Mapan iti linaonna

Mapan iti segundario a pagpilian

Mapan iti listaan dagiti linaonna

Dagiti Saksi ni Jehova

Iloko

Online a Biblia | BARO A LUBONG A PATARUS TI NASANTUAN A KASURATAN

Uk-ukom 19:1-30

19  Ita napasamak kadagidi nga aldaw nga awan ari iti Israel.+ Ket naaramid a ti maysa a Levita agtataeng idi iti apagbiit iti kaadaywan a paspaset ti nakabambantay a rehion ti Efraim.+ Idi agangay innalana a kas asawana ti maysa a kamalala+ manipud Betlehem+ idiay Juda.  Ket ti kamalalana nangrugi a makiabig+ maikaniwas kenkuana. Kamaudiananna pimmanaw kenkuana a napan iti balay ni amana iti Betlehem idiay Juda ket nagtalinaed sadiay iti intero nga uppat a bulan.  Kalpasanna timmakder ti asawana ket simmurot kenkuana tapno agsao iti makaliwliwa kenkuana iti kasta iyawidna; ket naikuyog kenkuana ti katulonganna+ ken sangaparis nga asno. Gapuna pinastrekna iti balay ni amana. Idi isu nakita ti ama ti agtutubo a babai, madagdagus a nagrag-o a sumabet kenkuana.  Gapuna inggawid ti katuganganna, ti ama ti agtutubo a babai, iti kasta nagtultuloy a makipagnaed kenkuana iti tallo nga aldaw; ket mangan ken uminumda, ket umyan sadiay iti agpatnag.+  Ket naaramid iti maikapat nga aldaw, idi bimmangonda a nasapa iti bigat kas gagangay, bimmangon ita tapno mapanen, ngem ti ama ti agtutubo a babai kinunana iti manugangna: “Taraonam ta pusom iti sangkabassit a tinapay+ ket kalpasanna mapankayon.”  Gapuna nagtugawda, ket isuda a dua nangrugida a mangan ken uminum; kalpasan dayta ti ama ti agtutubo a babai kinunana iti lalaki: “Umayka, pangngaasim, ket umyanka iti agpatnag,+ ket bay-am nga agragsak ta pusom.”+  Idi timmakder ti lalaki tapno mapanen, nagpakpakaasi kenkuana ti katuganganna, iti kasta imyan manen sadiay iti agpatnag.+  Idi bimmangon a nasapa iti bigat iti maikalima nga aldaw tapno mapanen, idin kinuna ti ama ti agtutubo a babai: “Pangngaasim, agtaraonka maipaay iti pusom.”+ Ket nagtaktakda agingga iti isisipnget ti aldaw. Ket nagtultuloyda a nangan a dua.  Timmakder ita ti lalaki+ tapno mapanen, isu ken ti kamalalana+ ken ti katulonganna;+ ngem ti katuganganna, ti ama ti agtutubo a babai, kinunana kenkuana: “Adtoy, ita! Ti aldaw agturongen iti irarabii. Pangngaasim, umyankayo iti agpatnag.+ Adtoy aggibusen ti aldaw. Umyanka ditoy iti agpatnag, ket bay-am nga agragsak ta pusom.+ Ket inton bigat bumangonkayto a nasapa maipaay iti panagbaniagayo, ket mapankanto iti toldam.” 10  Nupay kasta, saan nga immannugot ti lalaki nga umyan iti agpatnag, no di ket timmakder ket napan ket dimteng agingga iti sanguanan ti Jebus,+ kayatna a sawen, Jerusalem;+ ket naikuyog kenkuana ti sangaparis nga asno a nasiliaan, ken ti kamalalana ken ti katulonganna. 11  Bayat nga addada iti asideg ti Jebus, yantangay bimmaba unayen ti lawag ti aldaw,+ kinuna ita ti katulongan iti apona: “O umayka, ita, ket agturongtayo itoy a siudad dagiti Jebuseo+ ket umyantayo iti dayta iti agpatnag.” 12  Ngem kinuna kenkuana ti apona: “Saantayo nga agturong iti siudad dagiti ganggannaet+ a saan a paset ti annak ti Israel; ket kasapulan a lumabastayo agingga iti Gabaa.”+ 13  Ket intultuloyna a kunaen iti katulonganna: “Umayka ket umasidegtayo iti maysa kadagiti disso, ket umyantayto iti agpatnag idiay Gabaa wenno uray idiay Rama.”+ 14  Gapuna limmabasda ket nagtultuloyda iti dalanda, ket nangrugi a malnekan ida ti init idi asidegdan iti Gabaa, a kukua ti Benjamin. 15  Iti kasta nagturongda sadiay tapno sumrekda nga umyan iti agpatnag idiay Gabaa. Ket simrekda ket nagtugawda iti publiko a plasa ti siudad, ket awan asinoman a nangpastrek kadakuada iti balay tapno umyanda iti agpatnag.