Accessibility setting

Agpili iti lengguahe

Mapan iti segundario a pagpilian

Mapan iti listaan dagiti linaonna

Mapan iti linaonna

Dagiti Saksi ni Jehova

Iloko

Online a Biblia

BARO A LUBONG A PATARUS TI NASANTUAN A KASURATAN

Uk-ukom 6:1-40

6  Kalpasanna rinugian nga aramiden ti annak ti Israel no ania ti dakes kadagiti mata ni Jehova.+ Gapuna inyawat ida ni Jehova iti ima ti Midian+ iti pito a tawen.  Ket ti ima ti Midian inabakna ti Israel.+ Gapu iti Midian inaramid ti annak ti Israel maipaay iti bagbagida dagiti disso a pagidulinan iti uneg ti daga nga adda iti bambantay, ken dagiti rukib ken dagiti lugar a narigat nga asitgan.+  Ket napasamak a, no nagimula ti Israel iti bin-i,+ ti Midian ken Amalek+ ken dagiti taga Daya+ simmang-atda, wen, simmang-atda a bumusor kadakuada.  Ket agpakarsoda maibusor kadakuada ket dadaelenda ti bunga ti daga agingga iti Gaza, ket saanda a mangitedda iti Israel iti aniaman a pagtaraon wenno karnero wenno toro wenno asno.+  Ta isuda ken dagiti dinguenda sumang-atda agraman dagiti toldada. Umayda a nakaad-adu kas kadagiti dudon,+ ket isuda ken dagiti kamelioda awanan bilang;+ ket umayda iti daga tapno dadaelenda dayta.+  Ket ti Israel pimmanglaw iti kasta unay gapu iti Midian; ket ti annak ti Israel nangrugi nga umasug ken Jehova maipaay iti tulong.+  Ket naaramid a gapu ta ti annak ti Israel immasug ken Jehova maipaay iti tulong maigapu iti Midian,+  nangibaon ni Jehova iti maysa a lalaki, maysa a mammadto,+ a mapan iti annak ti Israel ket kinunana kadakuada: “Daytoy ti kinuna ni Jehova a Dios ti Israel, ‘Siak ti nangaon kadakayo iti Egipto+ ket iti kasta inruarkayo manipud balay dagiti adipen.+  Gapuna inispalkayo iti ima ti Egipto ken iti ima dagiti amin a mangirurrurumen kadakayo ket pinagtalawko ida iti sanguananyo ket intedko kadakayo ti dagada.+ 10  Kanayonanna pay, kinunak kadakayo: “Siak ni Jehova a Diosyo.+ Dikay pagbutngan ti didios dagiti Amoreo+ nga iti dagada agnanaedkayo.”+ Ket saankayo nga immimdeng iti timekko.’”+ 11  Idi agangay immay ti anghel+ ni Jehova ket nagtugaw iti sirok ti dakkel a kayo nga adda idiay Ofra, a kukua ni Joas nga Abi-ezerita,+ bayat a ni Gideon+ nga anakna agibatbatbat idi iti trigo idiay pagpespesan ti ubas tapno mailemmeng dayta a sidadaras iti panagkita ti Midian. 12  Idin nagparang kenkuana ti anghel ni Jehova ket kinunana kenkuana: “Ni Jehova adda kenka,+ sika a maingel, mannakabalin.” 13  Gapu itoy kinuna kenkuana ni Gideon: “Dispensarennak, apok, ngem no adda kadakami ni Jehova, apay ngarud a dimteng amin daytoy kadakami,+ ken sadino ti ayan ti amin a nakaskasdaaw nga ar-aramidna+ nga insalaysay kadakami dagiti ammami,+ a kinunada, ‘Saan aya a manipud Egipto nga inaonnatayo ni Jehova?’+ Ket ita pinanawannakamin ni Jehova,+ ket iyawatnakami iti dakulap ti Midian.” 14  Kalpasan dayta isu sinango ni Jehova ket kinunana: “Mapanka iti daytoy a pannakabalinmo,+ ket pudno unay nga isalakanmonto ti Israel manipud dakulap ti Midian.