Mapan iti linaonna

Mapan iti segundario a pagpilian

Mapan iti listaan dagiti linaonna

Dagiti Saksi ni Jehova

Iloko

Online a Biblia | BARO A LUBONG A PATARUS TI NASANTUAN A KASURATAN

Salmo 35:1-28

Ni David. 35  Tamingem ti kasok, O Jehova, maibusor kadagiti kalabanko;+ Gubatem dagidiay manggubgubat kaniak.+   Mangpetpetka iti sarapa ken dakkel a kalasag,+ Ket tumakderka a tumulong kaniak,+   Ket mangasutka iti pika ken nagsumbangir-tademna a wasay a sumabet kadagidiay mangkamkamat kaniak.+ Sawem iti kararuak: “Siak ti salakanmo.”+   Maibabain ken maipababa koma dagidiay a mangan-anup iti kararuak.+ Mapagsanud ken maab-abi koma dagidiay a mangganggandat iti pannakadidigrak.+   Agbalinda koma a kas ti taep iti sanguanan ti angin,+ Ket sunsonen koma ida ti anghel ni Jehova.+   Ti dalanda agbalin koma a kinasipnget ken nagalis a disdisso,+ Ket kamaten koma ida ti anghel ni Jehova.   Ta awan gapgapuna nga inlemmengda maipaay kaniak ti nabatengan nga abutda;+ Awan gapgapuna a kinalida dayta maipaay iti kararuak.+   Dumteng koma kenkuana ti pannakarba a saanna a maam-ammuan,+ Ket tiliwen koma ti bukodna nga iket nga inlemmengna;+ Buyogen ti pannakarba matnag koma iti dayta.+   Ngem ti bukodko a kararua agrag-o koma ken Jehova;+ Agragsak koma dayta iti panangisalakanna.+ 10  Amin dagiti mismo a tulangko kunaenda koma:+ “O Jehova, siasino ti kas kenka,+ A mangispal iti daydiay naparigatan manipud maysa a napigpigsa ngem isu,+ Ken daydiay naparigatan ken napanglaw manipud iti daydiay mangtaktakaw kenkuana?”+ 11  Tumakder dagiti nadawel a saksi;+ Ti saanko a naammuan imtuodenda kaniak.+ 12  Gunggonaandak iti dakes kas subad ti naimbag,+ Pannakaulila iti kararuak.+ 13  No maipapan kaniak, idi nagsakitda, ti pagan-anayko tinakpil,+ Iti panagayunar pinarigatko ti kararuak,+ Ket iti barukongko agsubli ti bukodko a kararag.+ 14  No maipapan iti maysa a kadua, no maipapan iti maysa a kabsatko,+ Nagpagnapagnaak a kasla maysa nga agledleddaang iti ina.+ Sililiday, nagrukobak. 15  Ngem iti panagsagkisagkingko nagrag-oda ken naguummongda a sangsangkamaysa;+ Naguummongda a sangsangkamaysa maibusor kaniak,+ A kinabildak a saanko a pagaammo;+ Pinisangpisangdak ket saanda a nagulimek.+ 16  Iti tengnga dagiti apostata a manangrabrabak maipaay iti tinapay+ Adda panangingaretnget kadagiti ngipenda maibusor a mismo kaniak.+ 17  O Jehova, kasanonto kabayag a kitkitaem dayta?+ Isublim ti kararuak manipud kadagiti panangrebbekda,+ Uray ti kakaisunak+ manipud kadagiti burboran a bumaro a leon. 18  Idayawkanto iti dakkel a kongregasion;+ Iti tengnga ti ili a nakaad-adu idaydayawkanto.+ 19  O dagidiay a kabusorko nga awan ti rason saandak koma a pagraragsakan;+ No maipapan kadagidiay manggurgura kaniak nga awan gapgapuna, saanda koma a pagkiddayen ti mata.+ 20  Ta saan a talna ti sawenda;+ No di ket maibusor kadagidiay naulimek iti daga Mangganggandatda iti bambanag ti panangallilaw.+ 21  Ket ngangaenda a naimbag ti ngiwatda maibusor a mismo kaniak.+ Kinunada: “Aha! Aha! ti matami nakitana dayta.”+ 22  Nakitam, O Jehova.+ Dika agtalinaed a siuulimek.+ O Jehova, dika agtalinaed nga adayo kaniak.+ 23  Bumangonka ket agriingka iti panangukomko,+ O Diosko, Jehova a mismo, iti kasok iti linteg.+ 24  Ukomennak maitunos iti kinalintegmo, O Jehova a Diosko,+ Ket saandak koma a pagraragsakan.+ 25  O saanda koma a kunaen iti pusoda: “Aha, ti kararuami!”+ Saanda koma a kunaen: “Isu inalun-onmi.”+ 26  Mabainan ken maab-abi koma amin a sangsangkamaysa dagidiay+ A narag-o iti pannakadidigrak.+ Makawesan koma iti bain+ ken pannakaipababa dagidiay nga agpaspasaw maibusor kaniak.+ 27  Agdir-i koma a sirarag-o ken agragsak dagidiay a maragragsakan iti kinalintegko,+ Ket kunaenda koma a patinayon:+ “Maitan-ok koma ni Jehova, a pagragsakanna ti talna ti adipenna.”+ 28  Ket ti kinalintegmo isao koma ti bukodko a dila iti nababa a timek,+ Iti intero nga agmalem ti pakaidaydayawam.+

Footnotes