Mapan iti linaonna

Mapan iti segundario a pagpilian

Mapan iti listaan dagiti linaonna

Dagiti Saksi ni Jehova

Iloko

Online a Biblia | BARO A LUBONG A PATARUS TI NASANTUAN A KASURATAN

Sofonias 3:1-20

3  Asi pay daydiay agrebrebelde ken mangrugrugit iti bagina, ti manangirurumen a siudad!+  Saan nga immimdeng iti timek;+ saan nga immawat iti disiplina.+ Saan a nagtalek ken Jehova.+ Saan nga immadani iti Diosna.+  Dagiti prinsipena iti tengngana isuda dagiti leon nga agngerngernger.+ Dagiti ukomna isuda dagiti lobo iti rabii a saan a nagkibkib kadagiti tulang agingga iti bigat.+  Nakuspag dagiti mammadtona, lallakida nga addaan kinagulib.+ Ti met laeng papadina tinabbaawanda ti nasantuan; rinanggasanda ti linteg.+  Ni Jehova nalinteg idi iti tengngana;+ saan nga agaramid iti kinakillo.+ Iti binigat intultuloyna nga inted ti bukodna a hudisial a pangngeddeng.+ Iti panaglawag ti aldaw saan a nagkurang dayta.+ Ngem daydiay nakillo saanna nga ammo ti bain.+  “Nanggessatak kadagiti nasion; nalangalang dagiti torreda iti nagsulian. Tinalipuposko dagiti kalsadada, iti kasta awan ti lumaslasat. Napaglangalang dagiti siudadda, iti kasta awan ti tao, iti kasta awan ti agnanaed.+  Kinunak, ‘Sigurado nga agbutengkanto kaniak; awatemto ti disiplina’;+ tapno iti kasta saan a magessat ti pagnaedanna+—isuamin dayta masapul nga isingirko maibusor kenkuana.+ Pudno unay dagus a nagtignayda a mamagbalin a makadadael ti isuamin a pannakilangenda.+  “‘Gapuna agtultuloykayo a manginanama kaniak,’+ kuna ni Jehova, ‘agingga iti aldaw nga itatakderko a mangkamkam,+ ta ti hudisial a pangngeddengko isu ti panangummong kadagiti nasion,+ tapno mangummongak a sangsangkamaysa kadagiti pagarian, tapno ibukbokko kadakuada ti panangkondenarko,+ isuamin a sumsumged nga ungetko; ta babaen iti apuy ti regtak maalun-onto ti intero a daga.+  Ta iti daytan itdekto kadagiti ili ti panagbalbaliw nga agturong iti nasin-aw a pagsasao,+ tapno isuda amin umawagda iti nagan ni Jehova,+ tapno agserbida kenkuana iti abagan-abaga.’+ 10  “Manipud iti rehion dagiti karayan ti Etiopia dagidiay agpakpakaasi kaniak, awan sabali, ti anak a babai dagidiay naiwarawara a tattaok, mangyegdanto kaniak iti sagut.+ 11  Iti dayta nga aldaw saankanto a mabain gapu kadagiti amin a pannakilangenmo nga insalungasingmo maikaniwas kaniak,+ ta iti daytan ikkatekto iti tengngam dagidiay sitatangsit nga agragrag-o a tattaom;+ ket saankanton a pulos agtangsit iti nasantuan a bantayko.+ 12  Ket sigurado a mangiteddaakto iti tengngam iti maysa nga ili a napakumbaba ken nanumo,+ ket pudno nga agkamangdanto iti nagan ni Jehova.+ 13  No maipapan kadagidiay nabatbati iti Israel,+ saandanto nga agaramid iti kinakillo,+ wenno uray agsao iti kinaulbod,+ saanto met a masarakan kadagiti ngiwatda ti dila a manangallilaw;+ ta isuda agtaraondanto ket pudno nga agiddada a nakaunnat,+ ket awanto ti asinoman a mamagpigerger kadakuada.”+ 14  Agdir-ika a sirarag-o, O anak a babai ti Sion! Agpukkawka a siraragsak,+ O Israel! Agrag-oka ken agragsakka buyogen ti isuamin a puso, O anak a babai ti Jerusalem!+ 15  Ni Jehova inikkatna dagiti panangukom kenka.+ Pinapanawna ti kabusormo.+ Ti ari ti Israel, ni Jehova, adda iti tengngam.+ Saankanton nga agbuteng iti didigra.+ 16  Iti dayta nga aldaw maikunanto iti Jerusalem: “Dika agbuteng, O Sion.+ Saan koma nga agsalupaypay dagiti imam.+ 17  Ni Jehova a Diosmo adda iti tengngam. Kas Daydiay mannakabalin, isu mangisalakanto.+ Agragsakto gapu kenka buyogen ti panagrag-o.+ Agulimekto iti ayatna. Agrag-onto gapu kenka buyogen dagiti naragsak a pukkaw. 18  “Dagidiay agladladingit+ gapu iti panangliwat iti panawen ti piestam sigurado nga ummongekto a sangsangkamaysa;+ nangliwatda kenka, gapu iti panagsagaba iti pannakaumsi maigapu kenkuana.+ 19  Adtoy agtigtignayak a maibusor kadagidiay amin a mangparparigat kenka, iti dayta a tiempo;+ ket isalakankonto daydiay agsagkisagking,+ ket daydiay naiwarawara ummongekto a sangsangkamaysa.+ Ket isaadkonto ida a kas maysa a dayaw ken kas maysa a nagan iti intero a daga ti pannakaibabainda. 20  Iti dayta a tiempo iserrekkayto, iti mismo a tiempo ti panangummongko a sangsangkamaysa kadakayo. Ta pagbalinenkayto a maysa a nagan ken maysa a dayaw iti tengnga dagiti amin nga ili ti daga, inton ummongek nga isubli iti imatangyo dagidiay kautibo kenka,” kuna ni Jehova.+

Footnotes