Accessibility setting

Agpili iti lengguahe

Mapan iti segundario a pagpilian

Mapan iti listaan dagiti linaonna

Mapan iti linaonna

Dagiti Saksi ni Jehova

Iloko

Online a Biblia

BARO A LUBONG A PATARUS TI NASANTUAN A KASURATAN

Uk-ukom 14:1-20

14  Kalpasanna ni Samson simmalog idiay Timna+ ket nakakita iti maysa babai idiay Timna iti annak a babbai dagiti Filisteo.  Gapuna simmang-at ket imbagana kada amana ken inana ket kinunana: “Adda babai a nakitak idiay Timna iti annak dagiti Filisteo, ket ita alaenyo maipaay kaniak a kas asawa.”+  Ngem kinuna kenkuana da amana ken inana: “Awan kadi ti babai iti annak a babbai ti kakabsatmo ken kadagiti amin a kailiak,+ tapno mangalaka iti asawa kadagiti di nakugit a Filisteo?”+ Kaskasdi kinuna ni Samson iti amana: “Isu latta ti alaem maipaay kaniak, agsipud ta isu laeng ti maitutop kadagiti matak.”  No maipapan kada amana ken inana, saanda nga ammo a nagtaud dayta ken Jehova,+ a mangsapsapul idi iti gundaway maibusor kadagiti Filisteo, ta iti dayta met laeng a tiempo agturturay dagiti Filisteo iti Israel.+  Iti kasta simmalog ni Samson idiay Timna+ a kaduana da amana ken inana. Idi nakagteng agingga kadagiti kaubasan ti Timna, ay ket, adtoy! ti maysa a burboran a bumaro a leon agngerngernger idi masabetna.  Idin nagtignay kenkuana ti espiritu ni Jehova,+ iti kasta pinisangna a ginudua, no kasano a ti maysa pisangenna a guduaen ti maysa a kalakian nga urbon a kalding, ket awan a pulos ti aniaman a banag iti imana. Ket saanna nga imbaga kada amana ken inana ti inaramidna.  Ket nagtultuloy a simmalog ket rinugianna ti agsao iti babai; ket kaskasdi nga isu maitutop kadagiti mata ni Samson.+  Ita idi agangay nagsubli tapno isu isangpetna.+ Kabayatanna simiasi tapno kitaenna ti bangkay ti leon, ket sadiay adda pangen dagiti uyokan iti bangkay ti leon, ken diro.+  Gapuna kinaruyna kadagiti dakulapna ket nagtultuloy a nagna, a mangmangan bayat a magmagna.+ Idi naikadua manen kada amana ken inana, madagdagus nga inikkanna ida, ket rinugianda ti mangan. Ket saanna nga imbaga kadakuada nga iti bangkay ti leon ti nangkaruyanna iti diro. 10  Ket ti amana nagtultuloy a simmalog agingga iti babai, ket nangangay ni Samson iti bangkete sadiay;+ ta kasta idi ti kadawyan nga ar-aramiden dagiti agtutubo. 11  Ket naaramid nga, idi isu makitada, dagus a nangalada iti tallopulo nga abay a lallaki, tapno agtalinaed dagitoy a kaduana. 12  Idin kinuna kadakuada ni Samson: “Bay-andak, pangngaasiyo, a mangidatag iti burburtia kadakayo.+ No di bumurong a maibagayo dayta kaniak bayat ti pito nga aldaw+ ti bangkete ket masungbatanyo, iti kasta kasapulan nga ikkankayo iti tallopulo a makin-uneg a kawes ken tallopulo nga aruaten a pagan-anay.+ 13  Ngem no saanyo a kabaelan nga ibaga kaniak, dakayo masapul met nga ikkandak iti tallopulo a makin-uneg a kawes ken tallopulo nga aruaten a pagan-anay.” Gapu itoy kinunada kenkuana: “Idatagmo ti burburtiam, ket denggenmi.” 14  Gapuna kinunana kadakuada: “Manipud iti managkaan+ rimmuar ti banag a makan, Ket manipud iti napigsa rimmuar ti banag a nasam-it.”+ Ket saanda idi a nabaelan nga ibaga ti burburtia iti tallo nga aldaw. 15  Ket naaramid iti maikapat nga aldaw a rinugianda a kunaen iti asawa ni Samson: “Sikapam ti asawam tapno ibagana koma kadakami ti burburtia.+ Ta no saan puorandakanto ken ti balay ni amam iti apuy.+ Inawisdakami aya ditoy tapno alaenyo dagiti sanikuami?”+ 16  Iti kasta ti asawa ni Samson nangrugi nga agsangit kenkuana+ ken agkuna: “Kagurguranak laeng, pudno a kasta, ket saannak nga ay-ayaten.+ Adda burburtia nga indatagmo iti annak dagiti kailiak,+ ngem saanmo nga imbaga kaniak.” Gapu itoy kinunana kenkuana: “Ay ket, iti bukodko nga ama ken bukodko nga ina saanko nga imbaga,+ ket rebbeng kadi nga ibagak kenka?” 17  Ngem nagsangsangit kenkuana iti pito nga aldaw a panagtultuloy ti bangkete maipaay kadakuada, ket naaramid iti maikapito nga aldaw a kamaudiananna imbagana kenkuana, agsipud ta pinilitna.+ Kalpasanna imbagana ti burburtia iti annak dagiti kailianna.+ 18  Gapuna kinuna kenkuana dagiti lallaki ti siudad iti maikapito nga aldaw sakbay a makastrek iti makin-uneg a siled:+ “Ania ti nasamsam-it ngem iti diro, Ket ania ti napigpigsa ngem iti maysa a leon?”+ Kalpasanna kinunana kadakuada: “No saanyo koma a pinagarado ti urbon a bakak,+ Saanyo koma a nasungbatan ti burburtiak.”+ 19  Ket nagtignay kenkuana ti espiritu ni Jehova,+ iti kasta isu simmalog a napan idiay Ascalon+ ket nangpapatay iti tallopulo a lallaki kadakuada ket innalana ti inuksobna kadakuada ket intedna dagiti aruaten kadagiti nangibaga iti burburtia.+ Ket nagtultuloy a sibabara ti ungetna, ket isu simmang-at a napan iti balay ni amana. 20  Ket ti asawa ni Samson+ nagbalin a kukua ti maysa nga abayna+ a lalaki a nakitimpuyog kenkuana.

Footnotes