Accessibility setting

Agpili iti lengguahe

Mapan iti segundario a pagpilian

Mapan iti listaan dagiti linaonna

Mapan iti linaonna

Dagiti Saksi ni Jehova

Iloko

Online a Biblia

BARO A LUBONG A PATARUS TI NASANTUAN A KASURATAN

Uk-ukom 16:1-31

16  Iti naminsan napan ni Samson idiay Gaza+ ket nakakita sadiay iti babai a balangkantis ket simrek a napan kenkuana.+  Ket naipadamag kadagiti Gazita, a naikuna: “Simrek ditoy ni Samson.” Gapuna pinalikmutanda+ ket pinadaananda iti intero nga agpatnag iti ruangan ti siudad.+ Ket nagtalinaedda a siuulimek iti agpatpatnag, a kunkunada: “Apaman nga aglawag iti bigat, papatayentayto met.”+  Nupay kasta, nagtalinaed a siiidda ni Samson agingga iti tengnga ti rabii ket kalpasanna bimmangon iti tengnga ti rabii ket ginammatanna dagiti rikep ti ruangan ti siudad+ ken ti dua a makin-igid a teddek ket pinarutna ida agraman ti balunet ket imbaklayna ken insang-atna+ ida agingga iti tapaw ti bantay nga adda iti sango ti Hebron.+  Ket naaramid kalpasan dayta nga isu nagayat iti maysa a babai idiay naapres a ginget ti Sorec, ket ti naganna Dalila.+  Ket ti aliado nga appo+ dagiti Filisteo simmang-atda a mapan kenkuana ket kinunada kenkuana: “Sikapam+ ket kitaem no ania ti pagtaudan ti dakkel a bilegna ken no ania ti mabalinmi a pangabak kenkuana ken no ania ti sigurado a pangparautmi kenkuana tapno maparukmami; ket dakami, iti biangmi, tunggal maysa ikkandakanto iti sangaribu ket sangagasut a kapisi a pirak.”+  Idi agangay ni Dalila kinunana ken Samson: “Ibagam kaniak, pangngaasim, Ania ti pagtataudan ti dakkel a bilegmo ken ania ti mabalin a pangparaut kenka tapno maparukmanaka ti maysa?”+  Idin kinuna kenkuana ni Samson: “No parautandak iti pito a naata pay laeng a binggas+ a saan a naipagango, kumapuyakto met ket agbalinak a kas iti kadawyan a tao.”  Gapuna ti aliado nga appo+ dagiti Filisteo nangyegda kenkuana iti pito a naata pay laeng a binggas a saan a naipagango. Idi agangay pinarautanna babaen kadagita.  Ita ti pangsaneb situtugaw idi kadagiti makin-uneg a siledna,+ ket rinugianna a kunaen kenkuana: “Umayda kenkan dagiti Filisteo,+ Samson!” Iti kasta pinugsatna a ginudua dagiti binggas, no kasano a ti maysa a tinabid a linabag ti lapnit mapugsat a magudua no makasay-up iti apuy.+ Ket saan a naammuan ti bilegna.+ 10  Kalpasanna ni Dalila+ kinunana ken Samson: “Adtoy! Pinagang-angawannak tapno agsaoka kadagiti kinaulbod kaniak.+ Ita ibagam kaniak, ibagam pangngaasim, no ania ti mabalin a pangparaut kenka.” 11  Gapuna kinunana kenkuana: “No parautandak a siiirut iti baro a taltali a saan pay a naaramat iti trabaho, kumapuyakto met ket agbalinakto a kas iti kadawyan a tao.” 12  Gapuna nangala ni Dalila iti baro a taltali ket pinarautanna babaen kadagita ket kinunana kenkuana: “Umayda kenkan dagiti Filisteo, Samson!” Bayat dayta ti pangsaneb situtugaw idi iti makin-uneg a siled.+ Iti kasta pinugsatna ida a ginudua manipud kadagiti takiagna a kas iti linabag.+ 13  Kalpasan dayta ni Dalila kinunana ken Samson: “Agingga ita pinagang-angawannak tapno agsaoka kadagiti kinaulbod kaniak.+ Ibagam kaniak no ania ti mabalin a pangparaut kenka.”+ Idin kinunana kenkuana: “No ilagamto ti pito a sallapid ti ulok iti sinulid ti gan-ay.”+ 14  Iti kasta pinairutanna ida babaen ti pasok, a kalpasanna kinunana kenkuana: “Umayda kenkan dagiti Filisteo, Samson!”+ Gapuna nagriing iti turogna ket pinarutna ti pasok ti pagabelan ken ti sinulid ti gan-ay. 15  Kinunana ita kenkuana: “Anian a nagturedka nga agkuna, ‘Ay-ayatenka,’+ idinto ta awan kaniak ta pusom? Kadagitoy namitlo pinagang-angawannak ket saanmo nga imbaga kaniak no ania ti pagtataudan ti dakkel a bilegmo.”+ 16  Ket naaramid a gapu ta pinilitna+ babaen iti sasaona iti amin a gundaway ken ginuyguyugoyna, di nakaanus ti kararuana agingga a matay pay ketdin.