+ Saan kadi nga ibaonka?”+ 15  Kalpasanna kinunana kenkuana: “Dispensarennak, Jehova. Anianto ti pangisalakanko iti Israel?+ Adtoy! Ti sangaribuk isu ti kanunumuan iti Manases, ket siak ti kabassitan iti balay ni amak.”+ 16  Ngem kinuna kenkuana ni Jehova: “Agsipud ta addaakto kenka,+ ket pudno unay a kabilemto ti Midian+ a kasla maymaysa a tao.” 17  Gapu itoy kinunana kenkuana: “No, ita, nakasarakak iti pabor kadagita matam,+ masapul met nga iyaramidannak iti pagilasinan a sika ti makisasao kaniak.+ 18  Pangngaasim, dika pumanaw ditoy agingga nga umayak kenka+ ket nairuarkon ti sagutko ket ikabilko iti sangom.”+ Iti kasta kinunana: “Siak, iti biangko, agtalinaedakto a situtugaw ditoy agingga nga agsublika.” 19  Ket simrek ni Gideon ket nangisagana iti maysa nga urbon dagiti kalding+ ken iti maysa nga efa nga arina a kas di pinaalsa a tintinapay.+ Ti karne inkabilna iti labba, ket ti digo inkabilna iti paglutuan a banga, a kalpasan dayta inruarna nga impan kenkuana iti sirok ti dakkel a kayo ket inserbina. 20  Kinuna ita kenkuana ti anghel ti pudno a Dios: “Alaem ti karne ken ti di pinaalsa a tintinapay ket ikabilmo ida iti dakkel a bato sadiay,+ ket ibuyatmo ti digo.” Gapuna inaramidna ti kasta. 21  Idin indugsol ti anghel ni Jehova ti murdong ti sarukod nga adda iti imana ket sinagidna ti karne ken ti di pinaalsa a tintinapay, ket ti apuy nangrugi nga agpangato manipud iti bato ket inibusna ti karne ken ti di pinaalsa a tintinapay.+ No maipapan iti anghel ni Jehova, nagpukaw iti imatangna. 22  Iti kasta nabigbig ni Gideon nga isu ket anghel ni Jehova.+ Madagdagus a kinuna ni Gideon: “Ay, Soberano nga Apo Jehova, iti rason a nakitak a rupanrupa ti anghel ni Jehova!”+ 23  Ngem kinuna kenkuana ni Jehova: “Maaddaanka koma iti talna.+ Dika agbuteng.+ Saankanto a matay.”+ 24  Gapuna ni Gideon nangbangon sadiay iti altar+ ken Jehova, ket agtultuloy a maawagan+ iti Jehova-salom agingga itoy nga aldaw. Adda pay laeng idiay Ofra+ dagiti Abi-ezerita. 25  Ket naaramid bayat dayta a rabii a kinuna kenkuana ni Jehova: “Alaem ti urbon a toro, ti toro a kukua ni amam, awan sabali, ti maikadua nga urbon a toro a pito ti tawenna, ket masapul a rebbaem ti altar ni Baal+ a kukua ni amam, ket ti sagrado a teddek nga adda iti sibay dayta rebbeng a pukanem.+ 26  Ket masapul a mangbangonka iti altar ken Jehova a Diosmo iti uluanan daytoy a salindeg, babaen iti intar ti batbato, ket masapul nga alaem ti maikadua nga urbon a toro ket idatonmo a kas daton a mapuoran kadagiti pedaso a kayo ti sagrado a teddek a pukanemto.” 27  Iti kasta nangala ni Gideon iti sangapulo a lallaki kadagiti adipenna ket inaramidna kas iti sinao kenkuana ni Jehova;+ ngem naaramid a, yantangay nagbuteng iti kasta unay iti sangakabbalayan ni amana ken kadagiti lallaki ti siudad nga aramidenna dayta iti aldaw, inaramidna dayta iti rabii.