Mapan iti linaonna

Mapan iti segundario a pagpilian

Mapan iti listaan dagiti linaonna

Dagiti Saksi ni Jehova

Iloko

Online a Biblia | BARO A LUBONG A PATARUS TI NASANTUAN A KASURATAN

Salmo 105:1-45

105  Agyamankayo ken Jehova, umawagkayo iti naganna,+ Ipakaammoyo kadagiti ili dagiti pannakilangenna.+   Kantaanyo, mangipaaykayo kenkuana iti samiweng,+ Ibiangyo ti bagbagiyo iti amin a nakaskasdaaw nga ar-aramidna.+   Agpasindayagkayo gapu iti nasantuan a naganna.+ Agrag-o koma ti puso dagidiay agsapsapul ken Jehova.+   Birokenyo ni Jehova ken ti pigsana.+ Sapulenyo a patinayon ti rupana.+   Lagipenyo ti nakaskasdaaw nga ar-aramidna nga inaramidna,+ Dagiti milagrona ken dagiti hudisial a pangngeddeng ti ngiwatna,+   O dakayo a bin-i ni Abraham nga adipenna,+ Dakayo nga annak ni Jacob, dagidiay pinilina.+   Isu ni Jehova a Diostayo.+ Dagiti hudisial a pangngeddengna addada iti intero a daga.+   Linagipna ti tulagna agingga a mismo iti tiempo a di nakedngan,+ Ti sao nga imbilinna, agingga iti sangaribu a kaputotan,+   A dayta a tulag pinatalgedanna ken Abraham,+ Ken ti sinapataanna a sasao ken Isaac,+ 10  Ken dayta a sasao pinagtalinaedna kas maysa nga alagaden ken Jacob a mismo, Kas maysa a di nakedngan ti kapautna a tulag iti Israel a mismo,+ 11  A kunkunana: “Kenka itdekto ti daga ti Canaan+ Kas ti bingay ti tawidyo.”+ 12  Napasamak daytoy idi bassit ti bilangda,+ Wen, bassit unay, ken ganggannaet nga agnanaed iti dayta.+ 13  Ket nagtultuloyda a nagpagnapagna manipud nasion agingga iti nasion,+ Manipud maysa a pagarian agingga iti sabali nga ili.+ 14  Saanna nga impalubos a sauren ida ti asinoman a tao,+ No di ket maipagapu kadakuada nangtubngar iti ar-ari,+ 15  A kunkunana: “Saanyo a sagiden dagidiay pinulotak,+ Ket kadagiti mammadtok dikay agaramid iti aniaman a dakes.”+ 16  Ket nangayab iti nakaro a bisin iti rabaw ti daga;+ Tinukkolna ti tunggal ungkay nga iti aglikmutna naibitin dagiti nagtimbukel a tinapay.+ 17  Nangibaon iti immun-una kadakuada a maysa a lalaki A nailako tapno agbalin nga adipen, ni Jose.+ 18  Babaen kadagiti grilios pinarigatda dagiti sakana,+ Kadagiti landok immay ti kararuana;+ 19  Agingga iti tiempo a dimteng ti saona,+ Isu pinasudi ti mismo a sasao ni Jehova.+ 20  Ti ari nagbaon tapno isu luk-atanna,+ Ti agturay kadagiti ili, tapno isu palusposanna. 21  Isu insaadna kas apo iti sangakabbalayanna+ Ken kas agturay iti isuamin a sanikuana,+ 22  Tapno isinggalutna dagiti prinsipena a makaay-ayo iti kararuana+ Ken tapno isurona ti kinasirib uray pay iti lallakay a tattaona.+ 23  Ket ni Israel immay iti Egipto,+ Ket ni met laeng Jacob nagtaeng kas ganggannaet iti daga ni Ham.+ 24  Ket intultuloyna a pinagbalin a nabunga unay ti ilina,+ Ket in-inut a pinagbalinna ida a nabilbileg ngem kadagiti kabusorda.+ 25  Impalubosna nga agbaliw ti pusoda tapno guraenda ti ilina,+ Tapno agtignayda a sisisikap maibusor kadagiti adipenna.+ 26  Imbaonna ni Moises nga adipenna,+ Ni Aaron a pinilina.+ 27  Inkabilda iti tengngada ti bambanag dagiti pagilasinanna,+ Ken dagiti milagro iti daga ni Ham.+ 28  Nangibaon iti sipnget ket ngarud pinagsipngetna;+ Ket saanda a nagrebelde iti sasaona.+ 29  Ti dandanumda pinagbalinna a dara,+ Ket pinapatayna dagiti ikanda.+ 30  Ti dagada sinaknapan dagiti tukak,+ Kadagiti makin-uneg a siled ti ar-arida. 31  Kinunana nga umay koma dagiti bingraw,+ Dagiti sepsep iti amin a teritoriada.+ 32  Pinagbalinna nga uraro dagiti bayakabakda,+ Maysa a gumilgil-ayab nga apuy iti dagada.+ 33  Ket kinabilna dagiti puon ti ubasda ken dagiti kayoda a higos Ket sinip-akna dagiti kayo iti teritoriada.+ 34  Sinaona nga umay dagiti dudon,+ Ken kakikita ti dudon, nga awanan bilang.+ 35  Ket kinnanda ti isuamin a mulmula iti dagada;+ Kinnanda met ti bunga ti dagada. 36  Ket kinabilna ti tunggal inauna iti dagada,+ Ti punganay ti isuamin a pannakabalinda nga agpaadu.+ 37  Ket rinugianna nga iruar ida agraman pirak ken balitok;+ Ket kadagiti tribuna awan idi ti asinoman a maitibkol. 38  Ti Egipto nagrag-o idi rimmuarda, Ta ti panagalinggaget kadakuada immapay kadakuada.+ 39  Nangbistrad iti ulep a maipaay a tabing,+ Ken apuy a mangted lawag iti rabii.+ 40  Nagkiddawda, ket nangyeg kadagiti pugo,+ Ket iti tinapay manipud langit pinempennekna ida.+ 41  Nanglukat iti maysa a bato, ket nangrugi nga agayus ti dandanum;+ Dagitoy limmasatda kadagiti awanan danum a rehion kas maysa a karayan.+ 42  Ta linagipna ti nasantuan a saona ken Abraham nga adipenna.+ 43  Gapuna inruarna ti ilina buyogen ti panagragsak,+ Dagidiay pinilina buyogen a mismo iti narag-o nga ikkis.+ 44  Ket in-inut nga intedna kadakuada ti dagdaga dagiti nasion,+ Ket tinagtagikuada ti bunga ti napinget a panagtrabaho dagiti nasional a bunggoy,+ 45  Iti panggep a salimetmetanda koma dagiti alagadenna+ Ken tungpalenda dagiti bukodna a linteg.+ Idaydayawyo ni Jah!+

Footnotes