Accessibility setting

Agpili iti lengguahe

Mapan iti segundario a pagpilian

Mapan iti listaan dagiti linaonna

Mapan iti linaonna

Dagiti Saksi ni Jehova

Iloko

Online a Biblia

BARO A LUBONG A PATARUS TI NASANTUAN A KASURATAN

Uk-ukom 3:1-31

3  Ita dagitoy ti nasnasion+ a binay-an ni Jehova nga agtalinaed tapno masubok+ ti Israel babaen kadakuada, awan sabali, amin dagidiay saan a nakapadas iti aniaman kadagiti gubat ti Canaan;+  tapno laeng maaddaan iti kapadasan dagiti kaputotan ti annak ti Israel, iti kasta masursuruanda iti gubat, awan sabali, dagidiay laeng saan a nakapadas iti kasta a bambanag sakbay dayta:  Ti lima nga aliado nga appo+ dagiti Filisteo,+ ken amin dagiti Canaanita,+ uray dagiti Sidonio+ ken dagiti Heveo+ nga agnanaed iti Bantay Libano+ manipud Bantay Baal-hermon+ agingga iti seserkan ti Hamat.+  Ket nagserserbida kas ahente a mangsubok+ iti Israel tapno maammuan no agtulnogda met laeng iti bilbilin ni Jehova nga imbilinna kadagiti ammada babaen ken Moises.+  Ket nagnaed ti annak ti Israel iti nagtetengngaan dagiti Canaanita,+ dagiti Heteo ken dagiti Amoreo ken dagiti Perizeo ken dagiti Heveo ken dagiti Jebuseo.+  Ket innalada ti annakda a babbai kas assawa maipaay iti bagbagida,+ ket ti bukodda nga annak a babbai intedda iti annakda a lallaki,+ ket nagserbida iti didiosda.+  Gapuna inaramid ti annak ti Israel no ania ti dakes kadagiti mata ni Jehova, ket nagbalinda a mananglipat ken Jehova a Diosda+ ket nagserserbida kadagiti Baal+ ken kadagiti sagrado a teddek.+  Gapu itoy gimmil-ayab ti unget ni Jehova iti Israel,+ iti kasta inlakona+ ida iti ima ni Cusan-risataim nga ari ti Mesopotamia;+ ket ti annak ti Israel nagtultuloyda nga agserbi ken Cusan-risataim iti walo a tawen.  Ket ti annak ti Israel nangrugi nga umasug ken Jehova maipaay iti tulong.+ Idin nangibangon ni Jehova iti manangisalakan+ maipaay iti annak ti Israel tapno maisalakanna ida, ni Otniel+ nga anak ni Quenaz,+ ti ub-ubing a kabsat ni Caleb.+ 10  Dimteng ita kenkuana ti espiritu+ ni Jehova, ket isu ti nagbalin nga ukom ti Israel. Idi rimmuar iti bakal, idin inyawat ni Jehova iti imana ni Cusan-risataim nga ari ti Siria iti kasta riningbawan ti imana+ ni Cusan-risataim. 11  Kalpasan dayta awanen pannakasinga ti daga iti uppat a pulo a tawen. Kamaudiananna natay ni Otniel nga anak ni Quenaz. 12  Ket iti naminsan pay inar-aramid ti annak ti Israel no ania ti dakes kadagiti mata ni Jehova.+ Iti kasta binay-an ni Jehova a pumigsa ni Eglon nga ari ti Moab+ maibusor iti Israel,+ agsipud ta inaramidda no ania ti dakes kadagiti mata ni Jehova.+ 13  Kanayonanna pay, inummongna maibusor kadakuada ti annak da Ammon+ ken Amalek.+ Kalpasanna napanda ket kinabilda ti Israel ket tinagikuada ti siudad dagiti kayo a palma.+ 14  Ket ti annak ti Israel nagtultuloyda nga agserbi ken Eglon nga ari ti Moab iti sangapulo ket walo a tawen.+ 15  Ket ti annak ti Israel nangrugi nga umasug ken Jehova maipaay iti tulong.+ Gapuna imbangonan ida ni Jehova iti manangisalakan, ni Ehud+ nga anak ni Gera, maysa a Benjamita,+ lalaki a kannigid ti kannawidanna.