Mapan iti linaonna

Mapan iti segundario a pagpilian

Mapan iti listaan dagiti linaonna

Dagiti Saksi ni Jehova

Iloko

Online a Biblia | BARO A LUBONG A PATARUS TI NASANTUAN A KASURATAN

Uk-ukom 8:1-35

8  Kalpasanna kinuna kenkuana dagiti lallaki ti Efraim: “Ania a kita ti banag daytoy nga inaramidmo kadakami iti saanmo a panangayab kadakami idi napanka nakirupak iti Midian?”+ Ket sipipinget a pinadasda ti makiriri kenkuana.+  Kamaudiananna kinunana kadakuada: “Ania ita ti inaramidko a maipadis kadakayo?+ Saan aya a dagiti maadas ti Efraim+ nasaysayaatda ngem iti maburas nga ubas ti Abi-ezer?+  Ita imayo ti nangyawatan ti Dios kadagiti prinsipe ti Midian a da Oreb ken Zeeb,+ ket ania ti nabalinak nga aramiden a maipadis kadakayo?” Iti daydin a timmalinaay ti espirituda kenkuana idi sinaona daytoy a sao.+  Iti kamaudiananna dimteng ni Gideon iti Jordan, a binallasiwna dayta, isu ken ti tallo gasut a lallaki a naikuyog kenkuana, nabannogda ngem intultuloyda ti panangkamat.  Idi agangay kinunana kadagiti lallaki ti Succot:+ “Pangngaasiyo ta mangtedkayo kadagiti nagbukel a tinapay kadagiti umili a sumursurot kadagiti addangko,+ ta nabannogda ket kamkamatek da Zeba+ ken Zalmunna,+ ti ar-ari ti Midian.”  Ngem kinuna dagiti prinsipe ti Succot: “Adda kadin ita imam dagiti dakulap ni Zeba ken ni Zalmunna tapno ti buyotmo kasapulan a maipaayan iti tinapay?”+  Gapu itoy kinuna ni Gideon: “Dayta ti makagapu nga inton iyawat ni Jehova iti imak da Zeba ken Zalmunna, sigurado nga irikekto ti lasagyo babaen kadagiti sisiitan ti let-ang ken kadagiti siitan.”+  Ket nagtultuloy iti dalanna a sumang-at manipud sadiay agingga iti Penuel+ ket nagsao kadakuada iti kastoy met laeng a pamay-an, ngem simmungbat kenkuana dagiti lallaki ti Penuel kas iti insungbat dagiti tattao ti Succot.  Gapuna kinunana met kadagiti lallaki ti Penuel: “Inton agsubliak a sitatalna, rugpuekto daytoy a torre.”+ 10  Ita da Zeba ken Zalmunna+ addada idi idiay Carcor, ket naikuyog kadakuada dagiti pakarsoda, agarup sangapulo ket lima a ribuda amin a natedda manipud iti intero a pakarso dagiti taga Daya;+ ket dagidiay napasagen sangagasut ket duapulo a ribu a lallaki nga agas-asut idi iti kampilan.+ 11  Ket nagtultuloy a simmang-at ni Gideon iti dalan dagidiay agtataeng kadagiti tolda nga agturong iti daya ti Noba ken Jogbea+ ket rinugianna a kabilen ti pakarso bayat a ti pakarso di sipupuot.+ 12  Idi nagtalaw da Zeba ken Zalmunna, madagdagus a kinamatna ida ket nakautibona ti dua nga ari ti Midian, da Zeba ken Zalmunna;+ ket pinagpigergerna ti intero a pakarso. 13  Ket ni Gideon nga anak ni Joas rinugianna ti panagsublina manipud gubat babaen ti bessang a sumang-at iti Heres. 14  Iti dalan kinautibona ti maysa nga agtutubo kadagiti lallaki ti Succot+ ket nagim-imtuod kenkuana.+ Iti kasta insuratna maipaay kenkuana ti nagnagan dagiti prinsipe+ ti Succot ken dagiti lallakayna, pitopulo ket pito a lallaki. 15  Gapuna napan kadagiti lallaki ti Succot ket kinunana: “Adtoy da Zeba ken Zalmunna a maipapan kadakuada rinuroddak, a kinunayo, ‘Adda kadin iti imam dagiti dakulap ni Zeba ken ni Zalmunna tapno dagiti nabannogan a lallakim kasapulan a maipaayan iti tinapay?’”+ 16  Idin innalana dagiti lallakay ti siudad ken ti sisiitan ti let-ang ken dagiti siitan, ket dagita ti pinangsursurona kadagiti lallaki ti Succot.+ 17  Ket rinugpona+ ti torre ti Penuel,+ ket pinatayna dagiti lallaki ti siudad. 