Accessibility setting

Agpili iti lengguahe

Mapan iti segundario a pagpilian

Mapan iti listaan dagiti linaonna

Mapan iti linaonna

Dagiti Saksi ni Jehova

Iloko

Online a Biblia

BARO A LUBONG A PATARUS TI NASANTUAN A KASURATAN

Uk-ukom 13:1-25

13  Ket ti annak ti Israel inaramidda manen no ania ti dakes kadagiti mata ni Jehova,+ iti kasta inyawat ida ni Jehova iti ima dagiti Filisteo+ iti uppat a pulo a tawen.  Kabayatanna adda idi ti maysa a lalaki ti Zora+ iti pamilia dagiti Danita,+ ket ti naganna Manoa.+ Ket lupes ti asawana ken saan a nangipasngay iti anak.+  Idi agangay ti anghel ni Jehova nagparang iti babai+ ket kinunana kenkuana: “Adtoy, ita, lupeska ken saanka a nangipasngay iti anak. Ket sigurado nga agsikogkanto ken mangipasngayka iti anak a lalaki.+  Ket ita aluadam ta bagim, pangngaasim, ket dika uminum iti arak wenno makabartek nga inumen,+ ket dika mangan iti aniaman a banag a narugit.+  Ta, adtoy! agsikogkanto, ket sigurado a mangipasngaykanto iti anak a lalaki, ket rebbeng nga awan ti labaha nga umay iti rabaw ti ulona,+ agsipud ta maysa a Nazareo+ ti Dios ti pagbalinanto ti ubing iti ipapanawna iti tian;+ ket isunto ti mangidaulo ti panangisalakan iti Israel manipud ima dagiti Filisteo.”+  Kalpasanna napan ti babai ket kinunana iti asawana: “Adda immay kaniak a lalaki ti pudno a Dios, ket ti langana kasla langa ti anghel ti pudno a Dios,+ nakaam-amak unay.+ Ket saanko nga inimtuod kenkuana no sadino ti naggapuanna, saanna met nga imbaga kaniak ti naganna.+  Ngem kinunana kaniak, ‘Adtoy! Agsikogkanto, ket sigurado a mangipasngaykanto iti anak a lalaki.+ Ket ita dika uminumen iti arak wenno makabartek nga inumen, ket dika manganen iti aniaman a banag a narugit, agsipud ta maysa a Nazareo ti Dios ti pagbalinanto ti ubing iti ipapanawna iti tian agingga iti aldaw ti ipapatayna.’”+  Ket ni Manoa nangrugi nga agpakaasi ken Jehova ken agkuna: “Dispensarennak, Jehova.+ Ti lalaki ti pudno a Dios a kaibabaonmo, bay-am, pangngaasim, nga umay manen kadakami ket isuronakami+ no ania ti rebbeng nga aramidenmi iti ubing a mayanakto.”+  Iti kasta immimdeng ti pudno a Dios iti timek ni Manoa,+ ket ti anghel ti pudno a Dios immay manen iti babai bayat a situtugaw iti tay-ak, ket saanna a kadua ni Manoa nga asawana. 10  Dagus a nagdardaras ti babai ket nagtaray ket imbagana iti asawana+ ket kinunana kenkuana: “Adtoy! Ti lalaki nga immay kaniak idi sabali nga aldaw nagparang kaniak.”+ 11  Iti kasta timmakder ni Manoa ket kinuyogna ti asawana ket dimteng iti lalaki ket kinunana kenkuana: “Sika kadi ti lalaki a nagsao iti babai?”+ nga iti dayta kinunana: “Siak.” 12  Idin kinuna ni Manoa: “Ita pumudno koma ti sasaom. Anianto ti agbalin a kabibiag ti ubing ken ti trabahona?”+ 13  Gapuna ti anghel ni Jehova kinunana ken Manoa: “Manipud iti isuamin a dinakamatko iti babai rebbeng a salimetmetanna.+ 14  Awan a pulos ti kanenna a nagtaud iti puon ti ubas, ket awan koma ti inumenna nga arak wenno makabartek nga inumen,+ ket awan koma ti kanenna nga aniaman a kita ti narugit a banag.+ Isuamin nga imbilinko kenkuana salimetmetanna koma.”+ 15  Kinuna ita ni Manoa iti anghel ni Jehova: “Bay-am, pangngaasim, nga igawiddaka ket mangisaganakami iti maysa nga urbon dagiti kalding iti sanguanam.”+ 16  Ngem ti anghel ni Jehova kinunana ken Manoa: “No igawidnak, saanakto nga agtaraon iti tinapaymo; ngem no mangidatagkanto iti mapuoran a daton ken Jehova,+ mabalinmo nga idaton dayta.” Ta saan nga ammo ni Manoa nga isu anghel ni Jehova. 17  Idin kinuna ni Manoa iti anghel ni Jehova: “Ania ti naganmo,+ tapno inton pumudno ti saom sigurado a padayawandakanto?” 18  Nupay kasta, kinuna kenkuana ti anghel ni Jehova: “Apay aya nga imtuodem ti naganko, idinto ta maysa dayta a nakaskasdaaw?” 19  Ket innala ni Manoa ti urbon dagiti kalding ken ti daton a bukbukel ket indatonna ken Jehova iti rabaw ti bato.+ Ket Isu nagaramid iti maysa a banag iti nakaskasdaaw a pamay-an bayat a kumitkita ni Manoa ken ti asawana. 20  Gapuna naaramid a, bayat ti panagpangato ti gil-ayab manipud altar nga agpalangit, idin ti anghel ni Jehova nagpangato iti gil-ayab ti altar bayat a kumitkita ni Manoa ken ti asawana.+ Madagdagus nga inruknoyda dagiti rupada a dumanon iti daga.+ 21  Ket ti anghel ni Jehova saannan nga inulit ti nagparang ken Manoa ken iti asawana. Iti daydin a naammuan ni Manoa nga isu ket anghel ni Jehova.+ 22  Iti kasta kinuna ni Manoa iti asawana: “Mataytanto a di bumurong,+ ta ti Dios ti nakitata.”+ 23  Ngem kinuna kenkuana ti asawana: “No naragsakan laeng ni Jehova a papatayennata, saan koma a nangawat iti daton a mapuoran ken iti daton a bukbukel manipud iti imata,+ ken saanna koma nga impakita kadata amin dagitoy a banag, ken saanna koma nga impangngeg kadata a kas ita ti aniaman a banag a kas itoy.”+ 24  Idi agangay nangipasngay ti babai iti anak a lalaki ket pinanagananna iti Samson;+ ket nagtultuloy a dimmakkel ti ubing, ket intuloy a bendisionan ni Jehova.+ 25  Idi agangay isu rinugian a tignayen ti espiritu ni Jehova+ idiay Mahane-dan+ iti nagbaetan ti Zora+ ken Estaol.+

Footnotes