Accessibility setting

Agpili iti lengguahe

Mapan iti segundario a pagpilian

Mapan iti listaan dagiti linaonna

Mapan iti linaonna

Dagiti Saksi ni Jehova

Iloko

Online a Biblia

BARO A LUBONG A PATARUS TI NASANTUAN A KASURATAN

Uk-ukom 2:1-23

2  Kalpasanna simmang-at ti anghel ni Jehova+ manipud Gilgal+ agingga iti Boquim+ ket kinunana: “Inaonkayo iti Egipto ket inyegkayo iti daga a maipapan iti dayta nagsapataak kadagidi ammayo.+ Kanayonanna pay, kinunak, ‘Saankonto a pulos rakraken ti tulagko kadakayo.+  Ket iti biangyo, dikay mamatalged iti tulag kadagiti agnanaed itoy a daga.+ Dagiti altarda rebbeng a rugpuenyo.’+ Ngem saankayo nga immimdeng iti timekko.+ Apay nga inaramidyo daytoy?+  Ngarud, kalpasanna, kinunak, ‘Saankonto a pagtalawen ida iti sanguananyo, ket agbalindanto a silsilo kadakayo,+ ket ti didiosda agserbidanto a kas appan kadakayo.’”+  Ket naaramid nga apaman a naisao ti anghel ni Jehova dagitoy a sasao iti amin nga annak ti Israel, nangrugi nga ipigsa dagiti umili ti timekda ket nagsangitda.+  Gapuna pinanagananda dayta a disso iti Boquim. Ket nagisakripisioda sadiay ken Jehova.  Idi pinapanaw ni Josue dagiti umili, ngarud napan ti annak ti Israel, tunggal maysa iti tawidna, tapno tagikuaenda ti daga.+  Ket dagiti umili nagtultuloyda nga agserbi ken Jehova iti amin nga al-aldaw ni Josue ken iti amin nga al-aldaw dagiti lallakay a ti al-aldawda naglaylayon kalpasan ni Josue ken isuda a nakakita iti isuamin a naindaklan nga aramid ni Jehova nga inaramidna maipaay iti Israel.+  Kalpasanna ni Josue nga anak ni Nun, ti adipen ni Jehova, natay iti edad a sangagasut ket sangapulo a tawen.+  Gapuna intabonda iti teritoria ti tawidna idiay Timnat-heres+ iti nakabambantay a rehion ti Efraim, iti amianan ti Bantay Gaas.+ 10  Ket isuamin met dayta a kaputotan naitiponda kadagiti ammada,+ ket nangrugi a tumaud ti sabali pay a kaputotan iti kalpasanda a saan a makaam-ammo ken Jehova wenno iti aramid nga inaramidna maipaay iti Israel.+ 11  Ket inaramid ti annak ti Israel no ania ti dakes kadagiti mata ni Jehova+ ket nagserbida kadagiti Baal.+ 12  Ngarud binaybay-anda ni Jehova a Dios dagiti ammada a nangiruar kadakuada manipud daga ti Egipto+ ket simmurotda kadagiti sabali a didios manipud iti didios dagiti ili nga adda iti isuamin nga aglikmutda+ ket rinugianda ti nagruknoy kadakuada, iti kasta pinagrurodda ni Jehova.+ 13  Ngarud binaybay-anda ni Jehova ket nagserbida ken Baal ken kadagiti ladawan ni Astoret.+ 14  Gapu itoy gimmil-ayab ti unget ni Jehova iti Israel,+ iti kasta inyawatna ida iti im-ima dagiti manangkamkam, ket rinugianda a kamkamen ida;+ ket inlakona ida iti ima dagiti kabusorda iti aglikmut,+ ket saandan a nabaelan ti agtakder iti sango dagiti kabusorda.+ 15  Sadinoman a rummuaranda, ti ima ni Jehova maibusor idi kadakuada maipaay iti didigra,+ kas iti sinao ni Jehova ken kas iti insapata kadakuada ni Jehova;+ ket nagpasarda kadagiti nakaro unay a pakarigatan.+ 16  Gapuna agibangon ni Jehova iti uk-ukom,+ ket isalakanda ida iti ima dagiti manangkamkam kadakuada.+ 17  Ket uray iti uk-ukomda saanda nga immimdeng, no di ket naaddaanda iti imoral a pannakidenna+ kadagiti sabali a didios+ ket nagrukruknoyda kadakuada. Sidadaras a simiasida iti dalan a nagnaan dagidi ammada babaen ti panagtulnogda iti bilbilin ni Jehova.+ Saanda nga inaramid ti kasta. 18  Ket idi imbangonan ida ni Jehova iti uk-ukom,+ adda idi ni Jehova iti ukom; ket insalakanna ida iti ima dagiti kabusorda iti amin nga al-aldaw ti ukom; ta ni Jehova agladingit+ iti panagasugda gapu kadagiti mangirurrurumen kadakuada+ ken kadagidiay mangidupirdupir kadakuada. 19  Ket napasamak a no ti ukom matay agbaw-ingda ket agtignayda nga ad-adda a makadadael ngem kadagiti ammada babaen ti pannagnada a sumurot kadagiti sabali a didios tapno agserbida kadakuada ken agruknoyda kadakuada.+ Saanda nga inidian ti ar-aramidda ken ti nasungit a panagtigtignayda.+ 20  Kamaudiananna gimmil-ayab ti unget ni Jehova+ iti Israel ket kinunana: “Gapu ta daytoy a nasion sinalungasingna ti tulagko+ nga imbilinko kadagidi ammada ken saanda nga immimdeng iti timekko,+ 21  siak met, iti biangko, saankonto a pagtalawen manen iti sanguananda ti uray maysa kadagiti nasion a nabati ni Josue idi natay,+ 22  tapno masubok+ ti Israel babaen kadakuada, no manangsalimetmetdanto met laeng iti dalan ni Jehova babaen ti pannagnada iti dayta kas ti panangsalimetmet dagiti ammada, wenno saan.” 23  Iti kasta binay-an ni Jehova nga agtalinaed dagitoy a nasion babaen ti saanna a panamagtalaw a sidadaras kadakuada,+ ket saanna nga inyawat ida iti ima ni Josue.

Footnotes