18  Kinunana ita kada Zeba ken Zalmunna:+ “Ania a kita ti tattao dagiti pinatayyo idiay Tabor?”+ Iti daytoy kinunada: “Kas kenka, kastada idi, tunggal maysa, umasping iti annak ti maysa nga ari ti langada.” 19  Iti kasta kinunana: “Isuda ti kakabsatko, ti annak ni inak. Kas sibibiag ni Jehova, no tinaginayonyo ida a sibibiag, saan koma a kasapulan a patayenkayo.”+ 20  Idin kinunana ken Jeter nga inaunana: “Tumakderka, papatayem ida.” Ket saan nga inasut ti agtutubo ti kampilanna, agsipud ta mabuteng, ta agtutubo pay laeng.+ 21  Gapuna kinuna da Zeba ken Zalmunna: “Tumakderka ket darupennakami, ta no kasano ti lalaki, kasta ti kinamannakabalinna.”+ Iti kasta timmakder ni Gideon ket pinapatayna+ da Zeba ken Zalmunna ket innalana dagiti sinanbulan nga arkos nga adda kadagiti tengnged dagiti kamelioda. 22  Idi agangay dagiti lallaki ti Israel kinunada ken Gideon: “Agturayka kadakami,+ sika ken ti anakmo ken kasta met ti apokom, ta insalakannakami iti ima ti Midian.”+ 23  Ngem kinuna kadakuada ni Gideon: “Siak saanakto nga agturay kadakayo, wenno uray ti anakko saanto nga agturay kadakayo.+ Ni Jehova isu ti agturayto kadakayo.”+ 24  Ket intultuloy a kunaen kadakuada ni Gideon: “Agkiddawak kadakayo: Itedyo kaniak, tunggal maysa kadakayo, ti aritos ti agong+ a nakamkamna.” (Ta addaanda kadagiti balitok nga aritos ti agong, agsipud ta Ismaelitada.)+ 25  Idin kinunada: “Sigurado nga itedminto ida.” Gapuna nangyaplagda iti kagay ket impurruakda iti dayta tunggal maysa ti aritos ti agong a nakamkamna. 26  Ket ti dagsen dagiti kiniddawna a balitok nga aritos ti agong nagdagup iti sangaribu pito gasut a siklo a balitok, malaksid dagiti sinan-bulan nga arkos+ ken dagiti bitinbitin ti lapayag ken dagiti kawes a delana a natinaan iti lumabaga a purpura+ nga adda idi iti ar-ari ti Midian ken malaksid dagiti kuentas nga adda kadagiti tengnged dagiti kamelio.+ 27  Ket inaramid ni Gideon a maysa nga efod+ ket impabuyana iti siudadna nga Ofra;+ ket ti intero nga Israel nangrugi a maaddaan iti imoral a pannakidenna iti dayta sadiay,+ iti kasta nagserbi dayta a maysa a silo ken Gideon ken iti sangakabbalayanna.+ 28  Iti kasta naparukma ti Midian+ iti sanguanan ti annak ti Israel, ket saanda nga intangaden ti uloda; ket ti daga awananen iti pannakasinga iti uppat a pulo a tawen idi kaaldawan ni Gideon.+ 29  Ket ni Jerubaal+ nga anak ni Joas napan ket nagtultuloy nga agnaed iti balayna. 30  Ket naaddaan ni Gideon iti pitopulo nga annak+ a nagtaud iti makinngato a luppona, ta naaddaan iti adu nga assawa. 31  No maipapan iti kamalalana nga adda idi idiay Siquem, nangipasngay met kenkuana iti maysa nga anak a lalaki. Gapuna pinanagananna iti Abimelec.+ 32  Iti kamaudiananna ni Gideon nga anak ni Joas natay iti naimbag a kinalakay ket naitabon iti lugar a pagitabonan ni Joas nga amana idiay Ofra dagiti Abi-ezerita.+ 33  Ket naaramid nga apaman a natay ni Gideon naaddaan manen ti annak ti Israel iti imoral a pannakidenna kadagiti Baal,+ iti kasta intudingda ni Baal-berit kas diosda.+ 34  Ket ti annak ti Israel saanda a linagip ni Jehova a Diosda,+ a nangispal kadakuada iti ima dagiti amin a kabusorda iti aglikmut;+ 35  ket saanda a winatwat ti naayat a kinamanangngaasi+ maipaay iti sangakabbalayan ni Jerubaal, ni Gideon, kas subad ti isuamin a kinaimbag a winatwatna maipaay iti Israel.+

Footnotes