+ 16  Iti kamaudiananna, adtoy! maysa a lakay um-umay manipud iti trabahona idiay talon iti rabii,+ ket ti lalaki naggapu iti nakabambantay a rehion ti Efraim,+ ket agtataeng iti apagbiit idiay Gabaa; ngem Benjamita dagiti tattao ti disso.+ 17  Idi intangwana dagiti matana nakitana ti lalaki, ti agdaldaliasat, iti publiko a plasa ti siudad. Gapuna kinuna ti lakay: “Sadino ti papanam, ket sadino ti naggapuam?”+ 18  Kinunana kenkuana kalpasanna: “Lumaslasatkami manipud Betlehem idiay Juda agingga iti kaadaywan a paspaset ti nakabambantay a rehion ti Efraim.+ Sadiay ti naggapuak, ngem napanak iti Betlehem idiay Juda;+ ket mapanak iti bukodko a balay, ket awan asinoman a mangpastrek kaniak iti balay.+ 19  Ket agpadpada nga adda garami ken taraon+ a maipaay kadagiti asnomi, ket agpadpada nga adda tinapay+ ken arak maipaay kaniak ken iti adipenmo a babai+ ken maipaay iti katulongan+ a kadua ti adipenmo. Awan ti panagkurang iti uray maysa a banag.” 20  Nupay kasta, kinuna ti lakay: “Maaddaanka koma iti talna!+ Bay-am a maipabiang latta kaniak ti aniaman a pagkurangam.+ Isuna laeng ta saanka nga umyan iti agpatnag iti publiko a plasa.” 21  Gapuna inyegna iti balayna+ ket pinuruakanna dagiti asno iti giniling a pagtaraon.+ Kalpasanna binugguanda dagiti sakada+ ket rinugianda ti mangan ken uminum. 22  Bayat ti panangparparagsakda kadagiti pusoda,+ adtoy! dagiti lallaki ti siudad, tattao nga awan kaes-eskanna laeng,+ pinalikmutanda ti balay,+ nga agdidinnupirda iti ruangan; ket kinunkunada iti lakay, ti makinkukua iti balay: “Iruarmo ti lalaki a simrek iti balaymo, tapno makidennakami kenkuana.”+ 23  Iti kasta ti makinkukua ti balay rimmuar a napan kadakuada ket kinunana kadakuada:+ “Saan, kakabsatko,+ dikay agaramid ti aniaman a dakes, pangngaasiyo, yantangay daytoy a lalaki simrek iti balayko. Dikay aramiden daytoy nakababain a kinamaag.+ 24  Adtoy ti birhen nga anakko a babai ken ti kamalalana. Pangngaasiyo, bay-anyo nga iruarko ida, ket ramesenyo ida+ ken aramidenyo kadakuada no ania ti naimbag kadagiti matayo. Ngem iti daytoy a lalaki dikay aramiden daytoy nakababain, minamaag a banag.” 25  Ket dagiti lallaki saanda a kinayat ti umimdeng kenkuana. Gapuna ti lalaki iniggamanna ti kamalalana+ ket impanna kadakuada iti ruar; ket rinugianda ti makidenna kenkuana,+ ket nagpalpalaluanda+ iti intero nga agpatnag agingga iti bigat, a kalpasan dayta pinagawidda idi agbannawagen. 26  Idin dimteng ti babai idi bumigaten, ket napasag iti pagserkan ti balay ti lalaki nga ayan ti apona,+—agingga iti panaglawag ti aldaw. 27  Idi agangay bimmangon ti apona iti bigat ket linuktanna dagiti ruangan ti balay ket rimmuar tapno mapanen, ket, adtoy! ti babai, ti kamalalana,+ napasag iti pagserkan ti balay a dagiti imana adda iti arsadanan! 28  Gapuna kinunana kenkuana: “Tumakderka, ket mapantayon.” Ngem awan ti simmungbat.+ Iti kasta isu imparabaw ti lalaki iti asno ket timmakder ket napan iti lugarna.+ 29  Kalpasanna simrek iti balayna ket innalana ti pagparti nga imuko ket iniggamanna ti kamalalana ket rinangrangkayna sigun kadagiti tulangna iti sangapulo ket dua a paset+ ket isu impatulodna iti tunggal teritoria ti Israel.+ 30  Ket napasamak a tunggal maysa a makakita iti dayta kinunana: “Ti banag a kas itoy saan pay a pulos napasamak wenno nakita manipud iti aldaw nga isasang-at ti annak ti Israel manipud daga ti Egipto agingga itoy nga aldaw. Isaadyo dagiti pusoyo iti dayta, agnunumokayo+ ket agsaokayo.”

Footnotes