebbeng nga agserbikami kenkuana? 29  Ket no koma laeng adda iti imak daytoy nga ili!+ Iti kasta ikkatek ni Abimelec.” Ket kinunana ken Abimelec: “Paaduem ti buyotmo ket rummuarka.”+ 30  Ket nangngeg ni Zebul a prinsipe ti siudad ti sasao ni Gaal nga anak ni Ebed.+ Idin gimmil-ayab ti ungetna. 31  Gapuna sisisikap a nagbaon kadagiti mensahero a mapan ken Abimelec, a kunkunana: “Adtoy! Ni Gaal nga anak ni Ebed ken ti kakabsatna umayda ita iti Siquem,+ ket adtoy paguurnongenda ti siudad maibusor kenka. 32  Ket ita tumakderka iti rabii,+ sika ken dagiti umili a naikuyog kenka, ket agpadaankayo+ idiay tay-ak. 33  Ket mapasamakto iti bigat nga apaman nga agsilnag ti init rebbeng a bumangonka a nasapa, ket duklosemto ti siudad; ket inton isu ken dagiti umili a naikuyog kenkuana rummuarda maibusor kenka, aramidemto met kenkuana kas iti masarakan ta imam a mabalinna nga aramiden.” 34  Iti kasta ni Abimelec ken amin dagiti umili a naikuyog kenkuana timmakderda iti rabii, ket rinugianda ti agpadaan maibusor iti Siquem iti uppat a bunggoy. 35  Idi agangay rimmuar ni Gaal+ nga anak ni Ebed ket nagtakder iti pagserkan ti ruangan ti siudad. Idin ni Abimelec ken dagiti umili a naikuyog kenkuana rimkuasda manipud lugar a pagsaneban. 36  Idi naimatangan ni Gaal dagiti umili, madagdagus a kinunana ken Zebul: “Adtoy! Adda tattao a sumalsalog manipud kadagiti tapaw ti bambantay.” Ngem kinuna kenkuana ni Zebul: “Dagiti anniniwan ti bambantay isu ti makitkitam a kaslada tattao.”+ 37  Idi agangay nagsao ni Gaal iti naminsan pay ket kinunana: “Adtoy! Adda tattao a sumalsalog manipud tengnga ti daga, ket um-umay ti maysa a bunggoy a dumalan iti dakkel a kayo ti Meonenim.” 38  Gapu itoy kinuna kenkuana ni Zebul: “Sadino ita ti ayan dayta sasaom nga insawangmo,+ ‘Siasino ni Abimelec tapno agserbitayo kenkuana?’+ Saan aya a daytoy ti ili a linaksidmo?+ Rummuarka ita, pangngaasim, ket makirupakka kadakuada.” 39  Gapuna rimmuar ni Gaal iti sango dagiti agtagtagikua iti daga iti Siquem ket nakidangadang ken Abimelec. 40  Ket isu kinamat ni Abimelec, ket nagtalaw iti sanguananna; ket dagiti napapatay nagtultuloy a napasag a nakaad-adu agingga iti pagserkan ti ruangan. 41  Ket ni Abimelec nagtultuloy nga agnaed idiay Aruma, ket ni Zebul+ pinagtalawna ni Gaal+ ken ti kakabsatna manipud panagnaedda idiay Siquem.+ 42  Ket naaramid iti sumaganad nga aldaw a nangrugi a rummuar dagiti umili a mapan iti tay-ak. Gapuna imbagada ken Abimelec.+ 43  Ngarud innalana dagiti umili ket biningbingayna ida iti tallo a bunggoy+ ket rinugianda ti agpadaan iti tay-ak. Kalpasanna kimmita, ket sadiay rumrummuar dagiti umili manipud siudad. Timmakder ita a bumusor kadakuada ket pinapatayna ida. 44  Ket ni Abimelec ken dagiti bunggoy a naikuyog kenkuana dimmuklosda tapno makapagtakderda iti pagserkan ti ruangan ti siudad, bayat a dimmuklos ti dua a bunggoy maibusor kadagiti amin nga adda iti tay-ak, ket pinapatayda ida.+ 45  Ket ni Abimelec nakirupak iti siudad iti intero dayta nga aldaw ket nakautibona ti siudad; ket pinatayna dagiti umili nga adda iti dayta,+ a kalpasan dayta rinugpona ti siudad+ ket minulaanna iti asin.+ 46  Idi nangngeg dayta dagiti amin nga agtagtagikua iti daga iti torre ti Siquem, napanda a dagus iti immarko a pagkamangan ti balay ni El-berit.+ 47  Kalpasanna naipadamag ken Abimelec nga amin dagiti agtagtagikua iti daga iti torre ti Siquem naguummongda a sangsangkamaysa. 48  Iti kasta simmang-at ni Abimelec iti Bantay Zalmon,+ isu ken amin dagiti umili a naikuyog kenkuana. Nangala ita ni Abimelec iti wasay iti imana ket nangpukan iti sanga dagiti kayo ket binagkatna ket inkabilna iti abagana ket kinunana kadagiti umili a naikuyog kenkuana: “Ti nakitayo nga inaramidko—darasenyo, aramidenyo kas iti inaramidko!”+ 49  Gapuna dagiti umili nagpukanda met tunggal maysa iti sanga maipaay iti bagina ket simmurotda ken Abimelec. Kalpasanna inyampirda ida iti immarko a pagkamangan, ket iti ngatuenda inuramda ti immarko a pagkamangan, iti kasta natay met dagiti amin a tattao ti torre ti Siquem, agarup sangaribu a lallaki ken babbai.+ 50  Ket napan ni Abimelec idiay Tebes+ ket nagpakarso maibusor iti Tebes ket kinautibona. 51  Yantangay adda idi ti maysa a nalagda a torre iti tengnga ti siudad, sadiay a nagkamang amin a lallaki ken babbai ken amin nga agtagikua iti daga iti siudad, a kalpasan dayta inrikepda dayta iti likudanda ket immulida iti pangatepan ti torre. 52  Ket napan ni Abimelec iti torre ket rinugianna ti nakirupak iti dayta, ket nagtultuloy a simmang-at nga umasideg iti pagserkan ti torre tapno puoranna iti apuy.+ 53  Idin adda babai a nangitapuak iti makinrabaw a bato ti gilingan iti ulo ni Abimelec ket naburak ti bangabangana.+ 54  Gapuna sidadaras nga inayabanna ti katulonganna nga agaw-awit kadagiti igamna ket kinunana kenkuana: “Asutem ta kampilanmo ket papatayennak,+ ta amangan no kunaenda maipapan kaniak, ‘Maysa idi a babai ti nangpatay kenkuana.’” Dagus a sinalput ti katulonganna, iti kasta natay.+ 55  Idi nakita dagiti lallaki ti Israel a natayen ni Abimelec, napanda ita tunggal maysa iti lugarna. 56  Iti kasta ti Dios pinagballatekna ti kinadakes ni Abimelec nga inaramidna iti amana iti panangpatayna iti pitopulo a kakabsatna.+ 57  Ket ti isuamin a kinadakes dagiti lallaki ti Siquem imballatek ti Dios iti rabaw dagiti bukodda nga ulo, tapno ti lunod+ ni Jotam+ nga anak ni Jerubaal+ dumteng kadakuada.+

Footnotes