Mapan iti linaonna

Mapan iti segundario a pagpilian

Mapan iti listaan dagiti linaonna

Dagiti Saksi ni Jehova

Iloko

Online a Biblia | BARO A LUBONG A PATARUS TI NASANTUAN A KASURATAN

Santiago 1:1-27

1  Ni Santiago,+ maysa nga adipen+ ti Dios ken ti Apo a ni Jesu-Kristo, agpaay iti sangapulo ket dua a tribu+ a naiwarawara:+ Dagiti kablaaw!  Ibilangyo a rag-o amin, kakabsatko, no maipasangokayo iti nadumaduma a pakasuotan,+  yantangay ammoyo a daytoy nasubok a kualidad ti pammatiyo mangpataud iti panagibtur.+  Ngem bay-anyo a ti panagibtur an-anayenna ti aramidna, tapno maan-anay+ ken nasalun-atkayo iti amin a bambanag, a saan nga agkurang iti aniaman.+  Gapuna, no ti asinoman kadakayo agkurang iti sirib,+ agtultuloy koma nga agdawat iti Dios,+ ta isu mangted a sipaparabur kadagiti isuamin ken awanan panangumsi;+ ket maitedto dayta kenkuana.+  Ngem isu agtultuloy koma nga agdawat+ buyogen ti pammati, a saan a pulos agduadua,+ ta ti agduadua umasping iti dalluyon ti baybay nga iduron ti angin+ ket maipalpallayog.  Iti kinapudnona, saan koma a pagarupen dayta a tao nga umawatto iti aniaman manipud ken Jehova;+  isu ket di makapangngeddeng+ a tao, di agtaltalinaed+ kadagiti amin a dalanna.  Ngem ti napakumbaba a kabsat agrag-o koma iti pannakaitan-okna,+ 10  ken ti nabaknang+ iti pannakaipababana, agsipud ta kas iti sabong ti mula isu aglabasto.+ 11  Ta ti init lumgak agraman ti makasinit a pudotna ket laylayenna ti mula, ket ti sabongna agregreg ket ti pintas ti makinruar a langana agpukaw. Gapuna, kasta met, ti nabaknang a tao aglumento kadagiti wagas ti panagbiagna.+ 12  Naragsak ti tao nga agtultuloy nga agibtur iti pannakasuot,+ agsipud ta iti pannakaanamongna awatennanto ti korona ti biag,+ nga inkari [ni Jehova] kadagidiay agtultuloy nga agayat kenkuana.+ 13  No adda iti sidong ti pannakasuot,+ awan koma ti agkuna: “Susuotennak ti Dios.” Ta iti dakes a bambanag saan a mabalin a suoten ti Dios ket isu saanna met a suoten ti asinoman. 14  No di ket tunggal maysa masuot babaen ti pananggargari ken panangsulbog ti bukodna a derrep.+ 15  Kalpasanna ti derrep, inton nayinawen, mangipasngay iti basol;+ kalpasanna, ti basol, inton naibanagen, mangpatanor iti ipapatay.+ 16  Dikay payaw-awan,+ dungdungnguek a kakabsat. 17  Tunggal naimbag a sagut+ ken tunggal naan-anay a rangkap aggapu iti ngato,+ ta bumaba dayta manipud iti Ama dagiti nailangitan a lawag,+ ket kenkuana awan ti panagbaliw ti pagturongan ti anniniwan.+ 18  Agsipud ta nagayatanna+ dayta, pinatanornatayo babaen iti sao ti kinapudno,+ tapno agbalintayo a maysa a kita ti umuna a bungbunga+ dagiti parsuana. 19  Ammuenyo daytoy, dungdungnguek a kakabsat. Tunggal tao masapul a nasiglat no iti panagdengngeg, nainayad no iti panagsao,+ nabannayat no iti panagpungtot;+ 20  ta ti pungtot ti tao saanna nga itungpal ti kinalinteg ti Dios.+ 21  Gapuna iwaksiyo ti isuamin a kinarugit ken dayta aglablabes a banag, ti kinadakes,+ ket buyogen ti kinaalumamay awatenyo ti pannakaimula ti sao+ a makabalin a mangisalakan kadagiti kararuayo.+ 22  Nupay kasta, agbalinkayo a managtungpal iti sao,+ ket saan a managdengngeg laeng, nga al-allilawenyo ti bagbagiyo iti ulbod a panagrasrason.+ 23  Ta no ti asinoman managdengngeg iti sao, ket saan a managtungpal,+ daytoy ket umasping iti tao a kitkitaenna ti nakaisigudan a rupana iti maysa a pagsarmingan. 24  Ta kitaenna ti bagina, ket isu mapan ket dagus a malipatanna no ania a kita ti tao isuna. 25  Ngem ti mangsukimat iti perpekto a linteg+ a kukua ti wayawaya ken agtultuloy iti dayta, daytoy a tao, agsipud ta isu nagbalin, saan a maysa a manglipat a managdengngeg, no di ket maysa a managaramid iti trabaho,+ naragsakto+ iti panangaramidna iti dayta. 26  No ti asinoman a tao pagarupenna iti bagina nga isu maysa a pormal a managdaydayaw+ ket kaskasdi a saanna a ngedngedan ti dilana,+ no di ket itultuloyna nga allilawen ti bukodna a puso,+ ti porma ti panagdaydayaw daytoy a tao ket barengbareng.+ 27  Ti porma ti panagdaydayaw a nadalus+ ken di natulawan+ iti panangmatmat ti Dios ken Amatayo isu daytoy: panangtaripato kadagiti ulila+ ken iti balo a babbai+ kadagiti rigatda,+ ken panamagtalinaed ti maysa iti bagina nga awanan mulit+ manipud iti lubong.+

Footnotes