Mapan iti linaonna

Mapan iti segundario a pagpilian

Mapan iti listaan dagiti linaonna

Dagiti Saksi ni Jehova

Iloko

Online a Biblia | BARO A LUBONG A PATARUS TI NASANTUAN A KASURATAN

Uk-ukom 21:1-25

21  Ita dagiti lallaki ti Israel nagsapatada idiay Mizpa,+ a kunkunada: “Awanto ti lalaki kadatayo a mangited iti anakna a babai ken Benjamin kas asawa.”+  Iti kasta dagiti umili dimtengda iti Bethel+ ket nagtugtugawda sadiay iti sango ti pudno a Dios+ agingga iti rabii ket intuloyda ti mangipigsa iti timekda ken agsasangit iti kasta unay.+  Ket kunada: “Apay, O Jehova a Dios ti Israel, a napasamak daytoy iti Israel, a ti maysa a tribu mapukpukaw ita nga aldaw iti Israel?”+  Ket naaramid iti sumaganad nga aldaw a bimmangon a nasapa dagiti umili ket nangibangonda iti altar sadiay ket nagidatonda iti datdaton a mapuoran+ ken datdaton a pakikaykaysa.+  Kalpasanna kinuna ti annak ti Israel: “Siasino kadagiti amin a tribu ti Israel ti saan a simmang-at iti kongregasion ken Jehova, ta adda naindaklan a sapata+ a naaramid maipapan iti daydiay saan a simmang-at ken Jehova idiay Mizpa, a naikuna, ‘Mapapatay koma a di bumurong.’”+  Ket nangrugi nga agbabawi ti annak ti Israel gapu ken Benjamin a kabsatda. Gapuna kinunada: “Ita nga aldaw maysa a tribu ti narissing iti Israel.  Anianto ti aramidentayo kadagidiay natedda no maipapan iti assawa a babbai, ita ta datayo insapatatayo+ babaen ken Jehova a saantayo nga ited kadakuada ti asinoman iti annaktayo a babbai kas assawa?”+  Ket intultuloyda a kunaen: “Siasino kadagiti tribu ti Israel ti saan a simmang-at ken Jehova idiay Mizpa?”+ Ket, adtoy! awan ti immay iti pakarso manipud Jabes-galaad+ agingga iti kongregasion.  Idi nabilang dagiti umili, ala ket, adtoy! awan ti tao sadiay manipud kadagiti agnanaed iti Jabes-galaad. 10  Gapuna ti gimong nangibaon sadiay iti sangapulo ket dua a ribu kadagiti kamamaingelan a lallaki ket binilinda ida, a kunkunada: “Mapankayo, ket masapul a kabilenyo dagiti agnanaed iti Jabes-galaad babaen ti tadem ti kampilan, uray dagiti babbai ken dagiti ubbing.+ 11  Ket daytoy ti banag a rebbeng nga aramidenyo: Tunggal lalaki ken tunggal babai a nakapadas a nakikaidda iti lalaki ipaayyo iti pannakadadael.”+ 12  Nupay kasta, nakasarakda manipud kadagiti agnanaed iti Jabes-galaad+ iti uppat a gasut a babbai, birhen,+ a saan a nakidenna iti lalaki babaen ti pannakikaidda iti lalaki. Gapuna inyegda ida iti pakarso idiay Silo,+ nga adda iti daga ti Canaan. 13  Ket ti intero a gimong nagbaon ita ket nagsao iti annak ni Benjamin nga adda iti napasdok a bato ti Rimmon+ ket nangitukonda kadakuada iti talna. 14  Iti kasta nagsubli ti Benjamin iti dayta a tiempo. Kalpasanna intedda kadakuada dagiti babbai a tinaginayonda a sibibiag manipud kadagiti babbai ti Jabes-galaad;+ ngem saanda a nakasarak iti umanay a maipaay kadakuada.+ 15  Ket nagbabawi dagiti umili gapu iti Benjamin+ agsipud ta nangaramid ni Jehova iti giwang iti nagbaetan dagiti tribu ti Israel. 16  Iti kasta kinuna dagiti lallakay ti gimong: “Anianto ti aramidentayo kadagiti lallaki a natedda no maipapan iti assawa a babbai, ta natalipuposen dagiti babbai manipud Benjamin?” 17  Idin kinunada: “Rebbeng nga adda sanikua maipaay kadagidiay nakatalaw ti Benjamin,+ tapno saan a mapunas ti maysa a tribu manipud Israel. 18  No maipapan kadatayo, saantayo a mapalubosan a mangted kadakuada iti assawa manipud iti annaktayo a babbai, agsipud ta nagsapata ti annak ti Israel, a kunkunada, ‘Mailunod daydiay mangted iti asawa ken Benjamin.’”+ 19  Kamaudiananna kinunada: “Adtoy! Adda piesta ni Jehova iti tinawentawen idiay Silo,+ nga adda iti amianan ti Bethel, a tumurong iti daya ti kangrunaan a kalsada a sumang-at manipud Bethel agingga iti Siquem+ ken tumurong iti abagatan ti Lebona.” 20  Gapuna binilinda ti annak ni Benjamin, a kunkunada: “Mapankayo, ket agpadaankayto kadagiti kaubasan. 21  Ket kumitakayto, ket, sadiay ita, inton rummuar ti annak a babbai ti Silo tapno agsalada+ iti sirkulo a salsala, rummuarkayto met manipud kadagiti kaubasan ket puersaenyo nga alaen maipaay kadakayo tunggal maysa ti asawaenna manipud iti annak a babbai ti Silo, ket mapankayto iti daga ti Benjamin. 22  Ket mapasamakto a no umay ti ammada wenno ti kakabsatda tapno mangidatagda iti legal a kaso maibusor kadakami, pudno unay a kunaenminto met kadakuada, ‘Ipaayandakami iti pabor maipagapu kadakuada, agsipud ta saanmi a nayalaan tunggal maysa ti asawaenna babaen ti gubat,+ ta saan a dakayo ti nangted kadakuada idi tiempo a makabasolkayo koma.’”+ 23  Iti kasta ti annak ni Benjamin inaramidda ti kasta, ket nangalada iti assawa maipaay iti bilangda+ manipud kadagiti babbai nga agsalasala,+ a rinabsutda; kalpasan dayta napanda ket nagsublida iti tawidda ket binangonda dagiti siudad+ ket nagnaedda kadakuada. 24  Ket nangrugi nga agwawara ti annak ti Israel manipud sadiay iti dayta a tiempo, tunggal maysa iti bukodna a tribu ken bukodna a pamilia; ket rimmuarda manipud sadiay, tunggal maysa nga agturong iti bukodna a tawid.+ 25  Kadagidi nga aldaw awan ari iti Israel.+ No ania ti umiso kadagiti bukodna a mata isu idi ti nayugali nga aramiden ti tunggal maysa.+

Footnotes