+ 17  Kamaudiananna imbutaktakna kenkuana ti isuamin a pusona+ ket kinunana kenkuana: “Saan a pulos immay ti labaha+ iti rabaw ti ulok, agsipud ta maysaak a Nazareo ti Dios manipud tian ni inak.+ No makiskisanak, sigurado a pumanaw met kaniak ti bilegko, ket pudno a kumapuyak ket agbalinak a kas iti amin a sabsabali a tattao.”+ 18  Idi nakita ni Dalila nga imbutaktakna kenkuana ti isuamin a pusona, nagbaon a dagus ket pinaayabanna ti aliado+ nga appo dagiti Filisteo, a kunkunana: “Sumang-atkayo iti daytoy a gundaway, ta imbutaktakna kaniak ti isuamin a pusona.”+ Ket simmang-at a napan kenkuana ti aliado nga appo dagiti Filisteo tapno maiyegda ti kuarta nga adda iti imada.+ 19  Ket pinaturogna iti rabaw dagiti tumengna. Kalpasanna inayabanna ti lalaki ket impakiskisna ti pito a sallapid ti ulona, a kalpasan dayta rinugianna ti panangparukma kenkuana, ket ti bilegna nagtultuloy a pimmanaw kenkuana. 20  Ita kinunana: “Umayda kenkan dagiti Filisteo, Samson!” Iti kasta nagriing iti turogna ket kinunana: “Rummuarakto a kas kadagidi dadduma a gundaway+ ket aggulagolak a lumapsut.” Ket saanna nga ammo a ni Jehova ti pimmanaw kenkuana.+ 21  Gapuna ginammatan dagiti Filisteo ket sinuatda dagiti matana+ ket insalogda nga impan idiay Gaza+ ket pinarautanda iti dua a grilios a gambang;+ ket nagbalin nga aggilgiling+ iti balay a pagbaludan.+ 22  Kabayatanna ti buok ti ulona nangrugi a tumubo a sibabaludbod apaman a nakiskisan.+ 23  No maipapan iti aliado nga appo dagiti Filisteo, naguummongda a sangsangkamaysa tapno agisakripisioda iti naindaklan a sakripisio ken Dagon+ a diosda ken maipaay iti panagrag-o, ket kinunkunada: “Ti diostayo inyawatna iti imatayo ni Samson a kabusortayo!”+ 24  Idi isu nakita dagiti tattao, madagdagus nga indaydayawda ti diosda,+ “agsipud ta,” kinunada, “ti diostayo inyawatna iti imatayo ti kabusortayo+ ken ti mamagwalangwalang iti dagatayo+ ken ti nangpaadu kadagiti napapatay kadatayo.”+ 25  Ket naaramid nga agsipud ta naragsak ti pusoda,+ rinugianda a kunaen: “Ayabanyo ni Samson tapno ipaayannatayo iti panglinglingay.”+ Gapuna inayabanda ni Samson manipud balay a pagbaludan tapno makapagaramid iti ay-ayam iti sanguananda;+ ket pinagtakderda iti nagbaetan dagiti adigi. 26  Idin kinuna ni Samson iti ubing a mangkibkibin kenkuana iti imana: “Palubosannak nga arikapek dagiti adigi a nakaipasdekan a sititibker ti balay ket bay-annak nga agsadag kadakuada.” 27  (Kabayatanna, napno ti balay iti lallaki ken babbai ket adda sadiay ti amin nga aliado nga appo dagiti Filisteo;+ ket iti pangatepan adda agarup tallo ribu a lallaki ken babbai nga agbuybuya bayat a mangipapaay ni Samson iti panglinglingay.)+ 28  Ni Samson+ immawag ita ken Jehova+ ket kinunana: “Soberano nga Apo Jehova, lagipennak,+ pangngaasim, ket papigsaennak,+ pangngaasim, itoy maminsan laengen, O sika a pudno a Dios, ket bay-annak nga ibalesak ti bagik kadagiti Filisteo babaen ti pammales maipaay iti maysa kadagiti dua a matak.”+ 29  Gapuna insadag ni Samson ti bagina iti dua a nagtengnga nga adigi a nakaipasdekan a sititibker ti balay, ket iniggamanna ida, ti maysa iti makannawanna ket ti sabali iti makannigid nga imana. 30  Ket kinuna ni Samson: “Bay-am a matay ti kararuak+ a kadua dagiti Filisteo.” Idin inrukobna ti bagina buyogen ti bileg, ket narba ti balay iti rabaw ti aliado nga appo ken iti rabaw dagiti amin nga umili nga adda iti dayta,+ iti kasta dagiti natay a pinapatayna iti mismo nga ipapatayna ad-adu ngem dagidiay napapatayna bayat ti panagbiagna.+ 31  Idi agangay simmalog ti kakabsatna ken isuamin a sangakabbalayan ni amana ket binagkatda ken insang-atda ket intabonda iti nagbaetan ti Zora+ ken Estaol+ iti lugar a pagitabonan ni Manoa+ nga amana. No maipapan kenkuana, inukomna ti Israel iti duapulo a tawen.+

Footnotes