+ 28  Idi a dagiti lallaki ti siudad bimmangonda a nasapa iti bigat kas gagangay, ay ket, adtoy! ti altar ni Baal narugpon ket ti sagrado a teddek+ nga adda iti abayna napukanen, ket ti maikadua nga urbon a toro naidatonen iti naibangon nga altar. 29  Ket rinugianda a kunaen iti maysa ken maysa: “Siasino ti nangaramid itoy a banag?” Ket nagim-imtuodda ken nagsapsapulda. Kamaudiananna kinunada: “Ni Gideon nga anak ni Joas ti nangaramid itoy a banag.” 30  Gapuna dagiti lallaki ti siudad kinunada ken Joas: “Iruarmo ti anakmo tapno matay,+ agsipud ta rinugpona ti altar ni Baal, ken agsipud ta pinukanna ti sagrado a teddek nga adda iti sibay dayta.” 31  Gapu itoy kinuna ni Joas+ kadagidiay amin a nagtakder maibusor kenkuana:+ “Dakayto kadi ti mangaramid iti legal a panangikalintegan ken Baal tapno kitaenyo no dakayo maisalakanyo? Siasinoman a mangaramid iti legal a panangikalintegan kenkuana rebbeng a mapapatay iti daytoy met laeng a bigat.+ No isu Dios,+ bay-anyo a mangaramid iti legal a panangikalintegan iti bagina,+ agsipud ta adda nangrugpo iti altarna.” 32  Ket rinugianna nga awagan iti Jerubaal+ iti dayta nga aldaw, a kunkunana: “Bay-anyo ni Baal a mangaramid iti legal a panangikalintegan maigapu kenkuana met laeng, agsipud ta adda nangrugpo iti altarna.”+ 33  Ket ti isuamin a Midian+ ken Amalek+ ken dagiti taga Daya+ naguummongda a sangsangkamaysa+ ket immallatiwda ket nagpakarsoda iti nababa a tanap ti Jezrael.+ 34  Ket ti espiritu ni Jehova+ binalkutna ni Gideon iti kasta pinuyotna ti tangguyob,+ ket naayaban nga agsangsangkamaysa dagiti Abi-ezerita+ a sumurot kenkuana. 35  Ket nagbaon kadagiti mensahero+ iti intero a Manases, ket naayabanda met nga agsangsangkamaysa a sumurot kenkuana. Nagbaon met kadagiti mensahero iti Aser ken Zabulon ken Neftali, ket simmang-atda a sumabet kenkuana. 36  Kalpasanna kinuna ni Gideon iti pudno a Dios: “No isalakanmo ti Israel babaen kaniak, kas iti inkarim,+ 37  adtoy pagtalinaedek a nakapalnaaw ti dutdot a delana iti pagirikan. No ti linnaaw maadda iti dutdot laeng ngem iti intero a daga adda kinamaga, ngarud masapul a maammuak nga isalakanmonto ti Israel babaen kaniak, kas iti inkarim.” 38  Ket nagbanag a kasta. Idi bimmangon a nasapa iti sumaganad nga aldaw ket pinekkelna ti dutdot, nakapespes iti umdas a linnaaw manipud iti dutdot a mangpunno iti danum iti dakkel a malukong ti bangkete. 39  Nupay kasta, kinuna ni Gideon iti pudno a Dios: “Saan koma a gumil-ayab ti ungetmo maibusor kaniak, ngem bay-annak nga agsao iti maminsan laengen. Bay-annak, pangngaasim, a mangsubok iti maminsan laengen babaen iti dutdot. Mapasamak koma, pangngaasim, ti kinamaga iti dutdot laeng, ket iti rabaw ti intero a daga maadda koma ti linnaaw.” 40  Gapuna inaramid ti Dios ti kasta iti dayta a rabii; ket naadda ti kinamaga iti dutdot laeng, ket iti rabaw ti intero a daga dimteng ti linnaaw.

Footnotes