+ Idi agangay babaen iti imana nangipatulod ti annak ti Israel iti impuesto ken Eglon nga ari ti Moab. 16  Kabayatanna inyaramidan ni Ehud ti bagina iti maysa a kampilan, ket addaan dua a tadem,+ maysa a kasiko ti kaatiddogna. Kalpasanna imbarikesna iti uneg ti kawesna iti makannawan a luppona.+ 17  Ket indatagna ti impuesto ken Eglon nga ari ti Moab.+ Ita ni Eglon maysa a nalukmeg unay a lalaki. 18  Ket naaramid nga idi nalpasna nga indatag ti impuesto,+ dagus a pinapanawna dagiti umili, dagiti nagawit iti impuesto. 19  Ket isu nagsubli kadagiti pagkungkongan nga adda idiay Gilgal,+ ket kinunana: “Addaanak iti nalimed a sao maipaay kenka, O ari.” Gapuna kinunana: “Agulimekkayo!” Iti kasta rimmuar manipud kenkuana dagidiay amin a sitatakder iti sibayna.+ 20  Ket ni Ehud immay kenkuana bayat a situtugaw iti napariir a siledna iti pangatepan nga agpaay kenkuana. Ket kinuna ni Ehud: “Addaanak iti sao ti Dios maipaay kenka.” Iti kasta timmakder manipud tronona. 21  Idin inkarawa ni Ehud ti makannigid nga imana ket innalana ti kampilanna manipud makannawan a luppona ket induyokna iti tianna. 22  Ket ti putan limmumlom met a simmaruno iti tadem iti kasta ti taba kimmalupkop iti tadem, ta saanna nga inuksot ti kampilan manipud tianna, ket nangrugi a rummuar ti ibleng. 23  Ket rimmuar ni Ehud iti abut a serkan ti angin, ngem inserrana dagiti ruangan ti siled iti pangatepan iti likudanna ket pinunitanna ida. 24  Ket isu rimmuar.+ Ket immay dagiti adipenna ket nangrugida a kimmita, ket sadiay napunitan dagiti ruangan ti siled iti pangatepan. Gapuna kinunada: “Umib-ibleng+ laeng iti napariir a makin-uneg a siled.” 25  Ket nagur-urayda agingga a nabainanda, ket, adtoy! awan ti asinoman a mangilukat kadagiti ruangan ti siled iti pangatepan. Gapu itoy innalada ti tulbek ket linuktanda ida, ket, adtoy! ti apoda napasag a natay iti daga! 26  No maipapan ken Ehud, nagtalaw bayat ti panagtaktakda, ket isu limmabas kadagiti pagkungkongan+ ket nagtalaw agingga iti Seira. 27  Ket naaramid nga idi nakagteng sadiay rinugianna a pinuyot ti tangguyob+ iti nakabambantay a rehion ti Efraim;+ ket nangrugi a nakipagsalog kenkuana ti annak ti Israel manipud iti nakabambantay a rehion, nga isu ti adda iti sanguananda. 28  Kalpasanna kinunana kadakuada: “Surotendak,+ agsipud ta ni Jehova inyawatna dagiti kabusoryo, dagiti Moabita, iti imayo.”+ Ket simmursurotda kenkuana ket naalada dagiti pagballasiwan+ ti Jordan maibusor kadagiti Moabita, ket saanda a pinalubosan a bumallasiw ti asinoman. 29  Ket iti dayta a tiempo kinabilda ti Moab, agarup sangapulo a ribu a lallaki,+ tunggal maysa a nabaked+ ken tunggal maysa a maingel a lalaki; ket awan ti uray maysa a nakatalaw.+ 30  Ket ti Moab naparukma iti dayta nga aldaw iti sidong ti ima ti Israel; ket ti daga awananen iti pannakasinga iti walopulo a tawen.+ 31  Ket iti kalpasan kenkuana adda idi ni Samgar+ nga anak ni Anat, ket kinabilna dagiti Filisteo,+ innem a gasut a lallaki, babaen ti maysa a tirad a pagabug iti baka; ket naisalakanna met ti Israel.+

Footnotes